೨. ನಾಮಕಣ್ಡ

ಪುಲ್ಲಿಙ್ಗ

೪೭. ‘‘ಜಿನವಚನಯುತ್ತಂ ಹೀ’’ತಿ ಸಬ್ಬತ್ಥಾಧಿಕಾರೋ.

ಲಿಙ್ಗಞ್ಚ ನಿಪಚ್ಚತೇ.

ಧಾತುಪ್ಪಚ್ಚಯವಿಭತ್ತಿವಜ್ಜಿತಮತ್ಥಯುತ್ತಂ ಸದ್ದರೂಪಂ ಲಿಙ್ಗಂ ನಾಮ, ಜಿನವಚನಯೋಗ್ಗಂ ಲಿಙ್ಗಂ ಇಧ ಠಪೀಯತಿ ನಿಪ್ಫಾದೀಯತಿ ಚ.

೪೮. ಬುದ್ಧಇತಿ ಠಿತೇ –

ತತೋ ಚ ವಿಭತ್ತಿಯೋ.

ತಸ್ಮಾ ಲಿಙ್ಗಾ ಪರಾ ವಿಭತ್ತಿಯೋ ಹೋನ್ತಿ. ಚಕಾರೇನ ತಾಸಂ ಏಕವಚನಾದಿಪಠಮಾದಿಸಞ್ಞಾ ಚ.

‘‘ಸಿ ಯೋ ಅಂ ಯೋ ನಾ ಹಿ ಸ ನಂ ಸ್ಮಾ ಹಿ ಸ ನಂ ಸ್ಮಿಂ ಸೂ’’ ತಿ ವಿಭತ್ತಿಯೋ. ಸಿ ಯೋ ಇತಿ ಪಠಮಾ, ಅಂ ಯೋ ಇತಿ ದುತಿಯಾ, ನಾ ಹಿ ಇತಿ ತತಿಯಾ, ಸ ನಂ ಇತಿ ಚತುತ್ಥೀ, ಸ್ಮಾ ಹಿ ಇತಿ ಪಞ್ಚಮೀ, ಸ ನಂ ಇತಿ ಛಟ್ಠೀ, ಸ್ಮಿಂ ಸು ಇತಿ ಸತ್ತಮೀ.

ಲಿಙ್ಗತ್ಥೇ ಪಠಮಾ.

ಯೋ ಕಮ್ಮಕತ್ತಾದಿವತ್ತನ್ತರಮಪ್ಪತ್ತೋ ಸಸ್ಸರೂಪಟ್ಠೋ ಸುದ್ಧೋ, ಸೋ ಲಿಙ್ಗತ್ಥೋ ನಾಮ, ತಸ್ಸಾಭಿಧಾನಮತ್ತೇ ಪಠಮಾವಿಭತ್ತಿ ಹೋತಿ. ತಸ್ಸಾಪನಿಯಮೇ ಏಕಮ್ಹಿ ವತ್ತಬ್ಬೇ ಏಕವಚನಂ ಸಿ, ವುಚ್ಚತೇ ನೇನೇತಿವಚನಂ, ಏಕಸ್ಸತ್ಥಸ್ಸ ವಚನಂ ಏಕವಚನಂ. ಏವಂ ಬಹುವಚನಂ.

ಅತೋತ್ವೇವ.

ಸೋ.

ಅಕಾರನ್ತಾ ಪರಸ್ಸ ಸಿಸ್ಸ ಓ ಹೋತಿ.

ಸರಲೋಪೋ ಮಾದೇಸಪ್ಪಚ್ಚಯಾದಿಮ್ಹಿ ಸರಲೋಪೇ ತು ಪಕತಿ.

ಅಂಆದೀಸು ಪರೇಸು ಸರಸ್ಸ ಲೋಪೋ ಹೋತಿ, ತಸ್ಮಿಂ ಕತೇ ತು ಕ್ವಚಾದಿನಾ ಅಸವಣ್ಣೇ ಪತ್ತೇ ಪಕತಿ ಹೋತಿ.

ನಯೇ ಪರಂ ಯುತ್ತೇ. ಏವಮುಪರಿ ಸರಲೋಪಾದಿ. ಬುದ್ಧೋ.

