ತತಿಯ ಪರಿಚ್ಛೇದ

ಪಠಮಧಮ್ಮಸಂಗೀತಿ

೧. ಪಞ್ಚನೇತ್ತೋ ಜಿನೋ ಪಞ್ಚ-ಚತ್ತಾಲೀಸಸಮಾ’ಸಮೋ;

ಠತ್ವಾ ಸಬ್ಬಾನಿ ಕಿಚ್ಚಾನಿ, ಕತ್ವಾ ಲೋಕಸ್ಸ ಸಬ್ಬಥಾ.

೨. ಕುಸಿನಾರಾಯಯಮಕ-ಸಾಲಾನಮನ್ತರೇ ವರೇ;

ವೇಸಾಖಪುಣ್ಣಮಾಯಂ ಸೋ, ದೀಪೋ ಲೋಕಸ್ಸ ನಿಬ್ಬುತೋ.

೩. ಸಙ್ಖ್ಯಾಪಥಮತಿಕ್ಕನ್ತಾ, ಭಿಕ್ಖೂ ತತ್ಥ ಸಮಾಗತಾ;

ಖತ್ತಿಯಾ ಬ್ರಾಹ್ಮಣಾ ವಸ್ಸಾ, ಸುದ್ಧಾ ದೇವಾ ತಥೇವ ಚ.

೪. ಸತ್ತಸತಸಹಸ್ಸಾನಿ, ತೇಸು ಪಾಮೋಕ್ಖಭಿಕ್ಖವೋ;

ಥೇರೋ ಮಹಾಕಸ್ಸಪೋವ, ಸಙ್ಘತ್ಥೇರೋ ತದಾ ಅಹು.

೫. ಸತ್ಥುಸರೀರಸಾರೀರ-ಧಾತುಕಿಚ್ಚಾನಿ ಕಾರಿಯ;

ಇಚ್ಛನ್ತೋ ಸೋ ಮಹಾಥೇರೋ, ಸತ್ಥು ಧಮ್ಮಚಿರಟ್ಠಿತಿಂ.

೬. ಲೋಕನಾಥೇ ದಸಬಲೇ, ಸತ್ತಾಹಪರಿನಿಬ್ಬುತೇ;

ದುಬ್ಭಾಸಿತಂ ಸುಭದ್ದಸ್ಸ, ಬುದ್ಧಸ್ಸ ವಚನಂ ಸರಂ.

೭. ಸರಂ ಚೀವರದಾನಞ್ಚ, ಸಮತ್ತೇ ಠಪನಂ ತಥಾ;

ಸದ್ಧಮ್ಮಠಪನತ್ಥಾಯ, ಮುನಿನಾ’ನುಗ್ಗಹಂ ಕತಂ.

೮. ಕಾತುಂ ಸದ್ಧಮ್ಮಸಂಗೀತಿಂ, ಸಮ್ಬುದ್ಧಾನಮತೇ ಯತಿ;

ನವಙ್ಗಸಾಸನಧರೇ, ಸಬ್ಬಙ್ಗಸಮುಪಾಗತೇ.

೯. ಭಿಕ್ಖೂ ಪಞ್ಚಸತೇಯೇವ, ಮಹಾಖೀಣಾಸವೇ ವರೇ;

ಸಮ್ಮನ್ನಿ ಏಕೇನೂನೇ ತು, ಆನನ್ದತ್ಥೇರಕಾರಣಾ.

೧೦. ಪುನ ಆನನ್ದತ್ಥೇರಾ’ಪಿ, ಭಿಕ್ಖೂಹಿ ಅಭಿಯಾಚಿತೋ;

ಸಮ್ಮನ್ನಿ ಕಾತುಂ ಸಂಗೀತಿಂ, ಸಾ ನ ಸಕ್ಕಾ ಹಿ ತಂ ವಿನಾ.

೧೧. ಸಾಧುಕೀಳನಸತ್ತಾಹಂ, ಸತ್ತಾಹಂ ಧಾತುಭಾಜನಂ;

ಇಚ್ಚದ್ಧಮಾಸಂ ಖೇಪೇತ್ವಾ, ಸಬ್ಬಲೋಕಾನುಕಮ್ಪಕಾ.

