೫. ಕುಲಸುತ್ತಂ

೨೫೮. ‘‘ಯಾನಿ ಕಾನಿಚಿ, ಭಿಕ್ಖವೇ, ಕುಲಾನಿ ಭೋಗೇಸು ಮಹತ್ತಂ ಪತ್ತಾನಿ ನ ಚಿರಟ್ಠಿತಿಕಾನಿ ಭವನ್ತಿ, ಸಬ್ಬಾನಿ ತಾನಿ ಚತೂಹಿ ಠಾನೇಹಿ, ಏತೇಸಂ ವಾ ಅಞ್ಞತರೇನ. ಕತಮೇಹಿ ಚತೂಹಿ? ನಟ್ಠಂ ನ ಗವೇಸನ್ತಿ, ಜಿಣ್ಣಂ ನ ಪಟಿಸಙ್ಖರೋನ್ತಿ, ಅಪರಿಮಿತಪಾನಭೋಜನಾ ಹೋನ್ತಿ, ದುಸ್ಸೀಲಂ ಇತ್ಥಿಂ ವಾ ಪುರಿಸಂ ವಾ ಆಧಿಪಚ್ಚೇ ಠಪೇನ್ತಿ. ಯಾನಿ ಕಾನಿಚಿ, ಭಿಕ್ಖವೇ, ಕುಲಾನಿ ಭೋಗೇಸು ಮಹತ್ತಂ ಪತ್ತಾನಿ ನ ಚಿರಟ್ಠಿತಿಕಾನಿ ಭವನ್ತಿ, ಸಬ್ಬಾನಿ ತಾನಿ ಇಮೇಹಿ ಚತೂಹಿ ಠಾನೇಹಿ, ಏತೇಸಂ ವಾ ಅಞ್ಞತರೇನ.

‘‘ಯಾನಿ ಕಾನಿಚಿ, ಭಿಕ್ಖವೇ, ಕುಲಾನಿ ಭೋಗೇಸು ಮಹತ್ತಂ ಪತ್ತಾನಿ ಚಿರಟ್ಠಿತಿಕಾನಿ ಭವನ್ತಿ, ಸಬ್ಬಾನಿ ತಾನಿ ಚತೂಹಿ ಠಾನೇಹಿ, ಏತೇಸಂ ವಾ ಅಞ್ಞತರೇನ. ಕತಮೇಹಿ ಚತೂಹಿ? ನಟ್ಠಂ ಗವೇಸನ್ತಿ, ಜಿಣ್ಣಂ ಪಟಿಸಙ್ಖರೋನ್ತಿ, ಪರಿಮಿತಪಾನಭೋಜನಾ ಹೋನ್ತಿ, ಸೀಲವನ್ತಂ ಇತ್ಥಿಂ ವಾ ಪುರಿಸಂ ವಾ ಆಧಿಪಚ್ಚೇ ಠಪೇನ್ತಿ. ಯಾನಿ ಕಾನಿಚಿ, ಭಿಕ್ಖವೇ, ಕುಲಾನಿ ಭೋಗೇಸು ಮಹತ್ತಂ ಪತ್ತಾನಿ ಚಿರಟ್ಠಿತಿಕಾನಿ ಭವನ್ತಿ, ಸಬ್ಬಾನಿ ತಾನಿ ಇಮೇಹಿ ಚತೂಹಿ ಠಾನೇಹಿ, ಏತೇಸಂ ವಾ ಅಞ್ಞತರೇನಾ’’ತಿ. ಪಞ್ಚಮಂ.