ಬಹುಮ್ಹಿ ವತ್ತಬ್ಬೇ ಬಹುವಚನಂ ಯೋ.

ಅತೋ ವಾತ್ವೇವ.

ಸಬ್ಬಯೋನೀನಮಾಏ.

ಅಕಾರನ್ತಾ ಪರೇಸಂ ಪಠಮದುತಿಯಾಯೋನೀನಂ ಯಥಾಸಙ್ಖ್ಯಂ ಆಏ ವಾ ಹೋನ್ತಿ. ಬುದ್ಧಾ.

ವಾತಿ ಕಿಂ. ಅಗ್ಗಯೋ.

೪೯. ಲಿಙ್ಗತ್ಥೇ ಪಠಮಾತ್ವೇವ.

ಆಲಪನೇ ಚ.

ಅಭಿಮುಖೀಕರಣಮಾಲಪನಂ, ತದಧಿಕೇ ಲಿಙ್ಗತ್ಥೇ ಪಠಮಾ ಹೋತಿ.

‘‘ಆಲಪನೇ ಸಿ ಗಸಞ್ಞೋ’’ತಿ ಸಿಸ್ಸ ಗಸಞ್ಞಾ. ಗೇಇತ್ವೇವ.

ಅಕಾರಾ ಪಿತಾದ್ಯನ್ತಾನಮಾ.

ಗೇ ಪರೇ ಅಕಾರೋ ಪಿತುಸತ್ಥುಅತ್ತರಾಜಾದೀನಮನ್ತೋ ಚ ಆತ್ತಂ ಯಾತಿ.

‘‘ಆಕಾರೋ ವಾ’’ತಿ ಗೇ ಪರೇ ಆಕಾರಸ್ಸ ರಸ್ಸೋ ವಾ.

ಸೇಸತೋ ಲೋಪಂ ಗಸೀಪಿ.

ಸೋ ಸಿಂ ಸ್ಯಾ ಚ ಸಖಾತೋ ಗಸ್ಸೇವಾತ್ಯಾದಿನಿದ್ದಿಟ್ಠೇಹಞ್ಞೇ ಅವಣ್ಣಿವಣ್ಣುವಣ್ಣೋಕಾರನ್ತಾ ಸೇಸಾ, ತೇಹಿ ಪರೇ ಗಸೀ ಲುಪ್ಯನ್ತೇ. ಹೇ - ಬುದ್ಧ, ಬುದ್ಧಾ. ಯೋ - ಬುದ್ಧಾ.

೫೦. ಕಮ್ಮತ್ಥೇ ದುತಿಯಾ.

ಯಂ ಕರೋತಿ, ತಂ ಕಮ್ಮಂ ನಾಮ. ತತ್ಥ ದುತಿಯಾ ಹೋತಿ. ಅಂಬುದ್ಧಂ. ಯೋಸ್ಸ ಏ-ಬುದ್ಧೇ.

೫೧. ತತಿಯಾತ್ವೇವ.

ಕತ್ತರಿ ಚ.

ಯೋ ಕರೋತಿ, ಸ ಕತ್ತಾ ನಾಮ. ತತ್ಥ ತತಿಯಾ ಹೋತಿ. ನಾ.

ಅತೋ ನೇನ.

ಅಕಾರಾ ಪರೋ ನಾ ಏನಂ ಯಾತಿ. ಬುದ್ಧೇನ.

ಹಿ.

ಸುಹಿಸ್ವಕಾರೋ ಏ.

ಸುಹಿಸು ಪರೇಸ್ವಕಾರಸ್ಸ ಏ ಹೋತಿ.

ಸ್ಮಾಹಿಸ್ಮಿನ್ನಂ ಮ್ಹಾಭಿಮ್ಹಿ ವಾ.

ಸಬ್ಬಸದ್ದೇಹಿ ಪರೇಸಂ ಸ್ಮಾಹಿಸ್ಮಿನ್ನಂ ಯಥಾಸಙ್ಖ್ಯಂ ಮ್ಹಾಭಿಮ್ಹಿಇಚ್ಚೇತೇ ವಾ ಹೋನ್ತಿ. ಬುದ್ಧೇಭಿ, ಬುದ್ಧೇಹಿ.

