ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಬುದ್ಧಗುಣಗಾಥಾವಲೀ

ಯಥೇವ ಪುಪ್ಫರಾಸಿಮ್ಹಾ, ಗನ್ಥೇಯ್ಯ ಮಾಲಾ ಸೋಭನಾ;

ಏವಂ ಬುದ್ಧಗುಣಗಾಥಾ, ವಿರಚಿಂ ಸಹಸ್ಸಾಧಿಕಾ.

ಸೋಪಿ ಭಗವಾ ಅರಹಂ, ಸಮ್ಮಾಸಮ್ಬುದ್ಧೋ ಸಯಮ್ಭೂ;

ವಿಜ್ಜಾಚರಣಸಮ್ಪನ್ನೋ, ಬುದ್ಧಂ ತಂ ಪಣಮಾಮ್ಯಹಂ.೧.

ಪುರಿಸದಮ್ಮಸಾರಥೀ, ಲೋಕವಿದೂ ಅನುತ್ತರೋ;

ಸತ್ಥಾದೇವಮನುಸ್ಸಾನಂ, ಬುದ್ಧಂ ತಂ ಪಣಮಾಮ್ಯಹಂ.೨.

ಸುಗತೋ ಸುಗದೋ ಸಾಮೀ, ಸುಖದೋ ಸನ್ತಿಪದಾಯಕೋ;

ಸಬ್ಬಲೋಕಾನುಕಮ್ಪಕೋ, ಬುದ್ಧಂ ತಂ ಪಣಮಾಮ್ಯಹಂ.೩.

ವರೋ ವರಞ್ಞೂ ವರದೋ, ವರುತ್ತಮೋ ವರಾಹರೋ;

ವರಧಮ್ಮಂ ಅದೇಸಯಿ, ಬುದ್ಧಂ ತಂ ಪಣಮಾಮ್ಯಹಂ.೪.

ಮಹಾಮಙ್ಗಲಮಙ್ಗಲ್ಯೋ, ಮಙ್ಗಲೋ ಮಙ್ಗಲಾಲಯೋ;

ಮಙ್ಗಲಾಯತನೋ ನಾಥೋ, ಬುದ್ಧಂ ತಂ ಪಣಮಾಮ್ಯಹಂ.೫.

ಮಙ್ಗಲಿನ್ದೋ ಮಙ್ಗಲಿಕೋ, ಮಹಾಮಙ್ಗಲನಾಯಕೋ;

ಮಙ್ಗಲಧಮ್ಮಂ ದೇಸೇಸಿ, ಬುದ್ಧಂ ತಂ ಪಣಮಾಮ್ಯಹಂ.೬.

ಮಙ್ಗಲಗ್ಗೋ ಮಙ್ಗಲಞ್ಞೂ, ಮಙ್ಗಲತ್ಥಪದಾಯಕೋ;

ಮಙ್ಗಲಪನ್ಥದಸ್ಸಾವೀ, ಬುದ್ಧಂ ತಂ ಪಣಮಾಮ್ಯಹಂ.೭.

ಮಙ್ಗಲಿಚ್ಛೋ ಮಙ್ಗಲಿದ್ಧೋ, ಮಙ್ಗಲಮಭಿವದ್ಧನೋ;

ಮಙ್ಗಲೇಹಿ ಪರಿಪುಣ್ಣೋ, ಬುದ್ಧಂ ತಂ ಪಣಮಾಮ್ಯಹಂ.೮.

ಮಙ್ಗಲಾಭಾ ಉಜ್ಜೋತೇಸಿ, ಮಙ್ಗಲತ್ಥಪಭಾಕರೋ;

ಮಙ್ಗಲಾಲೋಕಮಣ್ಡಿತೋ, ಬುದ್ಧಂ ತಂ ಪಣಮಾಮ್ಯಹಂ.೯.

