ಚುದ್ದಸಮ ಪರಿಚ್ಛೇದ

ನಗರಪ್ಪವೇಸನೋ

೧. ದೇವಾನಂಪಿಯತಿಸ್ಸೋ ಸೋ, ರಾಜಾ ಸಲಿಲಕೀಳಿತಂ;

ದತ್ವಾ ನಗರವಾಸೀನಂ, ಮಿಗವಂ ಕೀಳಿತುಂ ಅಗಾ.

೨. ಚತ್ತಾಲೀಸಸಹಸ್ಸೇಹಿ, ನರೇಹಿ ಪರಿವಾರಿತೋ;

ಧಾವನ್ತೋ ಪದಸಾಯೇವ, ಅಗಮಾ ಮಿಸ್ಸಕಂ ನಗಂ.

೩. ಥೇರೇ ದಸ್ಸೇತುಮಿಚ್ಛನ್ತೋ, ದೇವೋ ತಸ್ಮಿಂ ಮಹೀಧರೇ;

ಗುಮ್ಭಂಭಕ್ಖಯಮಾನೋ’ವ, ಅಟ್ಠಾ ಗೋಕಣ್ಣರೂಪವಾ.

೪. ರಾಜಾ ದಿಸ್ವಾ ‘‘ಪಮತ್ತಂ ತಂ, ನ ಯುತ್ತಂ ವಿಜ್ಝಿತುಂ’’ ಇತಿ;

ಜಿಯಾ ಸದ್ದಮಕಾಧಾಪಿ, ಗೋಕಣ್ಣೋ ಪಬ್ಬತನ್ತರಂ.

೫. ರಾಜಾ’ನುಧಾವಿ ಸೋಧಿಂ, ಥೇರಾನಂ ಸನ್ತಿಕಂ ಗತೋ;

ಥೇರೇ ದಿಟ್ಠೇ ನರಿನ್ದೇನ, ಸಯಮನ್ತರಧಾಯಿಸೋ.

೬. ಥೇರೋ ‘‘ಬಹೂಸು ದಿಟ್ಠೇಸು, ಅತಿಭಾಯಿಸ್ಸತೀ’’ ತಿಸೋ;

ಅತ್ತಾನಮೇವ ದಸ್ಸೇಸಿ, ಪಸ್ಸಿತ್ವಾ ತಂ ಮಹೀಪತಿಂ.

೭. ಭೀತೋ ಅಟ್ಠಾಸಿ ತಂ ಥೇರೋ, ‘‘ಏಹಿ ತಿಸ್ಸಾತಿ ಅಬ್ರವಿ;

ತಿಸ್ಸಾ’ತಿ ವಚನೇನೇವ, ರಾಜಾ ಯಕ್ಖೋ’’ತಿ ಚಿನ್ತಯೀ.

೮. ಸಮಣಾ ಮಯಂ ಮಹಾರಾಜ, ಧಮ್ಮರಾಜಸ್ಸ ಸಾವಕಾ;

ತಮೇವ ಅನುಕಮ್ಪಾಯ, ಜಮ್ಬುದೀಪಾ ಇಧಾಗತಾ.

೯. ಇಚ್ಚಾಹ ಥೇರೋ ತಂ ಸುತ್ವಾ, ರಾಜಾ ವೀತಭಯೋ ಅಹು;

ಸರಿತ್ವಾ ಸಖೀಸನ್ದೇಸಂ, ‘‘ಸಮಾಣಾ’’ ಇತಿ ನಿಚ್ಛಿತೋ.

೧೦. ಧನುಂ ಸರಞ್ಚ ನಿಕ್ಖಿಪ್ಪ, ಉಪಸಙ್ಕಮ್ಮ ತಂ ಇಸಿಂ;

ಸಮ್ಮೋದಮಾನೋ ಥೇರೇನ, ಸೋ ನಿಸೀದಿ ತದನ್ತಿಕೇ.

೧೧. ತದಾ ತಸ್ಸ ಮನುಸ್ಸಾ ತೇ, ಆಗಮ್ಮ ಪರಿವಾರಯುಂ;

ತದಾ ಸೇಸೇ ಛ ದಸ್ಸೇಸಿ, ಮಹಾಥೇರೋ ಸಹಾಗತೇ.

