(೧೧) ೧. ಆಸಾದುಪ್ಪಜಹವಗ್ಗೋ

೧೧೯. ‘‘ದ್ವೇಮಾ, ಭಿಕ್ಖವೇ, ಆಸಾ ದುಪ್ಪಜಹಾ. ಕತಮಾ ದ್ವೇ? ಲಾಭಾಸಾ ಚ ಜೀವಿತಾಸಾ ಚ. ಇಮಾ ಖೋ, ಭಿಕ್ಖವೇ, ದ್ವೇ ಆಸಾ ದುಪ್ಪಜಹಾ’’ತಿ.

೧೨೦. ‘‘ದ್ವೇಮೇ, ಭಿಕ್ಖವೇ, ಪುಗ್ಗಲಾ ದುಲ್ಲಭಾ ಲೋಕಸ್ಮಿಂ. ಕತಮೇ ದ್ವೇ? ಯೋ ಚ ಪುಬ್ಬಕಾರೀ, ಯೋ ಚ ಕತಞ್ಞೂ ಕತವೇದೀ. ಇಮೇ ಖೋ, ಭಿಕ್ಖವೇ, ದ್ವೇ ಪುಗ್ಗಲಾ ದುಲ್ಲಭಾ ಲೋಕಸ್ಮಿ’’ನ್ತಿ.

೧೨೧. ‘‘ದ್ವೇಮೇ, ಭಿಕ್ಖವೇ, ಪುಗ್ಗಲಾ ದುಲ್ಲಭಾ ಲೋಕಸ್ಮಿಂ. ಕತಮೇ ದ್ವೇ? ತಿತ್ತೋ ಚ ತಪ್ಪೇತಾ ಚ. ಇಮೇ ಖೋ, ಭಿಕ್ಖವೇ, ದ್ವೇ ಪುಗ್ಗಲಾ ದುಲ್ಲಭಾ ಲೋಕಸ್ಮಿ’’ನ್ತಿ.

೧೨೨. ‘‘ದ್ವೇಮೇ, ಭಿಕ್ಖವೇ, ಪುಗ್ಗಲಾ ದುತ್ತಪ್ಪಯಾ. ಕತಮೇ ದ್ವೇ? ಯೋ ಚ ಲದ್ಧಂ ಲದ್ಧಂ ನಿಕ್ಖಿಪತಿ, ಯೋ ಚ ಲದ್ಧಂ ಲದ್ಧಂ ವಿಸ್ಸಜ್ಜೇತಿ. ಇಮೇ ಖೋ, ಭಿಕ್ಖವೇ, ದ್ವೇ ಪುಗ್ಗಲಾ ದುತ್ತಪ್ಪಯಾ’’ತಿ.

೧೨೩. ‘‘ದ್ವೇಮೇ, ಭಿಕ್ಖವೇ, ಪುಗ್ಗಲಾ ಸುತಪ್ಪಯಾ. ಕತಮೇ ದ್ವೇ? ಯೋ ಚ ಲದ್ಧಂ ಲದ್ಧಂ ನ ನಿಕ್ಖಿಪತಿ, ಯೋ ಚ ಲದ್ಧಂ ಲದ್ಧಂ ನ ವಿಸ್ಸಜ್ಜೇತಿ. ಇಮೇ ಖೋ, ಭಿಕ್ಖವೇ, ದ್ವೇ ಪುಗ್ಗಲಾ ಸುತಪ್ಪಯಾ’’ತಿ.

೧೨೪. ‘‘ದ್ವೇಮೇ, ಭಿಕ್ಖವೇ, ಪಚ್ಚಯಾ ರಾಗಸ್ಸ ಉಪ್ಪಾದಾಯ. ಕತಮೇ ದ್ವೇ? ಸುಭನಿಮಿತ್ತಞ್ಚ ಅಯೋನಿಸೋ ಚ ಮನಸಿಕಾರೋ. ಇಮೇ ಖೋ, ಭಿಕ್ಖವೇ, ದ್ವೇ ಪಚ್ಚಯಾ ರಾಗಸ್ಸ ಉಪ್ಪಾದಾಯಾ’’ತಿ.

