೭. ಪಠಮಸಮಯಸುತ್ತಂ

೨೭. ಅಥ ಖೋ ಅಞ್ಞತರೋ ಭಿಕ್ಖು ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಸೋ ಭಿಕ್ಖು ಭಗವನ್ತಂ ಏತದವೋಚ – ‘‘ಕತಿ ನು ಖೋ, ಭನ್ತೇ, ಸಮಯಾ ಮನೋಭಾವನೀಯಸ್ಸ ಭಿಕ್ಖುನೋ ದಸ್ಸನಾಯ ಉಪಸಙ್ಕಮಿತು’’ನ್ತಿ? ‘‘ಛಯಿಮೇ, ಭಿಕ್ಖು, ಸಮಯಾ ಮನೋಭಾವನೀಯಸ್ಸ ಭಿಕ್ಖುನೋ ದಸ್ಸನಾಯ ಉಪಸಙ್ಕಮಿತುಂ’’.

‘‘ಕತಮೇ ಛ? ಇಧ, ಭಿಕ್ಖು, ಯಸ್ಮಿಂ ಸಮಯೇ ಭಿಕ್ಖು ಕಾಮರಾಗಪರಿಯುಟ್ಠಿತೇನ ಚೇತಸಾ ವಿಹರತಿ ಕಾಮರಾಗಪರೇತೇನ, ಉಪ್ಪನ್ನಸ್ಸ ಚ ಕಾಮರಾಗಸ್ಸ ನಿಸ್ಸರಣಂ ಯಥಾಭೂತಂ ನಪ್ಪಜಾನಾತಿ ತಸ್ಮಿಂ ಸಮಯೇ ಮನೋಭಾವನೀಯೋ ಭಿಕ್ಖು ಉಪಸಙ್ಕಮಿತ್ವಾ ಏವಮಸ್ಸ ವಚನೀಯೋ – ‘ಅಹಂ ಖೋ, ಆವುಸೋ, ಕಾಮರಾಗಪರಿಯುಟ್ಠಿತೇನ ಚೇತಸಾ ವಿಹರಾಮಿ ಕಾಮರಾಗಪರೇತೇನ, ಉಪ್ಪನ್ನಸ್ಸ ಚ ಕಾಮರಾಗಸ್ಸ ನಿಸ್ಸರಣಂ ಯಥಾಭೂತಂ ನಪ್ಪಜಾನಾಮಿ. ಸಾಧು ವತ ಮೇ, ಆಯಸ್ಮಾ, ಕಾಮರಾಗಸ್ಸ ಪಹಾನಾಯ ಧಮ್ಮಂ ದೇಸೇತೂ’ತಿ. ತಸ್ಸ ಮನೋಭಾವನೀಯೋ ಭಿಕ್ಖು ಕಾಮರಾಗಸ್ಸ ಪಹಾನಾಯ ಧಮ್ಮಂ ದೇಸೇತಿ. ಅಯಂ, ಭಿಕ್ಖು, ಪಠಮೋ ಸಮಯೋ ಮನೋಭಾವನೀಯಸ್ಸ ಭಿಕ್ಖುನೋ ದಸ್ಸನಾಯ ಉಪಸಙ್ಕಮಿತುಂ.

‘‘ಪುನ ಚಪರಂ, ಭಿಕ್ಖು, ಯಸ್ಮಿಂ ಸಮಯೇ ಭಿಕ್ಖು ಬ್ಯಾಪಾದಪರಿಯುಟ್ಠಿತೇನ ಚೇತಸಾ ವಿಹರತಿ ಬ್ಯಾಪಾದಪರೇತೇನ, ಉಪ್ಪನ್ನಸ್ಸ ಚ ಬ್ಯಾಪಾದಸ್ಸ ನಿಸ್ಸರಣಂ ಯಥಾಭೂತಂ ನಪ್ಪಜಾನಾತಿ ತಸ್ಮಿಂ ಸಮಯೇ ಮನೋಭಾವನೀಯೋ ಭಿಕ್ಖು ಉಪಸಙ್ಕಮಿತ್ವಾ ಏವಮಸ್ಸ ವಚನೀಯೋ – ‘ಅಹಂ ಖೋ, ಆವುಸೋ, ಬ್ಯಾಪಾದಪರಿಯುಟ್ಠಿತೇನ ಚೇತಸಾ ವಿಹರಾಮಿ ಬ್ಯಾಪಾದಪರೇತೇನ, ಉಪ್ಪನ್ನಸ್ಸ ಚ ಬ್ಯಾಪಾದಸ್ಸ ನಿಸ್ಸರಣಂ ಯಥಾಭೂತಂ ನಪ್ಪಜಾನಾಮಿ. ಸಾಧು ವತ ಮೇ, ಆಯಸ್ಮಾ, ಬ್ಯಾಪಾದಸ್ಸ ಪಹಾನಾಯ ಧಮ್ಮಂ ದೇಸೇತೂ’ತಿ. ತಸ್ಸ ಮನೋಭಾವನೀಯೋ ಭಿಕ್ಖು ಬ್ಯಾಪಾದಸ್ಸ ಪಹಾನಾಯ ಧಮ್ಮಂ ದೇಸೇತಿ. ಅಯಂ, ಭಿಕ್ಖು, ದುತಿಯೋ ಸಮಯೋ ಮನೋಭಾವನೀಯಸ್ಸ ಭಿಕ್ಖುನೋ ದಸ್ಸನಾಯ ಉಪಸಙ್ಕಮಿತುಂ.