೧೨. ತೇ ದಿಸ್ವಾ ಅಬ್ರವೀ ರಾಜಾ, ‘‘ಕದಾ’’ ಮೇ ಆಗತಾ ಇತಿ;

‘‘ಮಯಾ ಸದ್ಧಿಂ’’ತಿ ಥೇರೇನ, ವುತ್ತೇ ಪುಚ್ಛಿ ಇದಂ ಪುನ.

೧೩. ‘‘ಸನ್ತಿ ಈದಿಸಕಾ ಅಞ್ಞೇ, ಜಮ್ಬುದೀಪೇ ಯತೀ’’ ಇತಿ;

ಆಹ ‘‘ಕಾಸಾವಪಜ್ಜೋ ತೋ, ಜಮ್ಬುದೀಪೋ ತಹಿಂ ಪನ.

೧೪. ತೇವಿಜ್ಜಾ ಇದ್ಧಿಪ್ಪತ್ತಾ ಚ, ಚೇತೋಪರಿಯಕೋವಿದಾ;

‘‘ದಿಬ್ಬಸೋತಾ’ರಹನ್ತೋ ಚ, ಬಹೂ ಬುದ್ಧಸ್ಸ ಸಾವಕಾ’’.

೧೫. ಪುಚ್ಛಿ ‘‘ಕೇನಾಗತತ್ಥಾ’’ತಿ, ನ ಥಲೇನ ನ ವಾರಿನಾ;

ಆಗತಮ್ಹಾ’’ತಿ ವುತ್ತೇ ಸೋ, ವಿಜಾನಿ ನಭಸಾಗಮಂ.

೧೬. ವೀಮಂಸಂಸೋ ಮಹಾಪಞ್ಞೋ, ಕಣ್ಹಂ ಪಞ್ಹಮಪುಚ್ಛಿತಂ;

ಪುಟ್ಠೋ ಪುಟ್ಠೋ ವಿಯಾಕಾಸಿ, ತಂತಂ ಪಞ್ಹಂ ಮಹೀಪತಿ.

೧೭. ರುಕ್ಖೋಯಂ ರಾಜಕಿನ್ನಾಮೋ, ಅಞ್ಞೋ ನಾಮ ಅಯಂ ತರು;

ಇಮಂ ಮುಞ್ಚಿಯ ಅತ್ಥ’ಮ್ಬೋ, ಸನ್ತಿ ಅಮ್ಬತರೂ ಬಹುಂ.

೧೮. ಇಮಞ್ಚ ಅಮ್ಬಂ ತೇಚ’ಮ್ಬೇ, ಮುಞ್ಚಿಯತ್ಥಿ ಮಹೀರುಹಾ;

ಸನ್ತಿ ಭನ್ತೇ ಬಹು ರುಕ್ಖಾ, ಅನಮ್ಬಾಪನ ತೇ ತರು.

೧೯. ಅಞ್ಞೇ ಅಮ್ಬೇ ಅನಮ್ಬೇ ಚ, ಮುಞ್ಚಿಯ’ತ್ಥಿ ಮಹೀರುಹಾ;

ಅಯಂ ಭನ್ತೇ ಅಮ್ಬರುಕ್ಖೋ, ಪಣ್ಡಿತೋ’ಸಿ ನರಿಸ್ಸರ.

೨೦. ಸನ್ತಿ ತೇ ಞಾತಕಾ ರಾಜ, ಸನ್ತಿ ಭನ್ತೇ ಬಹುಜ್ಜನಾ;

ಸನ್ತಿ ಅಞ್ಞಾತಕಾ ರಾಜ, ಸನ್ತಿ ತೇ ಞಾತಿತೋ ಬಹೂ.

೨೧. ಞಾತಕೇ ತೇ ಚ ಅಞ್ಞೇ ಚ, ಮುಞ್ಚಿಯ’ಞ್ಞೋಪಿ ಅತ್ಥಿ ನು;

‘‘ಭನ್ತೇ’’ ಹಮೇವ ಸಾಧು ತ್ವಂ, ಪಣ್ಡಿತೋ’ಸಿ ನರಿಸ್ಸರ.