ಮಙ್ಗಲತ್ಥಮನುಪ್ಪತ್ತೋ, ಮಙ್ಗಲತ್ಥಪರಾಯಣೋ;

ಸಬ್ಬದಾ ಮಙ್ಗಲಕರೋ, ಬುದ್ಧಂ ತಂ ಪಣಮಾಮ್ಯಹಂ.೧೦.

ಮಙ್ಗಲಮಗ್ಗಮನ್ವೇಸಿ, ಪತ್ತೋ ಮಙ್ಗಲಮುತ್ತಮಂ;

ಮಙ್ಗಲಾಯನಂ ದಸ್ಸೇತಾ, ಬುದ್ಧಂ ತಂ ಪಣಮಾಮ್ಯಹಂ.೧೧.

ಮಙ್ಗಲಮಹಿಮಾಧಾರೀ, ಮಙ್ಗಲಕಾರೀ ನಾಯಕೋ;

ಸಬ್ಬಧಿ ಮಙ್ಗಲದಾತಾ, ಬುದ್ಧಂ ತಂ ಪಣಮಾಮ್ಯಹಂ.೧೨.

ಮಙ್ಗಲಸ್ಸ ಕೋವಿದೋ ಚ, ಅಮಙ್ಗಲಸ್ಸ ಕೋವಿದೋ;

ಪರಮಂ ಮಙ್ಗಲಂ ಲದ್ಧೋ, ಬುದ್ಧಂ ತಂ ಪಣಮಾಮ್ಯಹಂ.೧೩.

ಸಬ್ಬಮಙ್ಗಲಸಮ್ಪನ್ನೋ, ಮಙ್ಗಲಘೋಸಘೋಸಕೋ;

ಮಙ್ಗಲುತ್ತಮಂ ದೇಸೇಸಿ, ಬುದ್ಧಂ ತಂ ಪಣಮಾಮ್ಯಹಂ.೧೪.

ಮಹಾಮಙ್ಗಲತ್ಥಂ ಮಗ್ಗೀ, ಲದ್ಧೋ ಧಮ್ಮಸುಮಙ್ಗಲೋ;

ಮಙ್ಗಲ’ದ್ಧಾನಂ ಞಾಪೇಸಿ, ಬುದ್ಧಂ ತಂ ಪಣಮಾಮ್ಯಹಂ.೧೫.

ಅಗಾರಿಕತ್ಥಂ ಞಾಪೇಸಿ, ಮಹಾಮಙ್ಗಲಮುತ್ತಮಂ;

ಗಿಹೀ ಸಹಾಯಕೋ ಸಾಮೀ, ಬುದ್ಧಂ ತಂ ಪಣಮಾಮ್ಯಹಂ.೧೬.

ಮಹಾಮಙ್ಗಲ’ಲಙ್ಕಿತೋ, ಮಹಾಮಙ್ಗಲಭೂಸನೋ;

ಮಹಾಮಙ್ಗಲಸೇಖರೋ, ಬುದ್ಧಂ ತಂ ಪಣಮಾಮ್ಯಹಂ.೧೭.

ಮಹಾಮಙ್ಗಲಂಸುಮಾಲೀ, ಮಙ್ಗಲಾಭೋ ಸಮುಜ್ಜಲೋ;

ಮಙ್ಗಲಂಸುಂ ಉಜ್ಜೋತೇಸಿ, ಬುದ್ಧಂ ತಂ ಪಣಮಾಮ್ಯಹಂ.೧೮.

ಮಹಗ್ಘ ಮಙ್ಗಲೋದಧಿ, ಮಹನ್ತಮಙ್ಗಲಣ್ಣವೋ;

ಮಹಾಮಙ್ಗಲಸಾಗರೋ, ಬುದ್ಧಂ ತಂ ಪಣಮಾಮ್ಯಹಂ.೧೯.

ಅಮಙ್ಗಲನಿಸಾಹನ್ತಾ, ಮಙ್ಗಲಭಾನುಭಸ್ಸರೋ;

ಮಙ್ಗಲಾಲೋಕವಿಕಿಣ್ಣೋ, ಬುದ್ಧಂ ತಂ ಪಣಮಾಮ್ಯಹಂ.೨೦.