೫೨. ಕರಣೇ ತತಿಯಾ.

ಯೇನ ವಾ ಕಯಿರತೇ, ತಂ ಕರಣಂ ನಾಮ. ತತ್ಥ ತತಿಯಾ ಹೋತಿ. ಸಬ್ಬಂ ಕತ್ತುಸಮಂ.

೫೩. ಸಮ್ಪದಾನೇ ಚತುತ್ಥೀ.

ಯಸ್ಸ ದಾತುಕಾಮೋ ರೋಚತೇ, ಧಾರಯತೇ ವಾ, ತಂ ಸಮ್ಪದಾನಂ ನಾಮ. ತತ್ಥ ಚತುತ್ಥೀ ಹೋತಿ. ಸ.

ಅತೋ ವಾತ್ವೇವ.

ಆಯ ಚತುತ್ಥೇಕವಚನಸ್ಸ ತು.

ಅಕಾರಾ ಪರಸ್ಸ ಚತುತ್ಥೇಕವಚನಸ್ಸ ಆಯೋ ವಾ ಹೋತಿ. ಬುದ್ಧಾಯ.

‘‘ಸಾಗಮೋ ಸೇ’’ತಿ ಸೇ ಸಕಾರಾಗಮೋ. ಬುದ್ಧಸ್ಸ. ನಂ.

ದೀಘನ್ತ್ವೇವ.

ಸುನಂಹಿಸು ಚ.

ಸುನಂಹಿಸು ಪರೇಸು ಸರಾದೀನಂ ದೀಘೋ ಹೋತಿ. ಚಸದ್ದೇನ ಕ್ವಚಿ ನ. ಬುದ್ಧಾನಂ.

೫೪. ಅಪಾದಾನೇ ಪಞ್ಚಮೀ.

ಯಸ್ಮಾದಪೇತಿ, ಭಯಮಾದತ್ತೇ ವಾ, ತದಪಾದಾನಂ ನಾಮ, ತತ್ಥ ಪಞ್ಚಮೀ ಹೋತಿ. ಸ್ಮಾ.

ಅತೋ ಆಏತ್ವೇವ.

೫೫. ಸ್ಮಾಸ್ಮಿನ್ನಂ ವಾ.

ಅಕಾರಾ ಪರೇಸಂ ಸ್ಮಾಸ್ಮಿನ್ನಂ ಆಏ ವಾ ಹೋನ್ತಿ. ಬುದ್ಧಾ, ಬುದ್ಧಮ್ಹಾ, ಬುದ್ಧಸ್ಮಾ. ಬುದ್ಧೇಭಿ, ಬುದ್ಧೇಹಿ.

೫೬. ಸಾಮಿಸ್ಮಿಂ ಛಟ್ಠೀ.

ಯಸ್ಸ ವಾ ಪರಿಗ್ಗಹೋ, ತಂ ಸಾಮೀ ನಾಮ. ತತ್ಥ ಛಟ್ಠೀ ಹೋತಿ. ಬುದ್ಧಸ್ಸ. ಬುದ್ಧಾನಂ.

೫೭. ಓಕಾಸೇ ಸತ್ತಮೀ.

ಯೋಧಾರೋ, ತಮೋಕಾಸಂ ನಾಮ. ತತ್ಥ ಸತ್ತಮೀ ಹೋತಿ. ಸ್ಮಿಂ-ಬುದ್ಧೇ, ಬುದ್ಧಮ್ಹಿ, ಬುದ್ಧಸ್ಮಿಂ. ಸು-ಬುದ್ಧೇಸು.

೫೮. ಬುದ್ಧೋ ಬುದ್ಧ ಸುಖಂ ದದಾತಿ ಸರತೋ ಬುದ್ಧಂ ತತೋ ದುಕ್ಕರಂ,

ಕಿಂ ಬುದ್ಧೇನ ಮಹಿದ್ಧಯೋಪಿ ಮುನಯೋ ಬುದ್ಧೇನ ಜಾತಾಸುಖೀ;

ಬುದ್ಧಸ್ಸೇವ ಮನಂ ದದೇ ಪದಮಹಂ ಬುದ್ಧಾ ಲಭೇಯ್ಯಾಚ್ಚುತಂ,

ಬುದ್ಧಸ್ಸಿದ್ಧಿ ನ ಕಿಂ ಕರೇ ಭವಭವೇ ಭತ್ತ್ಯತ್ಥು ಬುದ್ಧೇ ಮಮ.

