೪. ದುತಿಯಕೋಧಗರುಸುತ್ತಂ

೪೪. ‘‘ಚತ್ತಾರೋಮೇ, ಭಿಕ್ಖವೇ, ಅಸದ್ಧಮ್ಮಾ. ಕತಮೇ ಚತ್ತಾರೋ? ಕೋಧಗರುತಾ ನ ಸದ್ಧಮ್ಮಗರುತಾ, ಮಕ್ಖಗರುತಾ ನ ಸದ್ಧಮ್ಮಗರುತಾ, ಲಾಭಗರುತಾ ನ ಸದ್ಧಮ್ಮಗರುತಾ, ಸಕ್ಕಾರಗರುತಾ ನ ಸದ್ಧಮ್ಮಗರುತಾ. ಇಮೇ ಖೋ, ಭಿಕ್ಖವೇ, ಚತ್ತಾರೋ ಅಸದ್ಧಮ್ಮಾ.

‘‘ಚತ್ತಾರೋಮೇ, ಭಿಕ್ಖವೇ, ಸದ್ಧಮ್ಮಾ. ಕತಮೇ ಚತ್ತಾರೋ? ಸದ್ಧಮ್ಮಗರುತಾ ನ ಕೋಧಗರುತಾ, ಸದ್ಧಮ್ಮಗರುತಾ ನ ಮಕ್ಖಗರುತಾ, ಸದ್ಧಮ್ಮಗರುತಾ ನ ಲಾಭಗರುತಾ, ಸದ್ಧಮ್ಮಗರುತಾ ನ ಸಕ್ಕಾರಗರುತಾ. ಇಮೇ ಖೋ, ಭಿಕ್ಖವೇ, ಚತ್ತಾರೋ ಸದ್ಧಮ್ಮಾ’’ತಿ.

‘‘ಕೋಧಮಕ್ಖಗರು ಭಿಕ್ಖು, ಲಾಭಸಕ್ಕಾರಗಾರವೋ;

ಸುಖೇತ್ತೇ ಪೂತಿಬೀಜಂವ, ಸದ್ಧಮ್ಮೇ ನ ವಿರೂಹತಿ.

‘‘ಯೇ ಚ ಸದ್ಧಮ್ಮಗರುನೋ, ವಿಹಂಸು ವಿಹರನ್ತಿ ಚ;

ತೇ ವೇ ಧಮ್ಮೇ ವಿರೂಹನ್ತಿ, ಸ್ನೇಹಾನ್ವಯಮಿವೋಸಧಾ’’ತಿ [ಸ್ನೇಹಮನ್ವಾಯಮಿವೋಸಧಾತಿ (ಸೀ. ಸ್ಯಾ. ಕಂ. ಪೀ.)]. ಚತುತ್ಥಂ;