೯. ಪಹಾನಸುತ್ತಂ

೯. ‘‘ಸತ್ತನ್ನಂ, ಭಿಕ್ಖವೇ, ಸಂಯೋಜನಾನಂ ಪಹಾನಾಯ ಸಮುಚ್ಛೇದಾಯ ಬ್ರಹ್ಮಚರಿಯಂ ವುಸ್ಸತಿ. ಕತಮೇಸಂ ಸತ್ತನ್ನಂ? ಅನುನಯಸಂಯೋಜನಸ್ಸ ಪಹಾನಾಯ ಸಮುಚ್ಛೇದಾಯ ಬ್ರಹ್ಮಚರಿಯಂ ವುಸ್ಸತಿ, ಪಟಿಘಸಂಯೋಜನಸ್ಸ…ಪೇ… ದಿಟ್ಠಿಸಂಯೋಜನಸ್ಸ… ವಿಚಿಕಿಚ್ಛಾಸಂಯೋಜನಸ್ಸ… ಮಾನಸಂಯೋಜನಸ್ಸ… ಭವರಾಗಸಂಯೋಜನಸ್ಸ … ಅವಿಜ್ಜಾಸಂಯೋಜನಸ್ಸ ಪಹಾನಾಯ ಸಮುಚ್ಛೇದಾಯ ಬ್ರಹ್ಮಚರಿಯಂ ವುಸ್ಸತಿ. ಇಮೇಸಂ ಖೋ, ಭಿಕ್ಖವೇ, ಸತ್ತನ್ನಂ ಸಂಯೋಜನಾನಂ ಪಹಾನಾಯ ಸಮುಚ್ಛೇದಾಯ ಬ್ರಹ್ಮಚರಿಯಂ ವುಸ್ಸತಿ. ಯತೋ ಚ ಖೋ, ಭಿಕ್ಖವೇ, ಭಿಕ್ಖುನೋ ಅನುನಯಸಂಯೋಜನಂ ಪಹೀನಂ ಹೋತಿ ಉಚ್ಛಿನ್ನಮೂಲಂ ತಾಲಾವತ್ಥುಕತಂ ಅನಭಾವಂ ಕತಂ ಆಯತಿಂ ಅನುಪ್ಪಾದಧಮ್ಮಂ. ಪಟಿಘಸಂಯೋಜನಂ…ಪೇ… ದಿಟ್ಠಿಸಂಯೋಜನಂ… ವಿಚಿಕಿಚ್ಛಾಸಂಯೋಜನಂ… ಮಾನಸಂಯೋಜನಂ… ಭವರಾಗಸಂಯೋಜನಂ… ಅವಿಜ್ಜಾಸಂಯೋಜನಂ ಪಹೀನಂ ಹೋತಿ ಉಚ್ಛಿನ್ನಮೂಲಂ ತಾಲಾವತ್ಥುಕತಂ ಅನಭಾವಂ ಕತಂ ಆಯತಿಂ ಅನುಪ್ಪಾದಧಮ್ಮಂ. ಅಯಂ ವುಚ್ಚತಿ, ಭಿಕ್ಖವೇ, ಭಿಕ್ಖು ಅಚ್ಛೇಚ್ಛಿ ತಣ್ಹಂ, ವಿವತ್ತಯಿ ಸಂಯೋಜನಂ, ಸಮ್ಮಾ ಮಾನಾಭಿಸಮಯಾ ಅನ್ತಮಕಾಸಿ ದುಕ್ಖಸ್ಸಾ’’ತಿ. ನವಮಂ.