ಬಾಹುಸಚ್ಚೋ ಬುಜ್ಝನಕೋ, ಧಮ್ಮಚಕ್ಖುಉಪ್ಪಾದಕೋ;

ತಿಭವಮಙ್ಗಲಙ್ಕಾರೀ, ಬುದ್ಧಂ ತಂ ಪಣಮಾಮ್ಯಹಂ.೨೧.

ಮಹಾವತ್ತಾ ಪವತ್ತಾ ಚ, ಅತ್ಥಸ್ಸ ನಿನ್ನೇತಾ ಪಭೂ;

ಅಮತಸ್ಸ ದಾತಾ ವಿಞ್ಞೂ, ಬುದ್ಧಂ ತಂ ಪಣಮಾಮ್ಯಹಂ.೨೨.

ದಿವಾ ತಪತಿ ಆದಿಚ್ಚೋ, ರತ್ತಿಂ ದಿಪ್ಪತಿ ಚನ್ದಿಮಾ;

ರತ್ತಿಂದಿವಂ ತಪಿ ನಾಥೋ, ಬುದ್ಧಂ ತಂ ಪಣಮಾಮ್ಯಹಂ.೨೩.

ಸನ್ನದ್ಧೋ ಖತ್ತಿಯೋ ತಪತಿ, ಝಾಯೀ ತಪತಿ ಬ್ರಾಹ್ಮಣೋ;

ನಿರನ್ತರಂ ತಪಿ ನಾಥೋ, ಬುದ್ಧಂ ತಂ ಪಣಮಾಮ್ಯಹಂ.೨೪.

ದುಕ್ಖದೋಮನಸ್ಸನಾಸೀ, ಸೋಕಪರಿದೇವಕ್ಖಯೋ;

ಜಾತಿಮಚ್ಚುಜರಾತಿಗೋ, ಬುದ್ಧಂ ತಂ ಪಣಮಾಮ್ಯಹಂ.೨೫.

ಯಥಾವಾದೀ ತಥಾಕಾರೀ, ತಥವಾದೀ ತಥಾಗತೋ;

ಯಥಾಕಾರೀ ತಥಾವಾದೀ, ಬುದ್ಧಂ ತಂ ಪಣಮಾಮ್ಯಹಂ.೨೬.

ಭಗ್ಗರಾಗೋ ಭಗ್ಗದೋಸೋ, ಭಗ್ಗಮೋಹೋ ಸೋ ಭಗವಾ;

ಭಗ್ಗಮಾನೋ ಭಗ್ಗಮಾಯೋ, ಬುದ್ಧಂ ತಂ ಪಣಮಾಮ್ಯಹಂ.೨೭.

ಭಗ್ಗಕಾಮೋ ಭಗ್ಗಕೋಧೋ, ಭಗ್ಗಕೋಪೋ ಭಗ್ಗಕುಹೋ;

ಭಗ್ಗಕಸಾವೋ ಭಗ್ಗಿನ್ಧೋ, ಬುದ್ಧಂ ತಂ ಪಣಮಾಮ್ಯಹಂ.೨೮.

ಭಗ್ಗಜಾತಿ ಭಗ್ಗಮಚ್ಚೂ, ಭಗ್ಗಲೋಕೋ ಭಗ್ಗಭವೋ;

ಭಗ್ಗಸಂಸಾರೋ ಭಗ್ಗೋಘೋ, ಬುದ್ಧಂ ತಂ ಪಣಮಾಮ್ಯಹಂ.೨೯.

ಭೋಗಭಗ್ಗೋ ಸೋಕಭಗ್ಗೋ, ರೋಗಭಗ್ಗೋ ಭಗ್ಗರಜೋ;

ಸೂಲಭಗ್ಗೋ ಸಲ್ಲಭಗ್ಗೋ, ಬುದ್ಧಂ ತಂ ಪಣಮಾಮ್ಯಹಂ.೩೦.