೫೯. ಇತೋ ಪರಂ ತತಿಯಾಪಞ್ಚಮೀನಞ್ಚ ಚತುತ್ಥೀಛಟ್ಠೀನಞ್ಚ ಸರೂಪತ್ತಾ ಪಞ್ಚಮೀಛಟ್ಠಿಯೋ ಭೀಯೋ ಉಪೇಕ್ಖನ್ತೇ.

೬೦. ಅತ್ತ, ಸಿ.

ಬ್ರಹ್ಮತ್ತಸಖರಾಜಾದಿತೋ ತ್ವೇವ.

ಸ್ಯಾ ಚ.

ಬ್ರಹ್ಮಾದಿತೋ ಸಿಸ್ಸ ಆ ಹೋತಿ. ಅತ್ತಾ.

‘‘ಯೋನಮಾನೋ’’ತಿ ಬ್ರಹ್ಮಾದಿತೋ ಯೋನಂ ಆನೋತ್ತಂ. ಅತ್ತಾನೋ.

೬೧. ಹೇ - ಅತ್ತ, ಅತ್ತಾ. ಯೋ, ಅತ್ತಾನೋ.

೬೨. ‘‘ಬ್ರಹ್ಮತ್ತಸಖರಾಜಾದಿತೋ ಅಮಾನ’’ನ್ತಿ ಬ್ರಹ್ಮಾದಿತೋ ಅಂವಚನಸ್ಸ ಆನಂ ವಾ ಹೋತಿ. ಅತ್ತಾನಂ, ಅತ್ತಂ. ಅತ್ತಾನೋ.

೬೩. ಅತ್ತೇನ, ಅತ್ತನಾ. ಪಕ್ಖೇ-ಜಿನವಚನಾನುರೋಧೇನ ಏನಾಭಾವೋ.

‘‘ಅತ್ತಾನ್ತೋ ಹಿಸ್ಮಿಮನತ್ತಂ’’ತಿ ಹಿಮ್ಹಿ ಅತ್ತನ್ತಸ್ಸ ಅನೋ. ಅತ್ತನೇಹಿ. ಏವಂ ಕರಣೇ.

೬೪. ‘‘ಸಸ್ಸ ನೋ’’ತಿ ನೋಕಾರೋ. ಅತ್ತನೋ. ಅತ್ತಾನಂ.

೬೫. ಅಮ್ಹತುಮ್ಹನ್ತು ರಾಜಬ್ರಹ್ಮತ್ತಸಖ ಸತ್ಥುಪಿತಾದೀಹಿ ಸ್ಮಾ ನಾವ.

ಅಮ್ಹಾದಿತೋ ಸ್ಮಾ ನಾ ಇವ ಹೋತಿ. ಅತ್ತನಾ.

೬೬. ‘‘ತತೋ ಸ್ಮಿನ್ನೀ’’ತಿ ಸ್ಮಿನೋ ನಿ. ಅತ್ತನಿ. ‘‘ಅನತ್ತ’’ನ್ತಿ ಭಾವನಿದ್ದೇಸೇನ ಸುಮ್ಹಿ ಚ ಅನೋ. ಅತ್ತನೇಸು.

೬೭. ರಾಜಾ ಅತ್ತಾವ. ನಾ.

ಸವಿಭತ್ತಿಸ್ಸ ರಾಜಸ್ಸೇತ್ವೇವ.

ನಾಮ್ಹಿ ರಞ್ಞಾ ವಾ.

ನಾಮ್ಹಿ ಸವಿಭತ್ತಿಸ್ಸ ರಾಜಸದ್ದಸ್ಸ ರಞ್ಞಾ ವಾ ಹೋತಿ. ರಞ್ಞಾ, ರಾಜೇನ.

ರಾಜಸ್ಸ ರಾಜು ಸುನಂಹಿಸು ಚ.