೨೨. ಪಣ್ಡಿತೋ’ತಿ ವಿದಿತ್ವಾನ, ಚೂಳಹತ್ಥಿಪದೋಪಮಂ;

ಸುತ್ತನ್ತಂ ದೇಸಯೀ ಥೇರೋ, ಮಹೀಪಸ್ಸ ಮಹಾಮತೀ.

೨೩. ದೇಸನಾಪರಿಯೋಸಾನೇ, ಸದ್ಧಿಂ ತೇಹಿ ನರೇಹಿ ಸೋ;

ಚತ್ತಾಲೀಸಸಹಸ್ಸೇಹಿ, ಸರಣೇಸು ಪತಿಟ್ಠಹಿ.

೨೪. ಭತ್ತಾ’ಭೀಹಾರಂ ಸಾಯನ್ಹೇ, ರಞ್ಞೋ ಅಭಿಹರುಂ ತದಾ;

‘‘ನ ಭುಞ್ಜಿಸ್ಸ’’ನ್ತಿ ದಾನಿ ಮೇ, ಇತಿ ಜನಮ್ಮಿ ಭೂಪತಿ.

೨೫. ಪುಚ್ಛಿತುಂಯೇವ ಯುತ್ತನ್ತಿ, ಭತ್ತೇನಾ’ಪುಚ್ಛಿತೇ ಇಸಿ;

ನ ಭುಞ್ಜಾಮ ಇದಾನೀ’ತಿ, ವುತ್ತೇ ಕಾಲಞ್ಚ ಪುಚ್ಛಿಸೋ.

೨೬. ಕಾಲಂ ವುತ್ತೇ’ಬ್ರವಿ ಏವಂ, ‘‘ಗಚ್ಛಾಮ ನಗರಂ’’ಇತಿ;

ತುವಂ ಗಚ್ಛ ಮಹಾರಾಜ, ವಸಿಸ್ಸಾಮ ಮಯಂ ಇಧ.

೨೭. ಏವಂ ಸತಿ ಕುಮಾರೋ’ಯಂ, ಅಮ್ಹೇಹಿ ಸಹ ಗಚ್ಛತು;

ಅಯಞ್ಹಿ ಆಗತಫಲೋ, ರಾಜ ವಿಞ್ಞಾತಸಾಸನೋ.

೨೮. ಅಪೇಕ್ಖಮಾನೋ ಪಬ್ಬಜ್ಜಂ, ವಸತ’ಮ್ಹಾಕಮನ್ತಿಕೇ;

ಇದಾನಿ ಪಬ್ಬಜೇಸ್ಸಾಮ, ಇಮಂ ತ್ವಂ ಗಚ್ಛ ಭೂಮಿಪ.

೨೯. ಪಾತೋ ರಥಂ ಪೇಸಯಿಸ್ಸಂ, ತುಮ್ಹೇ ತತ್ಥ ಠಿತಾ ಪುರಂ;

ಯಾಥಾ’ತಿ ಥೇರೇ ವನ್ದಿತ್ವಾ, ಭಣ್ಡುಂನೇತ್ವ’ಕ ಮನ್ತಕಂ.

೩೦. ಪುಚ್ಛಿ ಥೇರಾಧಿಕಾರಂಸೋ, ರಞ್ಞೋ ಸಬ್ಬಮಭಾಸಿ ಸೋ;

ಥೇರಂ ಞತ್ವಾ’ತಿ ತುಟ್ಠೋಸೋ, ‘‘ಲಾಭಾ ಮೇ’’ಇತಿ ಚಿನ್ತಯಿ.

೩೧. ಭಣ್ಡುಸ್ಸ ಗೀಹಿಭಾವೇನ, ಗತಾಸಙ್ಕೋ ನರಿಸ್ಸರೋ;

ಅಞ್ಞಾಸಿ ನರಭಾವಂ ಸೋ, ‘‘ಪಬ್ಬಾಜೇಮ ಇಮಂ’’ ಇತಿ.

೩೨. ಥೇರೋ ತಂ ಗಾಮಸೀಮಾಯಂ, ತಸ್ಮಿಂಯೇವ ಖಣೇ ಅಕಾ;

ಭಣ್ಡುಕಸ್ಸ ಕುಮಾರಸ್ಸ, ಪಬ್ಬಜ್ಜಮುಪಸಮ್ಪದಂ.

