೩. ಮಹಾನಾಮಸಕ್ಕಸುತ್ತಂ

೭೪. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ಸಕ್ಕೇಸು ವಿಹರತಿ ಕಪಿಲವತ್ಥುಸ್ಮಿಂ ನಿಗ್ರೋಧಾರಾಮೇ. ತೇನ ಖೋ ಪನ ಸಮಯೇನ ಭಗವಾ ಗಿಲಾನಾವುಟ್ಠಿತೋ [ಗಿಲಾನವುಟ್ಠಿತೋ (ಸದ್ದನೀತಿ)] ಹೋತಿ ಅಚಿರವುಟ್ಠಿತೋ ಗೇಲಞ್ಞಾ. ಅಥ ಖೋ ಮಹಾನಾಮೋ ಸಕ್ಕೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಮಹಾನಾಮೋ ಸಕ್ಕೋ ಭಗವನ್ತಂ ಏತದವೋಚ – ‘‘ದೀಘರತ್ತಾಹಂ, ಭನ್ತೇ, ಭಗವತಾ ಏವಂ ಧಮ್ಮಂ ದೇಸಿತಂ ಆಜಾನಾಮಿ – ‘ಸಮಾಹಿತಸ್ಸ ಞಾಣಂ, ನೋ ಅಸಮಾಹಿತಸ್ಸಾ’ತಿ. ಸಮಾಧಿ ನು ಖೋ, ಭನ್ತೇ, ಪುಬ್ಬೇ, ಪಚ್ಛಾ ಞಾಣಂ; ಉದಾಹು ಞಾಣಂ ಪುಬ್ಬೇ, ಪಚ್ಛಾ ಸಮಾಧೀ’’ತಿ? ಅಥ ಖೋ ಆಯಸ್ಮತೋ ಆನನ್ದಸ್ಸ ಏತದಹೋಸಿ – ‘‘ಭಗವಾ ಖೋ ಗಿಲಾನವುಟ್ಠಿತೋ ಅಚಿರವುಟ್ಠಿತೋ ಗೇಲಞ್ಞಾ. ಅಯಞ್ಚ ಮಹಾನಾಮೋ ಸಕ್ಕೋ ಭಗವನ್ತಂ ಅತಿಗಮ್ಭೀರಂ ಪಞ್ಹಂ ಪುಚ್ಛತಿ. ಯಂನೂನಾಹಂ ಮಹಾನಾಮಂ ಸಕ್ಕಂ ಏಕಮನ್ತಂ ಅಪನೇತ್ವಾ ಧಮ್ಮಂ ದೇಸೇಯ್ಯ’’ನ್ತಿ.

ಅಥ ಖೋ ಆಯಸ್ಮಾ ಆನನ್ದೋ ಮಹಾನಾಮಂ ಸಕ್ಕಂ ಬಾಹಾಯಂ ಗಹೇತ್ವಾ ಏಕಮನ್ತಂ ಅಪನೇತ್ವಾ ಮಹಾನಾಮಂ ಸಕ್ಕಂ ಏತದವೋಚ – ‘‘ಸೇಖಮ್ಪಿ ಖೋ, ಮಹಾನಾಮ, ಸೀಲಂ ವುತ್ತಂ ಭಗವತಾ, ಅಸೇಖಮ್ಪಿ ಸೀಲಂ ವುತ್ತಂ ಭಗವತಾ; ಸೇಖೋಪಿ ಸಮಾಧಿ ವುತ್ತೋ ಭಗವತಾ, ಅಸೇಖೋಪಿ ಸಮಾಧಿ ವುತ್ತೋ ಭಗವತಾ; ಸೇಖಾಪಿ ಪಞ್ಞಾ ವುತ್ತಾ ಭಗವತಾ, ಅಸೇಖಾಪಿ ಪಞ್ಞಾ ವುತ್ತಾ ಭಗವತಾ. ಕತಮಞ್ಚ, ಮಹಾನಾಮ, ಸೇಖಂ ಸೀಲಂ? ಇಧ, ಮಹಾನಾಮ, ಭಿಕ್ಖು ಸೀಲವಾ ಹೋತಿ ಪಾತಿಮೋಕ್ಖಸಂವರಸಂವುತೋ ವಿಹರತಿ…ಪೇ… ಸಮಾದಾಯ ಸಿಕ್ಖತಿ ಸಿಕ್ಖಾಪದೇಸು. ಇದಂ ವುಚ್ಚತಿ, ಮಹಾನಾಮ, ಸೇಖಂ ಸೀಲಂ’’.

‘‘ಕತಮೋ ಚ, ಮಹಾನಾಮ, ಸೇಖೋ ಸಮಾಧಿ? ಇಧ, ಮಹಾನಾಮ, ಭಿಕ್ಖು ವಿವಿಚ್ಚೇವ ಕಾಮೇಹಿ…ಪೇ… ಚತುತ್ಥಂ ಝಾನಂ ಉಪಸಮ್ಪಜ್ಜ ವಿಹರತಿ. ಅಯಂ ವುಚ್ಚತಿ, ಮಹಾನಾಮ, ಸೇಖೋ ಸಮಾಧಿ.

‘‘ಕತಮಾ ಚ, ಮಹಾನಾಮ, ಸೇಖಾ ಪಞ್ಞಾ? ಇಧ, ಮಹಾನಾಮ, ಭಿಕ್ಖು ಇದಂ ದುಕ್ಖನ್ತಿ ಯಥಾಭೂತಂ ಪಜಾನಾತಿ…ಪೇ… ಅಯಂ ದುಕ್ಖನಿರೋಧಗಾಮಿನೀ ಪಟಿಪದಾತಿ ಯಥಾಭೂತಂ ಪಜಾನಾತಿ. ಅಯಂ ವುಚ್ಚತಿ, ಮಹಾನಾಮ, ಸೇಖಾ ಪಞ್ಞಾ.

‘‘ಸ ಖೋ ಸೋ, ಮಹಾನಾಮ, ಅರಿಯಸಾವಕೋ ಏವಂ ಸೀಲಸಮ್ಪನ್ನೋ ಏವಂ ಸಮಾಧಿಸಮ್ಪನ್ನೋ ಏವಂ ಪಞ್ಞಾಸಮ್ಪನ್ನೋ ಆಸವಾನಂ ಖಯಾ ಅನಾಸವಂ ಚೇತೋವಿಮುತ್ತಿಂ ಪಞ್ಞಾವಿಮುತ್ತಿಂ ದಿಟ್ಠೇವ ಧಮ್ಮೇ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಉಪಸಮ್ಪಜ್ಜ ವಿಹರತಿ. ಏವಂ ಖೋ, ಮಹಾನಾಮ, ಸೇಖಮ್ಪಿ ಸೀಲಂ ವುತ್ತಂ ಭಗವತಾ, ಅಸೇಖಮ್ಪಿ ಸೀಲಂ ವುತ್ತಂ ಭಗವತಾ; ಸೇಖೋಪಿ ಸಮಾಧಿ ವುತ್ತೋ ಭಗವತಾ, ಅಸೇಖೋಪಿ ಸಮಾಧಿ ವುತ್ತೋ ಭಗವತಾ; ಸೇಖಾಪಿ ಪಞ್ಞಾ ವುತ್ತಾ ಭಗವತಾ, ಅಸೇಖಾಪಿ ಪಞ್ಞಾ ವುತ್ತಾ ಭಗವತಾ’’ತಿ. ತತಿಯಂ.