ಸುನಂ ಹಿಸು ಪರೇಸು ರಾಜಸ್ಸ ರಾಜು ಹೋತಿ, ಚಕಾರೇನ ಕ್ವಚಿ ನ.

‘‘ಸುನಂಹಿಸು ಚೇತಿ’’ ದೀಘೇ - ರಾಜೂಭಿ, ರಾಜೂಹಿ, ರಾಜೇಭಿ, ರಾಜೇಹಿ.

೬೮. ಸವಿಭತ್ತಿಸ್ಸೇತ್ಯಧಿಕಾರೋ.

‘‘ರಾಜಸ್ಸ ರಞ್ಞೋ ರಾಜಿನೋ ಸೇ’’ತಿ ಸೇ ರಞ್ಞೋ ರಾಜಿನೋ ಹೋನ್ತಿ. ರಞ್ಞೋ, ರಾಜಿನೋ.

‘‘ರಞ್ಞಂ ನಮ್ಹಿ ವಾ’’ತಿ ನಮ್ಹಿ ರಞ್ಞಂ ವಾ. ರಞ್ಞಂ, ರಾಜೂನಂ, ರಾಜಾನಂ.

೬೯. ಸ್ಮಾಸ್ಸನಾತುಲ್ಯತ್ತಾ-ನಾಮ್ಹಿ ರಞ್ಞಾ ವಾ. ರಞ್ಞಾ, ರಾಜಮ್ಹಾ, ರಾಜಸ್ಮಾ.

೭೦. ‘‘ಸ್ಮಿಮ್ಹಿ ರಞ್ಞೇ ರಾಜಿನೀ’’ತಿ ಸ್ಮಿಮ್ಹಿ ರಞ್ಞೇ ರಾಜಿನಿ ಹೋನ್ತಿ. ರಞ್ಞೇ, ರಾಜಿನಿ. ರಾಜೂಸು, ರಾಜೇಸು.

೭೧. ಗುಣವನ್ತು, ಸಿ.

ಸವಿಭತ್ತಿಸ್ಸ ನ್ತುಸ್ಸೇತ್ವೇವ.

‘‘ಆ ಸಿಮ್ಹೀ’’ತಿ ಸಿಮ್ಹಿ ಸವಿಭತ್ತಿಸ್ಸ ನ್ತುಸ್ಸ ಆ. ಗುಣವಾ.

ಯೋಮ್ಹಿ ಪಠಮೇತ್ವೇವ.

ನ್ತುಸ್ಸ ನ್ತೋ.

ಪಠಮೇ ಯೋಮ್ಹಿ ಸವಿಭತ್ತಿಸ್ಸ ನ್ತುಸ್ಸ ನ್ತೋಕಾರೋ ಹೋತಿ. ಗುಣವನ್ತೋ.

ಸುನಂಹಿಸು ಅತ್ತಂತ್ವೇವ.

ನ್ತುಸ್ಸನ್ತೋ ಯೋಸು ಚ.

ಸುನಂಹಿಸು, ಯೋಸು, ಚಕಾರೇನ ಅಞ್ಞೇಸುಪಿ ಪರೇಸು ನ್ತುಸ್ಸನ್ತೋ ಅತ್ತಂ ಯಾತಿ. ಗುಣವನ್ತಾ.

೭೨. ಸವಿಭತ್ತಿಸ್ಸೇತ್ಯಧಿಕಾರೋ. ಅಂಇತ್ವೇವ.

ಅವಣ್ಣೋ ಚ ಗೇ.

ಗೇ ಪರೇ ಸವಿಭತ್ತಿಸ್ಸ ನ್ತುಸ್ಸ ಅಂಅಆ ಹೋನ್ತಿ. ಹೇಗುಣವಂ,ಗುಣವ, ಗುಣವಾ. ಯೋ - ಗುಣವನ್ತೋ, ಗುಣವನ್ತಾ.

೭೩. ಅತ್ತಂ – ಗುಣವನ್ತಂ. ಗುಣವನ್ತೇ.

