೫. ಪಞ್ಞಾಸುತ್ತಂ

೨೫. ‘‘ಯತೋ ಖೋ, ಭಿಕ್ಖವೇ, ಭಿಕ್ಖುನೋ ಪಞ್ಞಾಯ ಚಿತ್ತಂ ಸುಪರಿಚಿತಂ ಹೋತಿ, ತಸ್ಸೇತಂ, ಭಿಕ್ಖವೇ, ಭಿಕ್ಖುನೋ ಕಲ್ಲಂ ವಚನಾಯ – ‘ಖೀಣಾ ಜಾತಿ, ವುಸಿತಂ ಬ್ರಹ್ಮಚರಿಯಂ, ಕತಂ ಕರಣೀಯಂ, ನಾಪರಂ ಇತ್ಥತ್ತಾಯಾತಿ ಪಜಾನಾಮೀ’’’ತಿ.

‘‘ಕಥಞ್ಚ, ಭಿಕ್ಖವೇ, ಭಿಕ್ಖುನೋ ಪಞ್ಞಾಯ ಚಿತ್ತಂ ಸುಪರಿಚಿತಂ ಹೋತಿ? ‘ವೀತರಾಗಂ ಮೇ ಚಿತ್ತ’ನ್ತಿ ಪಞ್ಞಾಯ ಚಿತ್ತಂ ಸುಪರಿಚಿತಂ ಹೋತಿ; ‘ವೀತದೋಸಂ ಮೇ ಚಿತ್ತ’ನ್ತಿ ಪಞ್ಞಾಯ ಚಿತ್ತಂ ಸುಪರಿಚಿತಂ ಹೋತಿ; ‘ವೀತಮೋಹಂ ಮೇ ಚಿತ್ತ’ನ್ತಿ ಪಞ್ಞಾಯ ಚಿತ್ತಂ ಸುಪರಿಚಿತಂ ಹೋತಿ; ‘ಅಸರಾಗಧಮ್ಮಂ ಮೇ ಚಿತ್ತ’ನ್ತಿ ಪಞ್ಞಾಯ ಚಿತ್ತಂ ಸುಪರಿಚಿತಂ ಹೋತಿ; ‘ಅಸದೋಸಧಮ್ಮಂ ಮೇ ಚಿತ್ತ’ನ್ತಿ ಪಞ್ಞಾಯ ಚಿತ್ತಂ ಸುಪರಿಚಿತಂ ಹೋತಿ; ‘ಅಸಮೋಹಧಮ್ಮಂ ಮೇ ಚಿತ್ತ’ನ್ತಿ ಪಞ್ಞಾಯ ಚಿತ್ತಂ ಸುಪರಿಚಿತಂ ಹೋತಿ; ‘ಅನಾವತ್ತಿಧಮ್ಮಂ ಮೇ ಚಿತ್ತಂ ಕಾಮಭವಾಯಾ’ತಿ ಪಞ್ಞಾಯ ಚಿತ್ತಂ ಸುಪರಿಚಿತಂ ಹೋತಿ; ‘ಅನಾವತ್ತಿಧಮ್ಮಂ ಮೇ ಚಿತ್ತಂ ರೂಪಭವಾಯಾ’ತಿ ಪಞ್ಞಾಯ ಚಿತ್ತಂ ಸುಪರಿಚಿತಂ ಹೋತಿ; ‘ಅನಾವತ್ತಿಧಮ್ಮಂ ಮೇ ಚಿತ್ತಂ ಅರೂಪಭವಾಯಾ’ತಿ ಪಞ್ಞಾಯ ಚಿತ್ತಂ ಸುಪರಿಚಿತಂ ಹೋತಿ. ಯತೋ ಖೋ, ಭಿಕ್ಖವೇ, ಭಿಕ್ಖುನೋ ಪಞ್ಞಾಯ ಚಿತ್ತಂ ಸುಪರಿಚಿತಂ ಹೋತಿ, ತಸ್ಸೇತಂ, ಭಿಕ್ಖವೇ, ಭಿಕ್ಖುನೋ ಕಲ್ಲಂ ವಚನಾಯ – ‘ಖೀಣಾ ಜಾತಿ, ವುಸಿತಂ ಬ್ರಹ್ಮಚರಿಯಂ, ಕತಂ ಕರಣೀಯಂ, ನಾಪರಂ ಇತ್ಥತ್ತಾಯಾತಿ ಪಜಾನಾಮೀ’’’ತಿ. ಪಞ್ಚಮಂ.