‘‘ಪುನ ಚಪರಂ, ಭಿಕ್ಖು, ಯಸ್ಮಿಂ ಸಮಯೇ ಭಿಕ್ಖು ಥಿನಮಿದ್ಧಪರಿಯುಟ್ಠಿತೇನ ಚೇತಸಾ ವಿಹರತಿ ಥಿನಮಿದ್ಧಪರೇತೇನ, ಉಪ್ಪನ್ನಸ್ಸ ಚ ಥಿನಮಿದ್ಧಸ್ಸ ನಿಸ್ಸರಣಂ ಯಥಾಭೂತಂ ನಪ್ಪಜಾನಾತಿ ತಸ್ಮಿಂ ಸಮಯೇ ಮನೋಭಾವನೀಯೋ ಭಿಕ್ಖು ಉಪಸಙ್ಕಮಿತ್ವಾ ಏವಮಸ್ಸ ವಚನೀಯೋ – ‘ಅಹಂ ಖೋ, ಆವುಸೋ, ಥಿನಮಿದ್ಧಪರಿಯುಟ್ಠಿತೇನ ಚೇತಸಾ ವಿಹರಾಮಿ ಥಿನಮಿದ್ಧಪರೇತೇನ, ಉಪ್ಪನ್ನಸ್ಸ ಚ ಥಿನಮಿದ್ಧಸ್ಸ ನಿಸ್ಸರಣಂ ಯಥಾಭೂತಂ ನಪ್ಪಜಾನಾಮಿ. ಸಾಧು ವತ ಮೇ, ಆಯಸ್ಮಾ, ಥಿನಮಿದ್ಧಸ್ಸ ಪಹಾನಾಯ ಧಮ್ಮಂ ದೇಸೇತೂ’ತಿ. ತಸ್ಸ ಮನೋಭಾವನೀಯೋ ಭಿಕ್ಖು ಥಿನಮಿದ್ಧಸ್ಸ ಪಹಾನಾಯ ಧಮ್ಮಂ ದೇಸೇತಿ. ಅಯಂ, ಭಿಕ್ಖು, ತತಿಯೋ ಸಮಯೋ ಮನೋಭಾವನೀಯಸ್ಸ ಭಿಕ್ಖುನೋ ದಸ್ಸನಾಯ ಉಪಸಙ್ಕಮಿತುಂ.

‘‘ಪುನ ಚಪರಂ, ಭಿಕ್ಖು, ಯಸ್ಮಿಂ ಸಮಯೇ ಭಿಕ್ಖು ಉದ್ಧಚ್ಚಕುಕ್ಕುಚ್ಚಪರಿಯುಟ್ಠಿತೇನ ಚೇತಸಾ ವಿಹರತಿ ಉದ್ಧಚ್ಚಕುಕ್ಕುಚ್ಚಪರೇತೇನ, ಉಪ್ಪನ್ನಸ್ಸ ಚ ಉದ್ಧಚ್ಚಕುಕ್ಕುಚ್ಚಸ್ಸ ನಿಸ್ಸರಣಂ ಯಥಾಭೂತಂ ನಪ್ಪಜಾನಾತಿ ತಸ್ಮಿಂ ಸಮಯೇ ಮನೋಭಾವನೀಯೋ ಭಿಕ್ಖು ಉಪಸಙ್ಕಮಿತ್ವಾ ಏವಮಸ್ಸ ವಚನೀಯೋ – ‘ಅಹಂ ಖೋ, ಆವುಸೋ, ಉದ್ಧಚ್ಚಕುಕ್ಕುಚ್ಚಪರಿಯುಟ್ಠಿತೇನ ಚೇತಸಾ ವಿಹರಾಮಿ ಉದ್ಧಚ್ಚಕುಕ್ಕುಚ್ಚಪರೇತೇನ, ಉಪ್ಪನ್ನಸ್ಸ ಚ ಉದ್ಧಚ್ಚಕುಕ್ಕುಚ್ಚಸ್ಸ ನಿಸ್ಸರಣಂ ಯಥಾಭೂತಂ ನಪ್ಪಜಾನಾಮಿ. ಸಾಧು ವತ ಮೇ, ಆಯಸ್ಮಾ, ಉದ್ಧಚ್ಚಕುಕ್ಕುಚ್ಚಸ್ಸ ಪಹಾನಾಯ ಧಮ್ಮಂ ದೇಸೇತೂ’ತಿ. ತಸ್ಸ ಮನೋಭಾವನೀಯೋ ಭಿಕ್ಖು ಉದ್ಧಚ್ಚಕುಕ್ಕುಚ್ಚಸ್ಸ ಪಹಾನಾಯ ಧಮ್ಮಂ ದೇಸೇತಿ. ಅಯಂ, ಭಿಕ್ಖು, ಚತುತ್ಥೋ ಸಮಯೋ ಮನೋಭಾವನೀಯಸ್ಸ ಭಿಕ್ಖುನೋ ದಸ್ಸನಾಯ ಉಪಸಙ್ಕಮಿತುಂ.