೭೪. ‘‘ತೋತಿತಾ ಸಸ್ಮಿಂ ನಾಸ್ವೀ’’ತಿ ಸವಿಭತ್ತಿಸ್ಸ ನ್ತುಸ್ಸ ನಾಮ್ಹಿ ತಾ, ಸೇ ತೋಕಾರೋ, ಸ್ಮಿಮ್ಹಿ ತಿ ಚ ವಾ. ಗುಣವತಾ, ಗುಣವನ್ತೇನ. ಗುಣವನ್ತೇಭಿ, ಗುಣವನ್ತೇಹಿ.

೭೫. ಗುಣವತೋ, ಗುಣವನ್ತಸ್ಸ.

‘‘ನಮ್ಹಿ ತಂ ವಾ’’ತಿ ನಮ್ಹಿ ನ್ತುಸ್ಸ ತಂ ವಾ. ಗುಣವತಂ, ಗುಣವನ್ತಾನಂ. ಸ್ಮಾ ನಾವ.

೭೬. ಗುಣವತಿ, ಗುಣವನ್ತೇ, ಗುಣವನ್ತಮ್ಹಿ, ಗುಣವನ್ತಸ್ಮಿಂ, ಗುಣವನ್ತೇಸು.

೭೭. ಗಚ್ಛನ್ತ, ಸಿ.

‘‘ಸಿಮ್ಹಿ ಗಚ್ಛನ್ತಾದೀನಂ ನ್ತಸದ್ದೋ ಅ’’ನ್ತಿ ನ್ತಸದ್ದಸ್ಸ ಅಂವಾ, ಸಿಲೋಪೋ. ಗಚ್ಛಂ, ಸಿಸ್ಸ ಓ – ಗಚ್ಛನ್ತೋ.

ಗಚ್ಛನ್ತಾದೀನಂ ನ್ತಸದ್ದೋತ್ವೇವ.

ಸೇಸೇಸುನ್ತುವ.

ವುತ್ತಂ ಹಿತ್ವಾ ಸೇಸೇಸು ಗಚ್ಛನ್ತಾದೀನಂ ನ್ತಸದ್ದೋ ನ್ತು ಇವ ದಟ್ಠಬ್ಬೋ. ಗಚ್ಛನ್ತೋ, ಗಚ್ಛನ್ತಾಇಚ್ಚಾದಿ.

ಸೇಸಂ ಗುಣವನ್ತುಸಮಂ.

೭೮. ಗಚ್ಛನ್ತಾದಯೋ ನಾಮ ಅನ್ತಪ್ಪಚ್ಚಯನ್ತಾ.

೭೯. ಅಗ್ಗಿ, ಸಿಲೋಪೋ.

‘‘ಇವಣ್ಣುವಣ್ಣಾ ಝಲಾ’’ತಿ ಇವಣ್ಣುವಣ್ಣಾನಂ ಯಥಾಸಙ್ಖ್ಯಂ ಝಲಸಞ್ಞಾ.

ಝಲತೋ ವಾತ್ವೇವ.

ಘಪತೋ ಚ ಯೋನಂ ಲೋಪೋ.

ಘಪಝಲತೋ ಯೋನಂ ಲೋಪೋ ವಾ ಹೋತಿ.

ಯೋಸು ಕತನಿಕಾರಲೋಪೇಸು ದೀಘಂ.

ಕತೋ ನಿಕಾರೋ ಲೋಪೋ ಚ ಯೇಸಂ ತೇಸು ಯೋಸು ಸರಾನಂ ದೀಘೋ ಹೋತಿ. ಅಗ್ಗೀ. ಪಕ್ಖೇ-ಅತ್ತನ್ತ್ವೇವ.

ಯೋ ಸ್ವಕತರಸ್ಸೋ ಝೋ.

ಯೋಸು ಅಕತರಸ್ಸೋ ಝೋ ಅತ್ತಂ ಯಾತಿ. ಅಗ್ಗಯೋ. ತಥಾಲಪನೇ.

೮೦. ಅಂ ಮೋ ನಿಗ್ಗಹೀತಂ ಝಲಪೇಹಿ.

ಝಲಪತೋ ಅಂ ಮೋ ಚ ಬಿನ್ದುಂ ಯನ್ತಿ. ಅಗ್ಗಿಂ. ಅಗ್ಗೀ, ಅಗ್ಗಯೋ.

