ಏಕಾದಸಮ ಪರಿಚ್ಛೇದ

ದೇವಾನಂಪಿಯತಿಸ್ಸಾಭಿಸೇಕೋ

೧. ತಸ್ಸಚ್ಚಯೇ ತಸ್ಸ ಸುತೋ, ಮುಟಸಿವೋ’ತಿ ವಿಸ್ಸುತೋ;

ಸುವಣ್ಣಪಾಲಿಯಾ ಪುತ್ತೋ, ಪತ್ತೋ ರಜ್ಜಮನಾಕುಲಂ.

೨. ಮಹಾಮೇಘವನುಯ್ಯಾನಂ, ನಾಮನುಗಗುಣೋದಿತಂ;

ಫಲಪುಪ್ಫತರುಪೇತಂ, ಸೋ ರಾಜಾ ಕಾರಯಿ ಸುಭಂ.

೩. ಉಯ್ಯಾನಠಾನಗ್ಗಹಣೇ, ಮಹಾಮೇಘೋ ಅಕಾಲಜೋ;

ಪಾವಸ್ಸಿತೇನ ಉಯ್ಯಾನಂ, ಮಹಾಮೇಘವನಂ ಅಹು.

೪. ಸಟ್ಠಿವಸ್ಸಾನಿ ಮುಟಸಿವೋ, ರಾಜಾ ರಾಜ್ಜಮಕಾರಯಿ;

ಅನುರಾಧೇ ಪುರವರೇ, ಲಂಕಾ ಭುವದನೇ ಸುಭೇ.

೫. ತಸ್ಸ ಪುತ್ತಾ ದಸಾ’ಹೇಸುಂ, ಅಞ್ಞಮಞ್ಞಹಿತೇಸಿನೋ;

ದುವೇ ಧೀತಾ ಚಾ’ನುಕುಲಾ, ಕುಲಾನುಚ್ಛವಿಕಾ ಅಹೂ.

೬. ದೇವಾನಂ ಪಿಯತಿಸ್ಸೋತಿ, ವಿಸ್ಸುತೋ ದುತಿಯೋ ಸುತೋ;

ತೇಸು ಭಾತೂಸು ಸಬ್ಬೇಸು, ಪುಞ್ಞಾಪಞ್ಞಾಧಿಕೋ ಅಹು.

೭. ದೇವಾನಂ ಪಿಯತಿಸ್ಸೋ ಸೋ, ರಾಜಾ’ಸಿ ಪಿತುಅಚ್ಚಯೇ;

ತಸ್ಸಾ’ಭಿಸೇಕೇನ ಸಮಂ, ಬಹೂನ’ಚ್ಛರಿಯಾನ’ಹುಂ.

೮. ಲಂಕಾದೀಪಮ್ಹಿ ಸಕಲೇ, ನಿಧಯೋ ರತನಾನಿ ಚ;

ಅನ್ತೋಠಿತಾನಿ ಉಗ್ಗನ್ತ್ವಾ, ಪಥವೀತಲಮಾರುಹುಂ.

೯. ಲಂಕಾದೀಪಸಮೀಪಮ್ಹಿ, ಭಿನ್ನನಾವಾಗತಾನಿ ಚ;

ತತ್ರಜಾತಾನಿ ಚ ಥಲಂ, ರತನಾನಿ ಸಮಾರುಹುಂ.

೧೦. ಛಾತಪಬ್ಬತಪಾದಮ್ಹಿ, ತಿಸ್ಸೋ ಚ ವೇಳುಯಟ್ಠಿಯೋ;

ಜಾತಾರಥಪತೋದೇನ, ಸಮಾನಾ ಪರಿಮಾಣತೋ.

೧೧. ತಾಸು ಏಕಾಲತಾಯಟ್ಠಿ, ರಜತಾ’ಭಾ ತಹಿಂ ಲತಾ;

ಸುವಣ್ಣಾವಣ್ಣಾರುಚಿರಾ, ದಿಸ್ಸನ್ತೇತಾ ಮನೋರಮಾ.