೩೩. ತಸ್ಮಿಂಯೇವ ಖಣೇ ಸೋ ಚ, ಅರಹತ್ತಮಪಾಪುಣಿ;

ಸುಮನಂ ಸಾಮಣೇರಂ ತಂ, ಥೇರೋ ಆಮನ್ತಯೀ ತತೋ.

೩೪. ಧಮ್ಮಸವನಕಾಲಂ ತ್ವಂ, ಘೋಸೇಹೀ’’ತಿ ಅಪುಚ್ಛಿಸೋ;

ಸಾವೇನ್ತೋ ಕಿತ್ತಕಂ ಠಾನಂ, ಭನ್ತೇ ಘೋಸೇಮ’ಹಂ ಇತಿ.

೩೫. ‘‘ಸಕಲಂ ತಮ್ಬಪಣ್ಣೀ’’ತಿ, ವುತ್ತೇ ಥೇರೇನ ಇದ್ಧಿಯಾ;

ಸಾವೇನ್ತೋ ಸಕಲಂ ಲಂಕಂ, ಧಮ್ಮಕಾಲಮಘೋಸಯೀ.

೩೬. ರಾಜಾ ನಾಗಚತುತ್ತೇಸೋ, ಸೋಣ್ಣಿಪಸ್ಸೇ ನಿಸೀದಿಯ;

ಭುಞ್ಜನ್ತೋ ತಂ ರವಂ ಸುತ್ವಾ, ಥೇರನ್ತಿಕ ಮಪೇಸಯಿ.

೩೭. ‘‘ಉಪದ್ದವೋ ನು ಅತ್ಥೀ’’ತಿ, ಆಹ ನತ್ಥಿ ಉದ್ದವೋ;

ಸೋತುಂ ಸಮ್ಬುದ್ಧವಚನಂ, ಕಾಲೋ ಘೋಸಾಪಿತೋ ಇತಿ.

೩೮. ಸಾಮಣೇರ ರವಂ ಸುತ್ವಾ, ಭುಮ್ಮಾದೇವಾ ಅಘೋಸಯುಂ;

ಅನುಕ್ಕಮೇನ ಸೋ ಸದ್ದೋ, ಬ್ರಹ್ಮಲೋಕಂ ಸಮಾರುಹಿ.

೩೯. ತೇನ ಘೋಸೇನ ದೇವಾನಂ, ಸನ್ನಿಪಾತೋ ಮಹಾ ಅಹು;

ಸಮಚಿತ್ತಸುತ್ತಂ ದೇಸೇಸಿ, ಥೇರೋ ತಸ್ಮಿಂ ಸಮಾಗಮೇ.

೪೦. ಅಸಂಖಿಯಾನಂ ದೇವಾನಂ, ಧಮ್ಮಾಭಿಸಮಯೋ ಅಹು;

ಬಹೂ ನಾಗಾ ಸುಪಣ್ಣಾ ಚ, ಸರಣೇಸು ಪತಿಟ್ಠಯುಂ.

೪೧. ಯಥೇದಂ ಸಾರಿಪುತ್ತಸ್ಸ, ಸುತ್ತಂ ಥೇರಸ್ಸ ಭಾಸತೋ;

ತಥಾ ಮಹಿನ್ದತ್ಥೇರಸ್ಸ, ಅಹು ದೇವಸಮಾಗಮೋ.

೪೨. ರಾಜಾ ಪಭಾ ತೇ ಪಾಹೇಸಿ, ರಥಂ ಸಾರಥಿ ಸೋ ಗತೋ;

‘‘ಆರೋಹಥ ರಥಂ ಯಾಮ, ನಗರಂ’’ ಇತಿ ತೇ’ಬ್ರವಿ.

೪೩. ನಾ’ರೋಹಾಮ ರಥಂ ಗಚ್ಛ, ಗಚ್ಛಾಮ ತವ ಪಚ್ಛತೋ;

ಇತಿ ವತ್ವಾನ ಪೇಸೇತ್ವಾ, ಸಾರಥಿಂ ಸುಮನೋರಥಂ.

೪೪. ವೇಹಾಸಮಬ್ಭುಗನ್ತ್ವಾ, ತೇ ನಗರಸ್ಸ ಪುರತ್ಥತೋ;

ಪಠಮತ್ಥೂಪಟ್ಠಾನಮ್ಹಿ, ಓತರಿಂಸು ಮಹಿದ್ಧಿಕಾ.