೮೧. ಅಗ್ಗಿನಾ. ದೀಘೇ-ಅಗ್ಗೀಭಿ, ಅಗ್ಗೀಹಿ.

೮೨. ‘‘ಝಲತೋ ಸಸ್ಸ ನೋ ವಾ’’ತಿ ಸಸ್ಸ ನೋತ್ತಂ ವಾ. ಅಗ್ಗಿನೋ, ಅಗ್ಗಿಸ್ಸ. ಅಗ್ಗೀನಂ.

೮೩. ‘‘ಝಲತೋ ಚೇ’’ತಿ ಸ್ಮಾಸ್ಸ ನಾ. ಅಗ್ಗಿನಾ.

೮೪. ಅಗ್ಗಿಮ್ಹಿ, ಅಗ್ಗಿಸ್ಮಿಂ. ಅಗ್ಗೀಸು.

೮೫. ಆದಿ ಅಗ್ಗೀವ. ಸ್ಮಿಂನೋ ಪನ ‘‘ಆದಿತೋ ಓ ಚೇ’’ತಿ ಅಂ, ಓ ಚ ವಾ. ಆದಿ, ಆದೋ, ಆದಿಮ್ಹಿ, ಆದಿಸ್ಮಿಂ. ಆದೀಸು.

೮೬. ದಣ್ಡೀ, ಸಿ.

‘‘ಅಘೋ ರಸ್ಸ’’ಮಾದಿನಾ ರಸ್ಸೇ ಸಮ್ಪತ್ತೇ ‘‘ನ ಸಿಸ್ಮಿಮನಪುಂಸಕಾನೀ’’ತಿ ಸಿಮ್ಹಿ ಅನಪುಂಸಕಾನಂ ನ ರಸ್ಸೋ. ಸಿಲೋಪೋ, ದಣ್ಡೀ, ಯೋಲೋಪೇ – ದಣ್ಡೀ. ಪಕ್ಖೇ –

ಅಘೋ ರಸ್ಸಮೇಕವಚನಯೋಸ್ವಪಿ ಚ.

ಏಕವಚನಯೋಸು ಝಲಪಾ ರಸ್ಸಂ ಯನ್ತಿ.

ಝತೋ ಕತರಸ್ಸಾತ್ವೇವ.

ಯೋನಂ ನೋ.

ಕತಸ್ಸಾ ಝತೋ ಯೋನಂ ನೋತ್ತಂ ಹೋತಿ. ದಣ್ಡಿನೋ.

೮೭. ‘‘ಝಲಪಾ ರಸ್ಸ’’ನ್ತಿ ಗೇ ಪರೇ ಝಲಪಾನಂ ರಸ್ಸೋ. ಹೇದಣ್ಡಿ. ದಣ್ಡೀ, ದಣ್ಡಿನೋ.

೮೮. ವಾ ಅಂಇತ್ವೇವ.

‘‘ನಂ ಝತೋ ಕತರಸ್ಸಾ’’ತಿ ಅಂಇಚ್ಚಸ್ಸ ನಂ ವಾ. ದಣ್ಡಿನಂ, ದಣ್ಡಿಂ. ದಣ್ಡೀ, ದಣ್ಡಿನೋ.

೮೯. ದಣ್ಡಿನಾ. ದಣ್ಡೀಭಿ, ದಣ್ಡೀಹಿ.

೯೦. ದಣ್ಡಿನೋ, ದಣ್ಡಿಸ್ಸ. ದಣ್ಡೀನಂ.

೯೧. ಝತೋ ಕತರಸ್ಸಾತ್ವೇವ.

‘‘ಸ್ಮಿನ್ನೀ’’ತಿ ಸ್ಮಿನೋ ನಿ. ದಣ್ಡಿನಿ. ದಣ್ಡೀಸು.

೯೨. ಭಿಕ್ಖು, ಸಿಲೋಪೋ.

ವಾ ಯೋನಂತ್ವೇವ.

‘‘ಲತೋ ವೋ ಕಾರೋ ಚೇ’’ತಿ ಲತೋ ಯೋನಂ ವೋತ್ತಂ ವಾ.