೨. ಪಞ್ಹಬ್ಯಾಕರಣಸುತ್ತಂ

೪೨. ‘‘ಚತ್ತಾರಿಮಾನಿ, ಭಿಕ್ಖವೇ, ಪಞ್ಹಬ್ಯಾಕರಣಾನಿ [ಪಞ್ಹಾಬ್ಯಾಕರಣಾನಿ (ಕ.)]. ಕತಮಾನಿ ಚತ್ತಾರಿ? ಅತ್ಥಿ, ಭಿಕ್ಖವೇ, ಪಞ್ಹೋ ಏಕಂಸಬ್ಯಾಕರಣೀಯೋ; ಅತ್ಥಿ, ಭಿಕ್ಖವೇ, ಪಞ್ಹೋ ವಿಭಜ್ಜಬ್ಯಾಕರಣೀಯೋ; ಅತ್ಥಿ, ಭಿಕ್ಖವೇ, ಪಞ್ಹೋ ಪಟಿಪುಚ್ಛಾಬ್ಯಾಕರಣೀಯೋ; ಅತ್ಥಿ, ಭಿಕ್ಖವೇ, ಪಞ್ಹೋ ಠಪನೀಯೋ. ಇಮಾನಿ ಖೋ, ಭಿಕ್ಖವೇ, ಚತ್ತಾರಿ ಪಞ್ಹಬ್ಯಾಕರಣಾನೀ’’ತಿ.

‘‘ಏಕಂಸವಚನಂ ಏಕಂ, ವಿಭಜ್ಜವಚನಾಪರಂ;

ತತಿಯಂ ಪಟಿಪುಚ್ಛೇಯ್ಯ, ಚತುತ್ಥಂ ಪನ ಠಾಪಯೇ.

‘‘ಯೋ ಚ ತೇಸಂ [ನೇಸಂ (ಸೀ. ಸ್ಯಾ. ಕಂ.)] ತತ್ಥ ತತ್ಥ, ಜಾನಾತಿ ಅನುಧಮ್ಮತಂ;

ಚತುಪಞ್ಹಸ್ಸ ಕುಸಲೋ, ಆಹು ಭಿಕ್ಖುಂ ತಥಾವಿಧಂ.

‘‘ದುರಾಸದೋ ದುಪ್ಪಸಹೋ, ಗಮ್ಭೀರೋ ದುಪ್ಪಧಂಸಿಯೋ;

ಅಥೋ ಅತ್ಥೇ ಅನತ್ಥೇ ಚ, ಉಭಯಸ್ಸ ಹೋತಿ ಕೋವಿದೋ [ಉಭಯತ್ಥಸ್ಸ ಕೋವಿದೋ (ಸ್ಯಾ. ಕಂ.)].

‘‘ಅನತ್ಥಂ ಪರಿವಜ್ಜೇತಿ, ಅತ್ಥಂ ಗಣ್ಹಾತಿ ಪಣ್ಡಿತೋ;

ಅತ್ಥಾಭಿಸಮಯಾ ಧೀರೋ, ಪಣ್ಡಿತೋತಿ ಪವುಚ್ಚತೀ’’ತಿ. ದುತಿಯಂ;