೨. ಸಙ್ಗಹಸುತ್ತಂ

೩೨. ‘‘ಚತ್ತಾರಿಮಾನಿ, ಭಿಕ್ಖವೇ, ಸಙ್ಗಹವತ್ಥೂನಿ. ಕತಮಾನಿ ಚತ್ತಾರಿ? ದಾನಂ, ಪೇಯ್ಯವಜ್ಜಂ, ಅತ್ಥಚರಿಯಾ, ಸಮಾನತ್ತತಾ – ಇಮಾನಿ ಖೋ, ಭಿಕ್ಖವೇ, ಚತ್ತಾರಿ ಸಙ್ಗಹವತ್ಥೂನೀ’’ತಿ.

‘‘ದಾನಞ್ಚ ಪೇಯ್ಯವಜ್ಜಞ್ಚ [ಸಙ್ಗಹೇ (ಅಟ್ಠಕಥಾಯಂ ಪಾಠನ್ತರಂ) ದೀ. ನಿ. ೩.೨೭೩ ಪಸ್ಸಿತಬ್ಬಂ], ಅತ್ಥಚರಿಯಾ ಚ ಯಾ ಇಧ;

ಸಮಾನತ್ತತಾ ಚ ಧಮ್ಮೇಸು, ತತ್ಥ ತತ್ಥ ಯಥಾರಹಂ;

ಏತೇ ಖೋ ಸಙ್ಗಹಾ ಲೋಕೇ, ರಥಸ್ಸಾಣೀವ ಯಾಯತೋ.

‘‘ಏತೇ ಚ ಸಙ್ಗಹಾ ನಾಸ್ಸು, ನ ಮಾತಾ ಪುತ್ತಕಾರಣಾ;

ಲಭೇಥ ಮಾನಂ ಪೂಜಂ ವಾ, ಪಿತಾ ವಾ ಪುತ್ತಕಾರಣಾ.

‘‘ಯಸ್ಮಾ ಚ ಸಙ್ಗಹಾ [ಸಙ್ಗಹೇ (ಅಟ್ಠಕಥಾಯಂ ಪಾಠನ್ತರಂ) ದೀ. ನಿ. ೩.೨೭೩ ಪಸ್ಸಿತಬ್ಬಂ] ಏತೇ, ಸಮವೇಕ್ಖನ್ತಿ ಪಣ್ಡಿತಾ;

ತಸ್ಮಾ ಮಹತ್ತಂ ಪಪ್ಪೋನ್ತಿ, ಪಾಸಂಸಾ ಚ ಭವನ್ತಿ ತೇ’’ತಿ. ದುತಿಯಂ;