೪೫. ಥೇರೇಹಿ ಪಠಮೋತಿಣ್ಣ-ಠಾನಮ್ಹಿ ಕತಚೇತಿಯಂ;

ಅಜ್ಜಾಪಿ ವುಚ್ಚತೇ ತೇನ, ಏವಂ ಪಠಮಚೇತಿಯಂ.

೪೬. ರಞ್ಞಾ ಥೇರಗುಣಂ ಸುತ್ವಾ, ಸಬ್ಬಾ ಅನ್ತೇಪುರಿತ್ಥಿಯೋ;

ಥೇರದಸ್ಸನಮಿಚ್ಛಿಂಸು, ಯಸ್ಮಾ ತಸ್ಮಾಮಹೀಪತಿ.

೪೭. ಅನ್ತೋ’ವ ರಾಜವತ್ಥುಸ್ಸ, ರಮ್ಮಂ ಕಾರೇಸಿ ಮಣ್ಡಪಂ;

ಸೇತೇಹಿ ವತ್ಥಪುಪ್ಫೇಹಿ, ಛಾದಿತಂ ಸಮಲಙ್ಕತಂ.

೪೮. ಉಚ್ಚಸೇಯ್ಯಾವಿರಮಣಂ, ಸುತತ್ತಾ ಥೇರಸನ್ತಿಕೇ;

ಕಙ್ಖೀ ‘‘ಉಚ್ಚಾಸನೇ ಥೇರೋ, ನಿಸೀದಿದೇಯ್ಯನುನೋತಿ ಚ.

೪೯. ತದನ್ತರೇ ಸಾರಥಿ ಸೋ, ಥೇರೇ ದಿಸ್ವಾ ತಹಿಂ ಠಿತೇ;

ಚೀವರಂ ಪಾರುಪನ್ತೇ ತೇ, ಅತಿವಿಮ್ಹಿತ ಮಾನಸೋ.

೫೦. ಗನ್ತ್ವಾ ರಞ್ಞೋ ನಿವೇದೇಸಿ, ಸುತ್ವಾ ಸಬ್ಬಂ ಮಹೀಮತಿ;

‘‘ನಿಸಜ್ಜಂ ನ ಕರಿಸ್ಸನ್ತಿ, ಪೀಠಕೇಸೂ’’ತಿ ನಿಚ್ಛಿತೋ.

೫೧. ‘‘ಸುಸಾಧು ಭುಮ್ಮತ್ಥರಣಂ, ಪಞ್ಞಾಪೇಥಾ’’ತಿ ಭಾಸಿಯ;

ಗನ್ತ್ವಾ ಪಟಿಪಥಂ ಥೇರೇ, ಸಕ್ಕಚ್ಚಂ ಅಭಿವಾದಿಯ.

೫೨. ಮಹಾಮಹಿನ್ದತ್ಥೇರಸ್ಸ, ಹತ್ಥತೋ ಪತ್ತಮಾದಿಯ;

ಸಕ್ಕಾರಪೂಜಾವಿಧಿನಾ, ಪುರಂ ಥೇರಂ ಪವೇಸಯಿ.

೫೩. ದಿಸ್ವಾ ಆಸನಪಞ್ಞತ್ತಿಂ, ನೇಮಿತ್ತಾ ಬ್ಯಾಕರುಂ ಇತಿ;

‘‘ಗಹಿತಾ ಪಥವೀ’ಮೇಹಿ, ದೀಪೇ ಹೇಸ್ಸನ್ತಿ ಇಸ್ಸರಾ.

೫೪. ನರಿನ್ದೋ ಪೂಜಯನ್ತೋ ತೇ, ಥೇರೇ ಅನ್ತೇಪುರಂ ನಯಿ;

ತತ್ಥ ತೇ ದುಸ್ಸಪೀಠೇಸುಂ, ನಿಸೀದಿಂಸು ಯಥಾರಹಂ.

೫೫. ತೇ ಯಾಗುಖಜ್ಜಭೋಜ್ಜೇಹಿ, ಸಯಂ ರಾಜಾ ಅತಪ್ಪಯಿ;

ನಿಟ್ಠಿತೇ ಭತ್ತಕಿಚ್ಚಮ್ಹಿ, ಸಯಂ ಉಪನಿಸೀದಿಯ.