ಆಸಾಭಗ್ಗೋ ಇಸ್ಸಾಭಗ್ಗೋ, ಏಜಾಭಗ್ಗೋ ಭಗ್ಗಜಟಾ;

ಛನ್ದಭಗ್ಗೋ ಬನ್ಧಭಗ್ಗೋ, ಬುದ್ಧಂ ತಂ ಪಣಮಾಮ್ಯಹಂ.೩೧.

ವೀತರಾಗೋ ವೀತದೋಸೋ, ವೀತಮೋಹೋ ವೀತಾಸವೋ;

ವೀತಕಾಮೋ ವೀತಕೋಧೋ, ಬುದ್ಧಂ ತಂ ಪಣಮಾಮ್ಯಹಂ.೩೨.

ವೀತಪಾಪೋ ವೀತಪುಞ್ಞೋ, ವೀತಭಾರೋ ವೀತಮಲೋ;

ವೀತವಿಕಾರೋ ವೀತಿನ್ಧೋ, ಬುದ್ಧಂ ತಂ ಪಣಮಾಮ್ಯಹಂ.೩೩.

ವನ್ತರಾಗೋ ವನ್ತದೋಸೋ, ವನ್ತಮೋಹೋ ವನ್ತಮಲೋ;

ವನ್ತಕಸಾವೋ ವನ್ತೀಘೋ, ಬುದ್ಧಂ ತಂ ಪಣಮಾಮ್ಯಹಂ.೩೪.

ವನ್ತರಾಗೋ ವನ್ತದೋಸೋ, ವನ್ತಮೋಹೋ ವನ್ತಮಲೋ;

ವನ್ತಕಸಾವೋ ವನ್ತೀಘೋ, ಬುದ್ಧಂ ತಂ ಪಣಮಾಮ್ಯಹಂ.೩೫.

ಸಗ್ಗುರು ತಿಲೋಕಗುರು, ಸಬ್ಬಸತ್ತಾನಮಗ್ಗಗುರೂ;

ನೇತಾರೇಸು ಮಹಾನೇತಾ, ಬುದ್ಧಂ ತಂ ಪಣಮಾಮ್ಯಹಂ.೩೬.

ಮಹಾಗುರು ನರಗುರು, ದೇವಗುರು ಗುರುತ್ತಮೋ!

ಜೇಟ್ಠಗುರು ಸೇಟ್ಠಗುರು, ಬುದ್ಧಂ ತಂ ಪಣಮಾಮ್ಯಹಂ.೩೭.

ವಿಸ್ಸಗುರು ಲೋಕಗುರು, ಧಮ್ಮಗುರು ಗುರೂತ್ತಮೋ;

ನತ್ಥಿ ಏತಾದಿಸೋ ಗುರು, ಬುದ್ಧಂ ತಂ ಪಣಮಾಮ್ಯಹಂ.೩೮.

ಮಹಾಸತ್ಥಾ ಮಹಾಸೋತ್ಥಿ, ಮಹಾಮಿತ್ತೋ ಮಹಾಸಖಾ;

ಮಹಾಕಲ್ಯಾಣಮಿತ್ತೋ ಯೋ, ಬುದ್ಧಂ ತಂ ಪಣಮಾಮ್ಯಹಂ.೩೯.

ಮಹಾಪಞ್ಞೋ ಮಹಾವಿಞ್ಞೂ, ಮಹಾವಿದ್ವಾ ಮಹಾವಿದೂ;

ಮಹಾಮೇಧಾವೀ ಸುಮೇಧೋ, ಬುದ್ಧಂ ತಂ ಪಣಮಾಮ್ಯಹಂ.೪೦.

ಮಹಾಸುದ್ಧೋ ಮಹಾಭದ್ದೋ, ಮಹಾದಯೋ ಮಹಾಸಯೋ;

ಮಹಾದಿಬ್ಬೋ ಮಹಾಭಬ್ಬೋ, ಬುದ್ಧಂ ತಂ ಪಣಮಾಮ್ಯಹಂ.೪೧.