೧೨. ವಸ್ಸಂ ವಸಂ ರಾಜಗಹೇ, ಕಸ್ಸಾಮ ಧಮ್ಮಸಙ್ಗಹಂ;

ನಾಞ್ಞೇಹಿ ತತ್ತ ವತ್ಥಬ್ಬ-ಮಿತಿ ಕತ್ವಾನ ನಿಚ್ಛಯಂ.

೧೩. ಸೋಕಾತುರಂ ತತ್ಥ ತತ್ಥ, ಅಸ್ಸಾಸೇನ್ತೋ ಮಹಾಜನಂ;

ಜಮ್ಬುದೀಪಮ್ಹಿ ತೇ ಥೇರಾ, ವಿಚರಿತ್ವಾನ ಚಾರಿಕಂ.

೧೪. ಆಸಳ್ಹಿಸುಕ್ಕಪಕ್ಖಮ್ಹಿ, ಸುಕ್ಕಪಕ್ಖಠಿತತ್ಥಿಕಾ;

ಉಪಾಗಮುಂ ರಾಜಗಹಂ, ಸಮ್ಪನ್ನಚತುಪಚ್ಚಯಂ.

೧೫. ತತ್ಥೇವ ವಸ್ಸೂಪಗತಾ, ತೇ ಮಹಾಕಸ್ಸಪಾದಯೋ;

ಥೇರಾ ಥಿರಗುಣೂಪೇತಾ, ಸಮ್ಬುದ್ಧಮತಕೋವಿದಾ.

೧೬. ವಸ್ಸಾನಂ ಪಠಮಂ ಮಾಸಂ, ಸಬ್ಬಸೇನಾಸನೇಸು’ಪಿ;

ಕಾರೇಸುಂ ಪಟಿಸಙ್ಖಾರಂ, ವತ್ವಾನಾ’ಜಾತಸತ್ತುನೋ.

೧೭. ವಿಹಾರಪಟಿಸಙ್ಖಾರೇ, ನಿಟ್ಠಿತೇ ಅಹು ಭೂಪತಿ;

ಇದಾನಿ ಧಮ್ಮಸಂಗೀತಿಂ, ಕರಿಸ್ಸಾಮಿ ಮಯಂ ಇತಿ.

೧೮. ಕತ್ತಬ್ಬಂ ಕಿನ್ತಿಪುಟ್ಠಸ್ಸ, ನಿಸಜ್ಜಠಾನಮಾದಿಸುಂ;

ರಾಜಾ ಕತ್ಥಾತಿ ಪುಚ್ಛಿತ್ವಾ, ವುತ್ತಠಾನಮ್ಹಿ ತೇಹಿ ಸೋ.

೧೯. ಸೀಘಂ ವೇಭಾರಸೇಲಸ್ಸ, ಪಸ್ಸೇ ಕಾರೇಸಿ ಮಣ್ಡಪಂ;

ಸತ್ತಪಣ್ಣಿಗುಹಾದ್ವಾರೇ, ರಮ್ಮಂ ದೇವಸಭೋಪಮಂ.

೨೦. ಸಬ್ಬಥಾ ಮಣ್ಡಯಿತ್ವಾ ತಂ, ಅತ್ಥರಾಪೇಸಿ ತತ್ಥ ಸೋ;

ಭಿಕ್ಖೂನಂ ಗಣನಾಯೇವ, ಅನಗ್ಘತ್ಥರಣಾನಿ ಚ.

೨೧. ನಿಸ್ಸಾಯ ದಕ್ಖಿಣಂ ಭಾಗಂ, ಉತ್ತರಾಮುಖಮುತ್ತಮಂ;

ಥೇರಾಸನಂ ಸುಪಞ್ಞತ್ತಂ, ಆಸಿ ತತ್ಥ ಮಹಾರಹಂ.