೧೨. ಏಕಾ ಕುಸುಮಾ ಯಟ್ಠೀತು, ಕುಸುಮಾನಿ ತಹಿಂ ಪನ;

ನಾನಾನಿ ನಾನಾವಣ್ಣಾನಿ, ದಿಸ್ಸನ್ತೇ’ತಿ ಫುಟಾನಿ ಚ.

೧೩. ಏಕಾಸಕುಣಯಟ್ಠಿತು, ತಹಿಂ ಪಕ್ಖಿಮಿಗಾ ಬಹೂ;

ನಾನಾ ಚ ನಾನಾವಣ್ಣಾ ಚ, ಸಜೀವಾ ವಿಯ ದಿಸ್ಸರೇ.

೧೪. ಭಯಗಜರಥಾಮಲಕಾ, ವಲಯಙ್ಗುಲಿವೇಠಕಾ;

ಕಕುಧಫಲಾಪಾಕತಿಕಾ, ಇಚ್ಚೇತಾ ಅಟ್ಠಜಾತಿಯೋ.

೧೫. ಮುತ್ತಾಸಮುದಾ ಉಗ್ಗನ್ತ್ವಾ, ತೀರೇ ವಟ್ಟಿ ವಿಯ ಠಿತಾ;

ದೇವಾನಂ ಪಿಯತಿಸ್ಸಸ್ಸ, ಸಬ್ಬಂ ಪುಞ್ಞವಿಜಮ್ಭಿತಂ.

೧೬. ಇನ್ದನೀಲಂ ವೇಳುರಿಯಂ, ಲೋಹಿತಙ್ಕಮಣಿಧಿ’ಮೇ;

ರಜತಾನಿ ಪನೇ’ತಾನಿ, ಮುತ್ತಾ ತಾ ತಾವಯಟ್ಠಿಯೋ.

೧೭. ಸತ್ತಹಬ್ಭನ್ತರೇಯೇವ, ರಞ್ಞೋ ಸನ್ತಿಕಮಾಹರುಂ;

ತಾನಿ ದಿಸ್ವಾ ಪತೀತೋ ಸೋ, ರಾಜಾ ಇತಿ ವಿಚಿನ್ತಯಿ.

೧೮. ರತನಾನಿ ಅನಗ್ಘಾನಿ, ಧಮ್ಮಾಸೋಕೋ ಇಮಾನಿಮೇ;

ಸಹಾಯೋ’ರಹತೇನಾ’ಞ್ಞೋ, ತಸ್ಸ ದಸ್ಸಂ ಇಮಾನ’ತೋ.

೧೯. ದೇವಾನಂ ಪಿಯತಿಸ್ಸೋ ಚ, ಧಮ್ಮಾಸೋಕೋ ಚ ತೇ ಇಮೇ;

ದ್ವೇ ಅದಿಟ್ಠಸಹಾಯಾಹಿ, ಚಿರಪ್ಪಭುತಿ ಭೂಪತಿ.

೨೦. ಭಾಗಿನೇಯ್ಯಂ ಮಹಾರಿಟ್ಠಂ, ಅಮಚ್ಚಂ ಪಮುಖಂ ತತೋ;

ದಿಜಂ ಅಮಚ್ಚಂ ಗಣತಂ, ರಾಜಾ ತೇ ಚತುರೋ ಜನೇ.

೨೧. ದೂತೋ ಕತ್ವಾನ ಪಾಹೇಸಿ, ಬಲೋಘಪರಿವಾರಿತೇ;

ಗಾಹಾ ಪೇತ್ವಾ ಅನಗ್ಘಾನಿ, ರತನಾನಿ ಇಮಾನಿ ಸೋ.

೨೨. ಮಣಿಜಾತೀ ಚ ತಿಸ್ಸೋ ತಾ, ತಿಸ್ಸೋ ಚ ರಥಯಟ್ಠಿಯೋ;

ಸಙ್ಖಞ್ಚ ದಕ್ಖಿಣಾವತ್ತಂ, ಮುತ್ತಾ ಜಾತೀ ಚ ಅಟ್ಠ ತಾ.