ಮಹಾವೀರೋ ಮಹಾಧೀರೋ, ಮಹಾಸೂರೋ ಮಹಬ್ಬಲೋ;

ಮಹಾಮಾರಚಮೂ ಮದ್ದಿ, ಬುದ್ಧಂ ತಂ ಪಣಮಾಮ್ಯಹಂ.೪೨.

ಮಹಾಜೇಟ್ಠೋ ಮಹಾಸೇಟ್ಠೋ, ಮಹಗ್ಗೋ ಮಹಾನಾಯಕೋ;

ಮಹಾಛೇಕೋ ಮಹಾದಕ್ಖೋ, ಬುದ್ಧಂ ತಂ ಪಣಮಾಮ್ಯಹಂ.೪೩.

ಮಹಾಬ್ಯತ್ತೋ ಮಹಾಞಾತೋ, ಮಹಾಖ್ಯಾತೋ ಮಹಾಯಸೀ;

ಮಹಿದ್ಧೋ ಮಹಾವಿಖ್ಯಾತೋ, ಬುದ್ಧಂ ತಂ ಪಣಮಾಮ್ಯಹಂ.೪೪.

ಮಹಾತುಟ್ಠೋ ಮಹಾಹಟ್ಠೋ, ಮಹಾಜವೋ ಮಹಾಜಯೋ;

ಮಹಾಸನ್ತುಟ್ಠೋ ವಿಸಿಟ್ಠೋ, ಬುದ್ಧಂ ತಂ ಪಣಮಾಮ್ಯಹಂ.೪೫.

ಮಹಾನಾಥೋ ಮಹಾಸಾಮೀ, ಮಹಾಪಭೂ ಮಹಾವಿಭೂ;

ಮಹಿಸ್ಸರೋ ಬೋಧಿಸ್ಸರೋ, ಬುದ್ಧಂ ತಂ ಪಣಮಾಮ್ಯಹಂ.೪೬.

ಮಹಾವಣ್ಣೋ ಮಹಾಕನ್ತೋ, ಮನೋಪಿಯೋ ಮನಾಪಿಕೋ;

ಮಹಾಸೋಭನೋ ಮನುಞ್ಞೋ, ಬುದ್ಧಂ ತಂ ಪಣಮಾಮ್ಯಹಂ.೪೭.

ಮಹಾಝಾಯೀ ಮಹಾಞಾಣೀ, ಮಹಾಧೀಮಾ ಮಹಾಸುಧೀ;

ಮಹಾವಿಭಾವೀ ಮೇಧಾವೀ, ಬುದ್ಧಂ ತಂ ಪಣಮಾಮ್ಯಹಂ.೪೮.

ಮಹಾಖನ್ತೀ ಚ ತಿತಿಕ್ಖೋ, ಮಹಾನಿಕ್ಕಙ್ಖೋ ಧಮ್ಮಗೂ;

ಮಹಾಸಂಯತೋ ಸಂವುತೋ, ಬುದ್ಧಂ ತಂ ಪಣಮಾಮ್ಯಹಂ.೪೯.

ಮಹಾಥೋಮಿತೋ ಪೂಜಿತೋ, ಮಹಾಮಾನಿತೋ ವನ್ದಿತೋ;

ಮಹಾಭಿವಾದಿತೋ ಭಿಯ್ಯೋ, ಬುದ್ಧಂ ತಂ ಪಣಮಾಮ್ಯಹಂ.೫೦.

ಮಹತತ್ಥೋ ಮಹತ್ಥಿಕೋ, ಮಹನ್ತತ್ಥೋ ಮಹತ್ತರೋ;

ಮಹನ್ತೋ ಮಹತ್ತಪ್ಪತ್ತೋ, ಬುದ್ಧಂ ತಂ ಪಣಮಾಮ್ಯಹಂ.೫೧.

