೫. ಪಠಮಮಿತ್ತಸುತ್ತಂ

೩೬. ‘‘ಸತ್ತಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತೋ ಮಿತ್ತೋ ಸೇವಿತಬ್ಬೋ. ಕತಮೇಹಿ ಸತ್ತಹಿ? ದುದ್ದದಂ ದದಾತಿ, ದುಕ್ಕರಂ ಕರೋತಿ, ದುಕ್ಖಮಂ ಖಮತಿ, ಗುಯ್ಹಮಸ್ಸ [ಗುಯ್ಹಸ್ಸ (ಕ.)] ಆವಿ ಕರೋತಿ, ಗುಯ್ಹಮಸ್ಸ [ಗುಯ್ಹಂ ಅಸ್ಸ (ಸೀ.), ಗುಯ್ಹಸ್ಸ (ಕ.)] ಪರಿಗುಹತಿ [ಪರಿಗೂಹತಿ (ಸೀ. ಸ್ಯಾ.), ಪರಿಗುಯ್ಹತಿ (ಕ.)], ಆಪದಾಸು ನ ಜಹತಿ, ಖೀಣೇನ [ಖೀಣೇ (ಕ.)] ನಾತಿಮಞ್ಞತಿ. ಇಮೇಹಿ ಖೋ, ಭಿಕ್ಖವೇ, ಸತ್ತಹಿ ಅಙ್ಗೇಹಿ ಸಮನ್ನಾಗತೋ ಮಿತ್ತೋ ಸೇವಿತಬ್ಬೋ’’ತಿ.

‘‘ದುದ್ದದಂ ದದಾತಿ ಮಿತ್ತೋ, ದುಕ್ಕರಞ್ಚಾಪಿ ಕುಬ್ಬತಿ;

ಅಥೋಪಿಸ್ಸ ದುರುತ್ತಾನಿ, ಖಮತಿ ದುಕ್ಖಮಾನಿ ಚ [ದುಕ್ಖಮಾನಿಪಿ (ಸೀ. ಸ್ಯಾ.)].

‘‘ಗುಯ್ಹಞ್ಚ ತಸ್ಸ [ಗುಯ್ಹಮಸ್ಸ ಚ (ಸ್ಯಾ.)] ಅಕ್ಖಾತಿ, ಗುಯ್ಹಸ್ಸ ಪರಿಗೂಹತಿ;

ಆಪದಾಸು ನ ಜಹಾತಿ, ಖೀಣೇನ ನಾತಿಮಞ್ಞತಿ.

‘‘ಯಮ್ಹಿ ಏತಾನಿ ಠಾನಾನಿ, ಸಂವಿಜ್ಜನ್ತೀಧ [ಸಂವಿಜ್ಜನ್ತಿ ಚ (ಕ.)] ಪುಗ್ಗಲೇ;

ಸೋ ಮಿತ್ತೋ ಮಿತ್ತಕಾಮೇನ, ಭಜಿತಬ್ಬೋ ತಥಾವಿಧೋ’’ತಿ. ಪಞ್ಚಮಂ;