೨೨. ತಸ್ಮಿಂ ಮಣ್ಡಪಮಜ್ಝಸ್ಮಿಂ, ಪುರತ್ಥಮುಖಮುತ್ತಮಂ;

ಧಮ್ಮಾಸನಂ ಸುಪಞ್ಞತ್ತಂ, ಅಹೋಸಿ ಸುಗತಾರಹಂ.

೨೩. ರಾಜಾ’ರೋಚಯಿ ಥೇರಾನಂ, ಕಮ್ಮಂ ನೋ ನಿಟ್ಠಿತಂ ಇತಿ;

ತೇ ಥೇರಾ ಥೇರಮಾನನ್ದ-ಮಾನನ್ದಕರಮಬ್ರವುಂ.

೨೪. ಸ್ವೇ ಸನ್ನಿಪಾತೋ ಆನನ್ದ, ಸೇಖೇನ ಗಮನಂ ತಹಿಂ;

ನ ಯುತ್ತನ್ತೇ ಸದತ್ಥೇ ತ್ವಂ, ಅಪ್ಪಮತ್ತೋ ತತೋ ಭವ.

೨೫. ಇಚ್ಚೇವಂ ಚೋದಿತೋ ಥೇರೋ, ಕತ್ವಾನ ವೀರಿಯಂ ಸಮಂ;

ಇರಿಯಾಪಥತೋ ಮುತ್ತಂ, ಅರಹತ್ತಮಪಾಪುಣಿ.

೨೬. ವಸ್ಸಾನಂ ದುತಿಯೇ ಮಾಸೇ, ದುತಿಯೇ ದಿವಸೇ ಪನ;

ರುಚಿರೇ ಮಣ್ಡಪೇ ತಸ್ಮಿಂ, ಥೇರಾ ಸನ್ನಿಪತಿಂಸು ತೇ.

೨೭. ಠಪೇತ್ವಾ’ನನ್ದತ್ಥೇರಸ್ಸ, ಅನುಚ್ಛವಿಕಮಾಸನಂ;

ಆಸನೇಸು ನಿಸೀದಿಂಸು, ಅರಹನ್ತೋ ಯಥಾರಹಂ.

೨೮. ಥೇರೋ’ರಹತ್ತಪತ್ತಿಂ ಸೋ, ಞಾಪೇತುಂ ತೇಹಿ ನಾಗಮಾ;

ಕುಹಿಂ ಆನನ್ದತ್ಥೇರೋ’ತಿ, ವುಚ್ಚಮಾನೇ ತು ಕೇಹಿಚಿ.

೨೯. ನಿಮ್ಮುಜ್ಜಿತ್ವಾ ಪಥವಿಯಾ, ಗನ್ತ್ವಾ ಜೋತಿಪಥೇನ ವಾ;

ನಿಸೀದಿ ಥೇರೋ ಆನನ್ದೋ, ಅತ್ತನೋ ಠಪಿತಾಸನೇ.

೩೦. ಉಪಾಲಿಥೇರೋ ವಿನಯೇ, ಸೇಸಧಮ್ಮೇ ಅಸೇಸಕೇ;

ಆನನ್ದತ್ಥೇರಮಕರುಂ, ಸಬ್ಬೇ ಥೇರಾ ಧುರನ್ಧರೇ.

೩೧. ಮಹಾಥೇರೋ ಸಕತ್ತಾನಂ, ವಿನಯಂ ಪುಚ್ಛಿತುಂ ಸಯಂ;

ಸಮ್ಮನ್ನು’ಪಾಲಿಥೇರೋ ಚ, ವಿಸ್ಸಜ್ಜೇತುಂ ತಮೇವ ತು.

೩೨. ಥೇರಾಸನೇ ನಿಸೀದಿತ್ವಾ, ವಿನಯಂ ತಮಪುಚ್ಛಿ ಸೋ;

ಧಮ್ಮಾಸನೇ ನಿಸೀದಿತ್ವಾ, ವಿಸ್ಸಜ್ಜೇಸಿ ತಮೇವ ಸೋ.

