೫. ಪಣ್ಡಿತಸುತ್ತಂ

೪೫. ‘‘ತೀಣಿಮಾನಿ, ಭಿಕ್ಖವೇ, ಪಣ್ಡಿತಪಞ್ಞತ್ತಾನಿ ಸಪ್ಪುರಿಸಪಞ್ಞತ್ತಾನಿ. ಕತಮಾನಿ ತೀಣಿ? ದಾನಂ, ಭಿಕ್ಖವೇ, ಪಣ್ಡಿತಪಞ್ಞತ್ತಂ ಸಪ್ಪುರಿಸಪಞ್ಞತ್ತಂ. ಪಬ್ಬಜ್ಜಾ, ಭಿಕ್ಖವೇ, ಪಣ್ಡಿತಪಞ್ಞತ್ತಾ ಸಪ್ಪುರಿಸಪಞ್ಞತ್ತಾ. ಮಾತಾಪಿತೂನಂ, ಭಿಕ್ಖವೇ, ಉಪಟ್ಠಾನಂ ಪಣ್ಡಿತಪಞ್ಞತ್ತಂ ಸಪ್ಪುರಿಸಪಞ್ಞತ್ತಂ. ಇಮಾನಿ ಖೋ, ಭಿಕ್ಖವೇ, ತೀಣಿ ಪಣ್ಡಿತಪಞ್ಞತ್ತಾನಿ ಸಪ್ಪುರಿಸಪಞ್ಞತ್ತಾನೀ’’ತಿ.

‘‘ಸಬ್ಭಿ ದಾನಂ ಉಪಞ್ಞತ್ತಂ, ಅಹಿಂಸಾ ಸಂಯಮೋ ದಮೋ;

ಮಾತಾಪಿತು ಉಪಟ್ಠಾನಂ, ಸನ್ತಾನಂ ಬ್ರಹ್ಮಚಾರಿನಂ.

‘‘ಸತಂ ಏತಾನಿ ಠಾನಾನಿ, ಯಾನಿ ಸೇವೇಥ ಪಣ್ಡಿತೋ;

ಅರಿಯೋ ದಸ್ಸನಸಮ್ಪನ್ನೋ, ಸ ಲೋಕಂ ಭಜತೇ ಸಿವ’’ನ್ತಿ. ಪಞ್ಚಮಂ;