೨೩. ಆರುಯ್ಹ ಜಮ್ಬುಕೋಲಮ್ಹಿ, ನಾವಂ ಸತ್ತದಿನೇನ ತೇ;

ಸುಖೇನ ತಿತ್ಥಂ ಲದ್ಧಾನ, ಸತ್ತಾಹೇನ ತತೋ ಪುನ.

೨೪. ಪಾಟಲಿಪುತ್ತಂ ಗನ್ತ್ವಾನ, ಧಮ್ಮಾಸೋಕಸ್ಸ ರಾಜಿನೋ;

ಅದಂಸು ಪಣ್ಣಾಕಾರೇತೇ, ದಿಸ್ವಾ ತಾನಿ ಪಸೀದಿ ಸೋ.

೨೫. ರತನಾನಿ’ದಿಸಾನೇತ್ಥ, ನತ್ಥಿ ಮೇ ಇತಿ ಚಿನ್ತಿಯ;

ಅದಾ ಸೇನಾಪತಿಟ್ಠಾನಂ, ತುಟ್ಠೋ’ರಿಟ್ಠಸ್ಸ ಭೂಪತಿ.

೨೬. ಪೋರೋಹಿಚ್ಚಬ್ರಾಹ್ಮಣಸ್ಸ, ದಣ್ಡನಾಯತಂ ಪನ;

ಅದಾಸಿ ತಸ್ಸಾ’ಮಚ್ಚಸ್ಸ, ಸೇಟ್ಠಿತ್ತಂ ಗಣಕಸ್ಸ ತು.

೨೭. ತೇಸಂ ಅನಪ್ಪಕೇ ಭೋಗೇ, ದತ್ವಾ ವಾಸಘರಾನಿ ಚ;

ಮಹಾಮಚ್ಚೇಹಿ ಮನ್ತೇನ್ತೋ, ಪಸ್ಸಿತ್ವಾ ಪಟಿಪಾಭತಂ.

೨೮. ವಾಲಬೀಜನೀ ಮುಣ್ಹಿಸಂ, ಖಗ್ಗಂ ಛತ್ತಞ್ಚ ಪಾದುಕಂ;

ಮೋಳಿಂ ವತಂ ಸಪಾಮಙ್ಗಂ, ಭಿಙ್ಕಾರಂ ಹರಿಚನ್ದನಂ.

೨೯. ಅಧೋವಿಮಂ ವತ್ಥಕೋಟಿಂ, ಮಹಗ್ಘಂ ಹತ್ಥಪುಞ್ಛನಿಂ;

ನಾಗಾ’ಹಟಂ ಅಞ್ಜನಞ್ಚ, ಅರುಣಾಭಞ್ಚ ಮತ್ತಿಕಂ.

೩೦. ಅನೋತತ್ತೋದಕಞ್ಚೇವ, ಗಙ್ಗಾಸಲಿಲಮೇವ ಚ;

ಸಙ್ಖಞ್ಚ ನನ್ದಿಯಾವಟ್ಟಂ, ವಡ್ಢಮಾನಂ ಕುಮಾರಿಕಂ.

೩೧. ಹೇಮಭೋಜನಕಣ್ಡಞ್ಚ, ಸಿವಿಕಞ್ಚ ಮಹಾರಹಂ;

ಹರೀಟಕಂ ಆಮಲಕಂ, ಮಹಗ್ಘಂ ಅಮತೋಸಧಂ.

೩೨. ಸುಕಾಹಟಾನಂ ಸಾಲೀನಂ, ಸಟ್ಠಿವಾಹಸತಾನಿ ಚ;

ಅಭಿಸೇಕೋ ಪಕರಣಂ, ಪರಿವಾರವಿಸೇಸಿತಂ.