೧೨೫. ‘‘ದ್ವೇಮೇ, ಭಿಕ್ಖವೇ, ಪಚ್ಚಯಾ ದೋಸಸ್ಸ ಉಪ್ಪಾದಾಯ. ಕತಮೇ ದ್ವೇ? ಪಟಿಘನಿಮಿತ್ತಞ್ಚ ಅಯೋನಿಸೋ ಚ ಮನಸಿಕಾರೋ. ಇಮೇ ಖೋ, ಭಿಕ್ಖವೇ, ದ್ವೇ ಪಚ್ಚಯಾ ದೋಸಸ್ಸ ಉಪ್ಪಾದಾಯಾ’’ತಿ.

೧೨೬. ‘‘ದ್ವೇಮೇ, ಭಿಕ್ಖವೇ, ಪಚ್ಚಯಾ ಮಿಚ್ಛಾದಿಟ್ಠಿಯಾ ಉಪ್ಪಾದಾಯ. ಕತಮೇ ದ್ವೇ? ಪರತೋ ಚ ಘೋಸೋ ಅಯೋನಿಸೋ ಚ ಮನಸಿಕಾರೋ. ಇಮೇ ಖೋ, ಭಿಕ್ಖವೇ, ದ್ವೇ ಪಚ್ಚಯಾ ಮಿಚ್ಛಾದಿಟ್ಠಿಯಾ ಉಪ್ಪಾದಾಯಾ’’ತಿ.

೧೨೭. ‘‘ದ್ವೇಮೇ, ಭಿಕ್ಖವೇ, ಪಚ್ಚಯಾ ಸಮ್ಮಾದಿಟ್ಠಿಯಾ ಉಪ್ಪಾದಾಯ. ಕತಮೇ ದ್ವೇ? ಪರತೋ ಚ ಘೋಸೋ, ಯೋನಿಸೋ ಚ ಮನಸಿಕಾರೋ. ಇಮೇ ಖೋ, ಭಿಕ್ಖವೇ, ದ್ವೇ ಪಚ್ಚಯಾ ಸಮ್ಮಾದಿಟ್ಠಿಯಾ ಉಪ್ಪಾದಾಯಾ’’ತಿ.

೧೨೮. ‘‘ದ್ವೇಮಾ, ಭಿಕ್ಖವೇ, ಆಪತ್ತಿಯೋ. ಕತಮಾ ದ್ವೇ? ಲಹುಕಾ ಚ ಆಪತ್ತಿ, ಗರುಕಾ ಚ ಆಪತ್ತಿ. ಇಮಾ ಖೋ, ಭಿಕ್ಖವೇ, ದ್ವೇ ಆಪತ್ತಿಯೋ’’ತಿ.

೧೨೯. ‘‘ದ್ವೇಮಾ, ಭಿಕ್ಖವೇ, ಆಪತ್ತಿಯೋ. ಕತಮಾ ದ್ವೇ? ದುಟ್ಠುಲ್ಲಾ ಚ ಆಪತ್ತಿ, ಅದುಟ್ಠುಲ್ಲಾ ಚ ಆಪತ್ತಿ. ಇಮಾ ಖೋ, ಭಿಕ್ಖವೇ, ದ್ವೇ ಆಪತ್ತಿಯೋ’’ತಿ.

೧೩೦. ‘‘ದ್ವೇಮಾ, ಭಿಕ್ಖವೇ, ಆಪತ್ತಿಯೋ. ಕತಮಾ ದ್ವೇ? ಸಾವಸೇಸಾ ಚ ಆಪತ್ತಿ, ಅನವಸೇಸಾ ಚ ಆಪತ್ತಿ. ಇಮಾ ಖೋ, ಭಿಕ್ಖವೇ, ದ್ವೇ ಆಪತ್ತಿಯೋ’’ತಿ.

ಆಸಾದುಪ್ಪಜಹವಗ್ಗೋ ಪಠಮೋ.