೧೦. ಉದಾಯೀಸುತ್ತಂ

೪೦. ಅಥ ಖೋ ಉದಾಯೀ [ಉದಾಯಿ (ಸಬ್ಬತ್ಥ)] ಬ್ರಾಹ್ಮಣೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವತಾ …ಪೇ… ಏಕಮನ್ತಂ ನಿಸಿನ್ನೋ ಖೋ ಉದಾಯೀ ಬ್ರಾಹ್ಮಣೋ ಭಗವನ್ತಂ ಏತದವೋಚ – ‘‘ಭವಮ್ಪಿ ನೋ ಗೋತಮೋ ಯಞ್ಞಂ ವಣ್ಣೇತೀ’’ತಿ? ‘‘ನ ಖೋ ಅಹಂ, ಬ್ರಾಹ್ಮಣ, ಸಬ್ಬಂ ಯಞ್ಞಂ ವಣ್ಣೇಮಿ; ನ ಪನಾಹಂ, ಬ್ರಾಹ್ಮಣ, ಸಬ್ಬಂ ಯಞ್ಞಂ ನ ವಣ್ಣೇಮಿ. ಯಥಾರೂಪೇ ಖೋ, ಬ್ರಾಹ್ಮಣ, ಯಞ್ಞೇ ಗಾವೋ ಹಞ್ಞನ್ತಿ, ಅಜೇಳಕಾ ಹಞ್ಞನ್ತಿ, ಕುಕ್ಕುಟಸೂಕರಾ ಹಞ್ಞನ್ತಿ, ವಿವಿಧಾ ಪಾಣಾ ಸಙ್ಘಾತಂ ಆಪಜ್ಜನ್ತಿ; ಏವರೂಪಂ ಖೋ ಅಹಂ, ಬ್ರಾಹ್ಮಣ, ಸಾರಮ್ಭಂ ಯಞ್ಞಂ ನ ವಣ್ಣೇಮಿ. ತಂ ಕಿಸ್ಸ ಹೇತು? ಏವರೂಪಞ್ಹಿ, ಬ್ರಾಹ್ಮಣ, ಸಾರಮ್ಭಂ ಯಞ್ಞಂ ನ ಉಪಸಙ್ಕಮನ್ತಿ ಅರಹನ್ತೋ ವಾ ಅರಹತ್ತಮಗ್ಗಂ ವಾ ಸಮಾಪನ್ನಾ.

‘‘ಯಥಾರೂಪೇ ಚ ಖೋ, ಬ್ರಾಹ್ಮಣ, ಯಞ್ಞೇ ನೇವ ಗಾವೋ ಹಞ್ಞನ್ತಿ, ನ ಅಜೇಳಕಾ ಹಞ್ಞನ್ತಿ, ನ ಕುಕ್ಕುಟಸೂಕರಾ ಹಞ್ಞನ್ತಿ, ನ ವಿವಿಧಾ ಪಾಣಾ ಸಙ್ಘಾತಂ ಆಪಜ್ಜನ್ತಿ; ಏವರೂಪಂ ಖೋ ಅಹಂ, ಬ್ರಾಹ್ಮಣ, ನಿರಾರಮ್ಭಂ ಯಞ್ಞಂ ವಣ್ಣೇಮಿ, ಯದಿದಂ ನಿಚ್ಚದಾನಂ ಅನುಕುಲಯಞ್ಞಂ. ತಂ ಕಿಸ್ಸ ಹೇತು? ಏವರೂಪಞ್ಹಿ, ಬ್ರಾಹ್ಮಣ, ನಿರಾರಮ್ಭಂ ಯಞ್ಞಂ ಉಪಸಙ್ಕಮನ್ತಿ ಅರಹನ್ತೋ ವಾ ಅರಹತ್ತಮಗ್ಗಂ ವಾ ಸಮಾಪನ್ನಾ’’ತಿ.

‘‘ಅಭಿಸಙ್ಖತಂ ನಿರಾರಮ್ಭಂ, ಯಞ್ಞಂ ಕಾಲೇನ ಕಪ್ಪಿಯಂ;

ತಾದಿಸಂ ಉಪಸಂಯನ್ತಿ, ಸಞ್ಞತಾ ಬ್ರಹ್ಮಚಾರಯೋ.

‘‘ವಿವಟಚ್ಛದಾ [ವಿವತ್ತಚ್ಛದಾ (ಸೀ. ಪೀ.), ವಿವಟ್ಟಚ್ಛದಾ (ಕ.)] ಯೇ ಲೋಕೇ, ವೀತಿವತ್ತಾ ಕುಲಂ ಗತಿಂ;

ಯಞ್ಞಮೇತಂ ಪಸಂಸನ್ತಿ, ಬುದ್ಧಾ ಯಞ್ಞಸ್ಸ [ಪುಞ್ಞಸ್ಸ (ಸ್ಯಾ. ಕಂ. ಪೀ.)] ಕೋವಿದಾ.

‘‘ಯಞ್ಞೇ ವಾ ಯದಿ ವಾ ಸದ್ಧೇ, ಹಬ್ಯಂ [ಹವ್ಯಂ (ಸೀ. ಪೀ.), ಹುಞ್ಞಂ (ಸ್ಯಾ. ಕಂ.)] ಕತ್ವಾ ಯಥಾರಹಂ;

ಪಸನ್ನಚಿತ್ತೋ ಯಜತಿ [ಪಸನ್ನಚಿತ್ತಾ ಯಜನ್ತಿ (ಕ.)], ಸುಖೇತ್ತೇ ಬ್ರಹ್ಮಚಾರಿಸು.

‘‘ಸುಹುತಂ ಸುಯಿಟ್ಠಂ ಸುಪ್ಪತ್ತಂ [ಸಮ್ಪತ್ತಂ (ಸ್ಯಾ. ಕಂ. ಕ.)], ದಕ್ಖಿಣೇಯ್ಯೇಸು ಯಂ ಕತಂ;

ಯಞ್ಞೋ ಚ ವಿಪುಲೋ ಹೋತಿ, ಪಸೀದನ್ತಿ ಚ ದೇವತಾ.

‘‘ಏವಂ [ಏತಂ (ಕ.) ಅ. ನಿ. ೬.೩೭] ಯಜಿತ್ವಾ ಮೇಧಾವೀ, ಸದ್ಧೋ ಮುತ್ತೇನ ಚೇತಸಾ;

ಅಬ್ಯಾಬಜ್ಝಂ ಸುಖಂ ಲೋಕಂ, ಪಣ್ಡಿತೋ ಉಪಪಜ್ಜತೀ’’ತಿ. ದಸಮಂ;

ಚಕ್ಕವಗ್ಗೋ ಚತುತ್ಥೋ.