೫೬. ಕನಿಟ್ಠಸ್ಸೋಪರಾಜಸ್ಸ, ಮಹಾನಾಗಸ್ಸ ಜಾಯಿಕಂ;

ವಸನ್ತಿಂ ರಾಜಗೇಹೇ’ವ, ಪಕ್ಕೋಸಾ ಪೇಸಿಚಾ’ನುಲಂ.

೫೭. ಆಗಮ್ಮ ಅನುಲಾದೇವೀ, ಪಞ್ಚ ಇತ್ಥಿಸತೇಹಿ ಸಾ;

ಥೇರೇವನ್ದಿಯ ಪೂಜೇತ್ವಾ, ಏಕಮನ್ತಮುಪಾವಿಸಿ.

೫೮. ಪೇತವತ್ಥುಂ ವಿಮಾನಞ್ಚ, ಸಚ್ಚಸಂಯುತ್ತಮೇವ ಚ;

ದೇಸೇಸಿ ಥೇರೋ ತಾ ಇತ್ಥೀ, ಪಠಮಂ ಫಲಮಜ್ಝಗುಂ.

೫೯. ಹಿಯ್ಯೋ ದಿಟ್ಠಮನುಸ್ಸೇಹಿ, ಸುತ್ವಾ ಥೇರಗುಣೇ ಬಹೂ;

ಥೇರದಸ್ಸನಮಿಚ್ಛನ್ತಾ, ಸಮಾಗನ್ತ್ವಾನ ನಾಗರಾ.

೬೦. ರಾಜದ್ವಾರೇ ಮಹಾಸದ್ದಂ, ಅಕರುಂ ತಂ ಮಹೀಪತಿ;

ಸುತ್ವಾ ಪುಚ್ಛಿಯ ಜಾನಿತ್ವಾ, ಆಹ ತೇಸಂ ಹಿತತ್ಥಿಕೋ.

೬೧. ಸಬ್ಬೇಸಂ ಇಧ ಸಮ್ಬಾಧೋ, ಸಾಲಾಮಙ್ಗಲಹತ್ಥಿನೋ;

ಸೋಧೇಥ ತತ್ಥ ದಕ್ಖನ್ತಿ, ಥೇರೇ’ಮೇ ನಾಗರಾ’ಇತಿ.

೬೨. ಸೋಧೇತ್ವಾ ಹತ್ಥಿಸಾಲಂ ತಂ, ವಿತಾನಾದೀಹಿ ಸಜ್ಜುಕಂ;

ಅಲಙ್ಕರಿತ್ವಾ ಸಯನೇ, ಪಞ್ಞಪೇಸುಂ ಯಥಾರಹಂ.

೬೩. ಸಥೇರೋ ತತ್ಥ ಗನ್ತ್ವಾನ, ಮಹಾಥೇರೋ ನಿಸೀದಿಯ;

ಸೋ ದೇವದೂತಸುತ್ತನ್ತಂ, ಕಥೇಸೀ ಕಥಿಕೋ ಮಹಾ.

೬೪. ತಂ ಸುತ್ವಾನ ಪಸೀದಿಂಸು, ನಗರಾ ತೇ ಸಮಾಗತಾ;

ತೇಸು ಪಾಣಸಹಸ್ಸಂತು, ಪಠಮಂ ಫಲಮಜ್ಝಗಾ.

೬೫. ಲಂಕಾದೀಪೇ ಸೋ ಸತ್ಥುಕಪ್ಪೋ ಅಕಪ್ಪೋ;

ಲಂಕಾಧಿಟ್ಠಾನೇ ದ್ವೀಸು ಠಾನೇಸು ಥೇರೋ;

ಧಮ್ಮಂ ಭಾಸಿತ್ವಾ ದೀಪಭಾಸಾಯ ಏವಂ;

ಸದ್ಧಮ್ಮೋ ತಾರಂ ಕಾರಯೀ ದೀಪದೀಪೋತಿ.

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ನಗರಪ್ಪವೇಸನೋ ನಾಮ

ಚುದ್ದಸಮೋ ಪರಿಚ್ಛೇದೋ.