‘‘ಪುನ ಚಪರಂ, ಭಿಕ್ಖು, ಯಸ್ಮಿಂ ಸಮಯೇ ಭಿಕ್ಖು ವಿಚಿಕಿಚ್ಛಾಪರಿಯುಟ್ಠಿತೇನ ಚೇತಸಾ ವಿಹರತಿ ವಿಚಿಕಿಚ್ಛಾಪರೇತೇನ, ಉಪ್ಪನ್ನಾಯ ಚ ವಿಚಿಕಿಚ್ಛಾಯ ನಿಸ್ಸರಣಂ ಯಥಾಭೂತಂ ನಪ್ಪಜಾನಾತಿ ತಸ್ಮಿಂ ಸಮಯೇ ಮನೋಭಾವನೀಯೋ ಭಿಕ್ಖು ಉಪಸಙ್ಕಮಿತ್ವಾ ಏವಮಸ್ಸ ವಚನೀಯೋ – ‘ಅಹಂ, ಆವುಸೋ, ವಿಚಿಕಿಚ್ಛಾಪರಿಯುಟ್ಠಿತೇನ ಚೇತಸಾ ವಿಹರಾಮಿ ವಿಚಿಕಿಚ್ಛಾಪರೇತೇನ, ಉಪ್ಪನ್ನಾಯ ಚ ವಿಚಿಕಿಚ್ಛಾಯ ನಿಸ್ಸರಣಂ ಯಥಾಭೂತಂ ನಪ್ಪಜಾನಾಮಿ. ಸಾಧು ವತ ಮೇ, ಆಯಸ್ಮಾ, ವಿಚಿಕಿಚ್ಛಾಯ ಪಹಾನಾಯ ಧಮ್ಮಂ ದೇಸೇತೂ’ತಿ. ತಸ್ಸ ಮನೋಭಾವನೀಯೋ ಭಿಕ್ಖು ವಿಚಿಕಿಚ್ಛಾಯ ಪಹಾನಾಯ ಧಮ್ಮಂ ದೇಸೇತಿ. ಅಯಂ, ಭಿಕ್ಖು, ಪಞ್ಚಮೋ ಸಮಯೋ ಮನೋಭಾವನೀಯಸ್ಸ ಭಿಕ್ಖುನೋ ದಸ್ಸನಾಯ ಉಪಸಙ್ಕಮಿತುಂ.

‘‘ಪುನ ಚಪರಂ, ಭಿಕ್ಖು, ಯಸ್ಮಿಂ ಸಮಯೇ ಭಿಕ್ಖು ಯಂ ನಿಮಿತ್ತಂ ಆಗಮ್ಮ ಯಂ ನಿಮಿತ್ತಂ ಮನಸಿಕರೋತೋ ಅನನ್ತರಾ ಆಸವಾನಂ ಖಯೋ ಹೋತಿ ತಂ ನಿಮಿತ್ತಂ ನಪ್ಪಜಾನಾತಿ ತಸ್ಮಿಂ ಸಮಯೇ ಮನೋಭಾವನೀಯೋ ಭಿಕ್ಖು ಉಪಸಙ್ಕಮಿತ್ವಾ ಏವಮಸ್ಸ ವಚನೀಯೋ – ‘ಅಹಂ ಖೋ, ಆವುಸೋ, ಯಂ ನಿಮಿತ್ತಂ ಆಗಮ್ಮ ಯಂ ನಿಮಿತ್ತಂ ಮನಸಿಕರೋತೋ ಅನನ್ತರಾ ಆಸವಾನಂ ಖಯೋ ಹೋತಿ, ತಂ ನಿಮಿತ್ತಂ ನಪ್ಪಜಾನಾಮಿ. ಸಾಧು ವತ ಮೇ, ಆಯಸ್ಮಾ, ಆಸವಾನಂ ಖಯಾಯ ಧಮ್ಮಂ ದೇಸೇತೂ’ತಿ. ತಸ್ಸ ಮನೋಭಾವನೀಯೋ ಭಿಕ್ಖು ಆಸವಾನಂ ಖಯಾಯ ಧಮ್ಮಂ ದೇಸೇತಿ. ಅಯಂ, ಭಿಕ್ಖು, ಛಟ್ಠೋ ಸಮಯೋ ಮನೋಭಾವನೀಯಸ್ಸ ಭಿಕ್ಖುನೋ ದಸ್ಸನಾಯ ಉಪಸಙ್ಕಮಿತುಂ. ಇಮೇ ಖೋ, ಭಿಕ್ಖು, ಛ ಸಮಯಾ ಮನೋಭಾವನೀಯಸ್ಸ ಭಿಕ್ಖುನೋ ದಸ್ಸನಾಯ ಉಪಸಙ್ಕಮಿತು’’ನ್ತಿ. ಸತ್ತಮಂ.