೩೩. ದತ್ವಾ ಕಾಲೇ ಭಹಾಯಸ್ಸ, ಪಣ್ಣಾಕಾರೇ ನರಿಸ್ಸರೋ;

ದೂತೇ ಪಾಹೇಸಿಸದ್ಧಮ್ಮ-ಪಣ್ಣಾಕಾರಮಿಮಮ್ಪಿಚ.

೩೪. ಅಹಂ ಬುದ್ಧಞ್ಚ ಧಮ್ಮಞ್ಚ, ಸಙ್ಘಞ್ಚ ಸರಣಂ ಗತೋ;

ಉಪಾಸಕತ್ತಂ ದೇಸೇಸಿಂ, ಸಕ್ಯಪುತ್ತಸ್ಸ ಸಾಸನೇ.

೩೫. ತ್ವಮ್ಪಿಮಾನಿ ರತನಾನಿ, ಉತ್ತಮಾನಿ ನರುತ್ತಮ;

ಚಿತ್ತಂ ಪಸಾದಯಿತ್ವಾನ, ಸದ್ಧಾಯ ಸರಣಂ ವಜ.

೩೬. ‘‘ಕರೋಥ ಮೇ ಸಹಾಯಸ್ಸ, ಅಭಿಸೇಕಂ ಪುನೋ’’ ಇತಿ;

ವತ್ವಾ ಸಹಯಾ’ಮಚ್ಚೇತೇ, ಸಕ್ಕರಿತ್ವಾ ಚ ಪೇಸಯಿ.

೩೭. ಪಞ್ಚಮಾಸೇ ವಸಿತ್ವಾನ, ತೇ ಮಚ್ಚಾ’ತಿವಸಕ್ಕತಾ;

ವೇಸಾಖಸುಕ್ಖಪಕ್ಖಾದಿ-ದಿನೇ ದೂತಾ ವಿನಿಗ್ಗತಾ.

೩೮. ತಾಮಲಿತ್ತಿಯಮಾರುಯ್ಹ, ನಾವಂ ತೇಜಮ್ಬುಕೋಲಕೇ;

ಓರುಯ್ಹ ಕೂಪಂ ಪಸ್ಸಿಂಸು, ಪತ್ವಾ ದ್ವಾದಸಿಯಂ ಇಧ.

೩೯. ಅದಂಸು ಪಣ್ಣಾಕಾರೇ ತೇ, ದೂತಾ ಲಂಕಾದೀಪಸ್ಸತೇ;

ತೇಸಂ ಮಹನ್ತಂ ಸಕ್ಕಾರಂ, ಲಂಕಾಪತಿ ಅಕಾರಯಿ.

೪೦. ತೇ ಮಗ್ಗಸಿರಮಾಸಸ್ಸ, ಆದಿಚನ್ದೋದಯೇಜಿನೇ;

ಅಭಿಸಿತ್ತಞ್ಚ ಲಂಕಿನ್ದಂ, ಅಮಚ್ಚಾ ಸಾಮಿಭತ್ತಿನೋ.

೪೧. ಧಮ್ಮಾಸೋಕಸ್ಸ ವಚನಂ, ವತ್ವಾ ಸಾಮಿ ಹಿತೇರತಾ;

ಪುನೋಪಿ ಅಭಿಸಿಞ್ಚಿಂಸು, ಲಂಕಾಹಿತಸುಖೇರತಂ.

೪೨. ವೇಸಾಖೇ ನರಪತಿ ಪುಣ್ಣಮಾಯಮೇವಂ;

ದೇವಾನಂ ಪಿಯವಚನೋ ಪಗೂಳನಾಮೋ;

ಲಂಕಾಯಂ ಪವೀತತಪೀತಿ ಉಸ್ಸವಾಯಂ;

ಅತ್ತಾನಂ ಜನಸುಖದೋ’ಭಿಸೇಚಯೀ ಸೋತಿ.

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ದೇವಾನಂಪಿಯತಿಸ್ಸಾಭಿಸೇಕೋನಾಮ

ಏಕಾದಸಮೋ ಪರಿಚ್ಛೇದೋ.