೪. ಹಿಮವನ್ತಸುತ್ತಂ

೨೪. ‘‘ಛಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಭಿಕ್ಖು ಹಿಮವನ್ತಂ ಪಬ್ಬತರಾಜಂ ಪದಾಲೇಯ್ಯ, ಕೋ ಪನ ವಾದೋ ಛವಾಯ ಅವಿಜ್ಜಾಯ! ಕತಮೇಹಿ ಛಹಿ? ಇಧ, ಭಿಕ್ಖವೇ, ಭಿಕ್ಖು ಸಮಾಧಿಸ್ಸ ಸಮಾಪತ್ತಿಕುಸಲೋ ಹೋತಿ, ಸಮಾಧಿಸ್ಸ ಠಿತಿಕುಸಲೋ ಹೋತಿ, ಸಮಾಧಿಸ್ಸ ವುಟ್ಠಾನಕುಸಲೋ ಹೋತಿ, ಸಮಾಧಿಸ್ಸ ಕಲ್ಲಿತಕುಸಲೋ [ಕಲ್ಲತಾಕುಸಲೋ (ಸ್ಯಾ. ಕಂ. ಕ.) ಸಂ. ನಿ. ೩.೬೬೫ ಪಸ್ಸಿತಬ್ಬಂ] ಹೋತಿ, ಸಮಾಧಿಸ್ಸ ಗೋಚರಕುಸಲೋ ಹೋತಿ, ಸಮಾಧಿಸ್ಸ ಅಭಿನೀಹಾರಕುಸಲೋ ಹೋತಿ. ಇಮೇಹಿ ಖೋ, ಭಿಕ್ಖವೇ, ಛಹಿ ಧಮ್ಮೇಹಿ ಸಮನ್ನಾಗತೋ ಭಿಕ್ಖು ಹಿಮವನ್ತಂ ಪಬ್ಬತರಾಜಂ ಪದಾಲೇಯ್ಯ, ಕೋ ಪನ ವಾದೋ ಛವಾಯ ಅವಿಜ್ಜಾಯಾ’’ತಿ! ಚತುತ್ಥಂ.