೩೩. ವಿನಯಞ್ಞೂನಮಗ್ಗೇನ, ವಿಸ್ಸಜ್ಜಿತಕಮೇನ ತೇ;

ಸಬ್ಬೇ ಸಜ್ಝಾಯಮಕರುಂ, ವಿನಯಂ ನಯಕೋವಿದಾ.

೩೪. ಅಗ್ಗಂ ಬಹುಸ್ಸುತಾದೀನಂ, ಕೋಸಾರಕ್ಖಂ ಮಹೇಸಿನೋ;

ಸಮ್ಮನ್ನಿತ್ವಾನ ಅತ್ತಾನಂ, ಥೇರೋ ಧಮ್ಮಮಪುಚ್ಛಿ ಸೋ.

೩೫. ತಥಾ ಸಮ್ಮನ್ನಿಯ’ತ್ತಾನಂ, ಧಮ್ಮಾಸನಾಗತೋ ಸಯಂ;

ವಿಸ್ಸಜ್ಜೇಸಿ ತಮಾನನ್ದ-ತ್ಥೇರೋ ಧಮ್ಮಮಸೇಸತೋ.

೩೬. ವೇದೇಹಮುನಿನಾ ತೇನ, ವಿಸ್ಸಜ್ಜಿತಕಮೇನ ತೇ;

ಸಬ್ಬೇ ಸಜ್ಝಾಯಮಕರುಂ, ಧಮ್ಮಂ ಧಮ್ಮತ್ಥಕೋವಿದಾ.

೩೭. ಏವಂ ಸತ್ತಹಿ ಮಾಸೇಹಿ, ಧಮ್ಮಸಂಗೀತಿ ನಿಟ್ಠಿತಾ;

ಸಬ್ಬಲೋಕಹಿತತ್ಥಾಯ, ಸಬ್ಬಲೋಕಹಿ ತೇಹಿ ಸಾ.

೩೮. ಮಹಾಕಸ್ಸಪಥೇರೇನ, ಇದಂ ಸುಗತಸಾಸನಂ;

ಪಞ್ಚವಸ್ಸಸಹಸ್ಸಾನಿ, ಸಮತ್ಥಂ ವತ್ತನೇ ಕತಂ.

೩೯. ಅತೀವ ಜಾತಪಾಮೋಜ್ಜಾ, ಸನ್ಧಾರಕಜಲನ್ತಿಕಾ;

ಸಂಗೀತಿಪರಿಯೋಸಾನೇ, ಛದ್ಧಾಕಮ್ಪಿ ಮಹಾಮಹೀ.

೪೦. ಅಚ್ಛರಿಯಾನಿ ಚಾ’ಹೇಸುಂ, ಲೋಕೇನೇಕಾನಿನೇಕಧಾ;

ಥೇರೇಹೇವ ಕತತ್ತಾ ಚ, ಥೇರಿಯಾಯಂ ಪರಮ್ಪರಾ.

೪೧. ಪಠಮಂ ಸಙ್ಗಹಂ ಕತ್ವಾ, ಸಬ್ಬಲೋಕಹಿತಂ ಬಹುಂ;

ತೇ ಯಾವತಾಯುಕಂ ಠತ್ವಾ, ಥೇರಾ ಸಬ್ಬೇಪಿ ನಿಬ್ಬುತಾ.

೪೨. ಥೇರಾ’ಪಿ ತೇ ಮತಿಪದೀಪಹತನ್ಧಕಾರಾ,

ಲೋಕನ್ಧಕಾರಹನನಮ್ಹಿ ಮಹಾಪದೀಪಾ;

ನಿಬ್ಬಾಪಿತಾ ಮರಣಘೋರಮಹಾನಿಲೇನ,

ತೇನಾಪಿ ಜೀವಿತಮದಂ ಮತಿಮಾ ಜಹೇಯ್ಯಾತಿ.

ಸುಜನಪ್ಪಸಾದಂಸಂವೇಗತ್ಥಾಯ ಕತೇ ಮಹಾವಂಸೇ

ಪಠಮಧಮ್ಮಸಂಗೀತಿನಾಮ

ತತಿಯೋ ಪರಿಚ್ಛೇದೋ.