ಮಹಾಲಾಭೀ ಮಹಾಕಾರೀ, ಮಹಾದಾಯೀ ಮಹಾಧನೀ;

ಮಹಾವಿಜ್ಜೋ ಮಹಾಪುಜ್ಜೋ, ಬುದ್ಧಂ ತಂ ಪಣಮಾಮ್ಯಹಂ.೫೨.

ಮಹಾಬುದ್ಧಿ ಮಹಾಬುಧಾ, ಮಹಾಪಬೋಧಿಪುಙ್ಗವೋ;

ಮಹಾಭವಣ್ಣವಂ ತಿಣ್ಣೋ, ಬುದ್ಧಂ ತಂ ಪಣಮಾಮ್ಯಹಂ.೫೩.

ಮಹಾನಾಗೋ ಮಹಾಭಾಗೋ, ಮಹಾಬಾಹೋ ಮಹಿದ್ಧಿಕೋ;

ಮಹಾಯೋಧೋ ಮಹಗ್ಗತೋ, ಬುದ್ಧಂ ತಂ ಪಣಮಾಮ್ಯಹಂ.೫೪.

ಮಹಾದನ್ತೋ ಮಹಾಸನ್ತೋ, ಮಹಾಗಣೀ ಮಹಾಗುಣೀ;

ಮಹಾಸನ್ತಿಪದಾಯಕೋ, ಬುದ್ಧಂ ತಂ ಪಣಮಾಮ್ಯಹಂ.೫೫.

ಮಹಾಸೀಲೋ ಮಹಾಚಿತ್ತೋ, ಮಹಾಬುಧೋ ಮಹೇಸಿನೋ;

ಮಹಾಮೋಹೋದಧಿಂ ತಿಣ್ಣೋ, ಬುದ್ಧಂ ತಂ ಪಣಮಾಮ್ಯಹಂ.೫೬.

ಮಹಾತಪಸ್ಸೀ ಧಮ್ಮೇಸೀ, ಮಹಾಯಸಸ್ಸೀ ನಾಯಕೋ;

ಮಹಾಪತಾಪೀ ತೇಜಸ್ಸೀ, ಬುದ್ಧಂ ತಂ ಪಣಮಾಮ್ಯಹಂ.೫೭.

ಮಹಾಆಭೋ ಮಹಾಪಭೋ, ಮೋಹನ್ಧಕಾರಭಿನ್ದಕೋ;

ಞಾಣಪದೀಪಂ ದೀಪೇಸಿ, ಬುದ್ಧಂ ತಂ ಪಣಮಾಮ್ಯಹಂ.೫೮.

ಮಹಾಪಸ್ಸದ್ಧಿದಾಯಕೋ, ಮುನಿರಾಜಾ ಮುನಿಸ್ಸರೋ;

ಸನ್ತಿದದೋ ಸುಖದದೋ, ಬುದ್ಧಂ ತಂ ಪಣಮಾಮ್ಯಹಂ.೫೯.

ಮಹಾನೀವರಣಾ’ತೀತೋ, ಮಹಾಮೋಹಸಮೂಹತೋ;

ಮಹೋಘತಿಣ್ಣೋ ಮೋಕ್ಖಕೋ, ಬುದ್ಧಂ ತಂ ಪಣಮಾಮ್ಯಹಂ.೬೦.

ಮಹಾಭವೋಪಧಿಚತ್ತೋ, ಲೋಭದೋಸವಿನಾಸಕೋ;

ಮಹಾರಿಪುಂ ನಿಮದ್ದೇಸಿ, ಬುದ್ಧಂ ತಂ ಪಣಮಾಮ್ಯಹಂ.೬೧.

ಮಹಾ’ಭಿಞ್ಞಾಬಲಪ್ಪತ್ತೋ, ಮಹಾಮಞ್ಞಿತನಾಸಕೋ;

ಮಹಾಸದ್ಧಮಂ ನಿದ್ದಿಸಿ, ಬುದ್ಧಂ ತಂ ಪಣಮಾಮ್ಯಹಂ.೬೨.

ಅಹೋರತ್ತಿಂ ಸದಾಸುದ್ಧೋ, ಮಹಾಲೋಕಗ್ಗನಾಯಕೋ;

ಸಮತ್ತವಿಸ್ಸವಿಸ್ಸುತೋ, ಬುದ್ಧಂ ತಂ ಪಣಮಾಮ್ಯಹಂ.೬೩.

ಮಹಾಅವಿಜ್ಜಾಉಚ್ಛಿನ್ನೋ, ಮಹಾಆಸತ್ತಿರಿಞ್ಚಕೋ;

ಮಹಾಜಟಾ ವಿಜಟೇಸಿ, ಬುದ್ಧಂ ತಂ ಪಣಮಾಮ್ಯಹಂ.೬೪.

ಮಹಾಸೂಲವಿವತ್ತಕೋ, ಮಹಾಸಲ್ಲವಿನೋದನೋ;

ಮಹಾಸವಂ ಬ್ಯನ್ತಿಕರೋ, ಬುದ್ಧಂ ತಂ ಪಣಮಾಮ್ಯಹಂ.೬೫.

ಮಹಾಪರಕ್ಕಮೀ ಸೂರೋ, ಸಬ್ಬಥಾ ಅಪರಾಜಯೋ;

ಅಚ್ಚನ್ತಅಭಯೋ ವೀರೋ, ಬುದ್ಧಂ ತಂ ಪಣಮಾಮ್ಯಹಂ.೬೬.

ಮಹಾತಣ್ಹಾವೀತಿವತ್ತೋ, ಮಹಾಸೋಕಪನೂದನೋ;

ಮಹಾದುಕ್ಖಮತಿಕ್ಕನ್ತೋ, ಬುದ್ಧಂ ತಂ ಪಣಮಾಮ್ಯಹಂ.೬೭.

ಮಹಾಮಾನಮತಿಕ್ಕಮೋ, ಮಾರಸೇನನಿಮ್ಮದ್ದನೋ;

ಕಮ್ಮಕ್ಲೇಸಂ ನಿಜ್ಜರೇಸಿ, ಬುದ್ಧಂ ತಂ ಪಣಮಾಮ್ಯಹಂ.೬೮.

ಮಹಾಭವೋದಧಿತ್ತಿಣ್ಣೋ, ಪಾಪಣ್ಣವಪಾರಙ್ಗತೋ;

ಮಹಾಸಂಸರಣಾತಿಗೋ, ಬುದ್ಧಂ ತಂ ಪಣಮಾಮ್ಯಹಂ.೬೯.

ಮಹಾಸಂಯೋಜನಾತೀತೋ, ಮಹಾವಟ್ಟವಿನಾಸಕೋ;

ಮಹಾಸಂಸಾರೋಘತಿಣ್ಣೋ, ಬುದ್ಧಂ ತಂ ಪಣಮಾಮ್ಯಹಂ.೭೦.

ಮಹಾರಾಗವಿರಞ್ಜಕೋ, ಮಹಾದೋಸನಿಮ್ಮದ್ದಕೋ;

ಮಹಾಸೋತಂ ವಿಸೋಸೇಸಿ, ಬುದ್ಧಂ ತಂ ಪಣಮಾಮ್ಯಹಂ.೭೧.

ಮಹಾಮೇತ್ತಾವಿಹಾರೀ ಯೋ, ಮಹಾಪುಞ್ಞೋ ಮಹಾರಹೋ;

ಮಹಾಕರುಣಾಸಾಗರೋ, ಬುದ್ಧಂ ತಂ ಪಣಮಾಮ್ಯಹಂ.೭೨.

ಮಹಾಭವಸಿನ್ಧುಲಙ್ಘೀ, ಭವಮುತ್ತೋ ಭವನ್ತಗೂ;

ಸೋಕಸೂಲಸಮುಚ್ಛಿನ್ನೋ, ಬುದ್ಧಂ ತಂ ಪಣಮಾಮ್ಯಹಂ.೭೩.