೨. ದುತಿಯಪಣ್ಣಾಸಕಂ

(೬) ೧. ಪುಗ್ಗಲವಗ್ಗೋ

೫೩. ‘‘ದ್ವೇಮೇ, ಭಿಕ್ಖವೇ, ಪುಗ್ಗಲಾ ಲೋಕೇ ಉಪ್ಪಜ್ಜಮಾನಾ ಉಪ್ಪಜ್ಜನ್ತಿ ಬಹುಜನಹಿತಾಯ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಕತಮೇ ದ್ವೇ? ತಥಾಗತೋ ಚ ಅರಹಂ ಸಮ್ಮಾಸಮ್ಬುದ್ಧೋ, ರಾಜಾ ಚ ಚಕ್ಕವತ್ತೀ. ಇಮೇ ಖೋ, ಭಿಕ್ಖವೇ, ದ್ವೇ ಪುಗ್ಗಲಾ ಲೋಕೇ ಉಪ್ಪಜ್ಜಮಾನಾ ಉಪ್ಪಜ್ಜನ್ತಿ ಬಹುಜನಹಿತಾಯ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನ’’ನ್ತಿ.

೫೪. ‘‘ದ್ವೇಮೇ, ಭಿಕ್ಖವೇ, ಪುಗ್ಗಲಾ ಲೋಕೇ ಉಪ್ಪಜ್ಜಮಾನಾ ಉಪ್ಪಜ್ಜನ್ತಿ ಅಚ್ಛರಿಯಮನುಸ್ಸಾ. ಕತಮೇ ದ್ವೇ? ತಥಾಗತೋ ಚ ಅರಹಂ ಸಮ್ಮಾಸಮ್ಬುದ್ಧೋ, ರಾಜಾ ಚ ಚಕ್ಕವತ್ತೀ. ಇಮೇ ಖೋ, ಭಿಕ್ಖವೇ, ದ್ವೇ ಪುಗ್ಗಲಾ ಲೋಕೇ ಉಪ್ಪಜ್ಜಮಾನಾ ಉಪ್ಪಜ್ಜನ್ತಿ ಅಚ್ಛರಿಯಮನುಸ್ಸಾ’’ತಿ.

೫೫. ‘‘ದ್ವಿನ್ನಂ, ಭಿಕ್ಖವೇ, ಪುಗ್ಗಲಾನಂ ಕಾಲಕಿರಿಯಾ ಬಹುನೋ ಜನಸ್ಸ ಅನುತಪ್ಪಾ ಹೋತಿ. ಕತಮೇಸಂ ದ್ವಿನ್ನಂ? ತಥಾಗತಸ್ಸ ಚ ಅರಹತೋ ಸಮ್ಮಾಸಮ್ಬುದ್ಧಸ್ಸ, ರಞ್ಞೋ ಚ ಚಕ್ಕವತ್ತಿಸ್ಸ. ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಪುಗ್ಗಲಾನಂ ಕಾಲಕಿರಿಯಾ ಬಹುನೋ ಜನಸ್ಸ ಅನುತಪ್ಪಾ ಹೋತೀ’’ತಿ.

೫೬. ‘‘ದ್ವೇಮೇ, ಭಿಕ್ಖವೇ, ಥೂಪಾರಹಾ. ಕತಮೇ ದ್ವೇ? ತಥಾಗತೋ ಚ ಅರಹಂ ಸಮ್ಮಾಸಮ್ಬುದ್ಧೋ, ರಾಜಾ ಚ ಚಕ್ಕವತ್ತೀ. ಇಮೇ ಖೋ, ಭಿಕ್ಖವೇ, ದ್ವೇ ಥೂಪಾರಹಾ’’ತಿ.

೫೭. ‘‘ದ್ವೇಮೇ, ಭಿಕ್ಖವೇ, ಬುದ್ಧಾ. ಕತಮೇ ದ್ವೇ? ತಥಾಗತೋ ಚ ಅರಹಂ ಸಮ್ಮಾಸಮ್ಬುದ್ಧೋ, ಪಚ್ಚೇಕಬುದ್ಧೋ ಚ. ಇಮೇ ಖೋ, ಭಿಕ್ಖವೇ, ದ್ವೇ ಬುದ್ಧಾ’’ತಿ.

೫೮. ‘‘ದ್ವೇಮೇ, ಭಿಕ್ಖವೇ, ಅಸನಿಯಾ ಫಲನ್ತಿಯಾ ನ ಸನ್ತಸನ್ತಿ. ಕತಮೇ ದ್ವೇ? ಭಿಕ್ಖು ಚ ಖೀಣಾಸವೋ, ಹತ್ಥಾಜಾನೀಯೋ ಚ. ಇಮೇ ಖೋ, ಭಿಕ್ಖವೇ, ದ್ವೇ ಅಸನಿಯಾ ಫಲನ್ತಿಯಾ ನ ಸನ್ತಸನ್ತೀ’’ತಿ.

೫೯. ‘‘ದ್ವೇಮೇ, ಭಿಕ್ಖವೇ, ಅಸನಿಯಾ ಫಲನ್ತಿಯಾ ನ ಸನ್ತಸನ್ತಿ. ಕತಮೇ ದ್ವೇ? ಭಿಕ್ಖು ಚ ಖೀಣಾಸವೋ, ಅಸ್ಸಾಜಾನೀಯೋ ಚ. ಇಮೇ ಖೋ, ಭಿಕ್ಖವೇ, ದ್ವೇ ಅಸನಿಯಾ ಫಲನ್ತಿಯಾ ನ ಸನ್ತಸನ್ತೀ’’ತಿ.

೬೦. ‘‘ದ್ವೇಮೇ, ಭಿಕ್ಖವೇ, ಅಸನಿಯಾ ಫಲನ್ತಿಯಾ ನ ಸನ್ತಸನ್ತಿ. ಕತಮೇ ದ್ವೇ? ಭಿಕ್ಖು ಚ ಖೀಣಾಸವೋ, ಸೀಹೋ ಚ ಮಿಗರಾಜಾ. ಇಮೇ ಖೋ, ಭಿಕ್ಖವೇ, ದ್ವೇ ಅಸನಿಯಾ ಫಲನ್ತಿಯಾ ನ ಸನ್ತಸನ್ತೀ’’ತಿ.

೬೧. ‘‘ದ್ವೇಮೇ, ಭಿಕ್ಖವೇ, ಅತ್ಥವಸೇ ಸಮ್ಪಸ್ಸಮಾನಾ ಕಿಂಪುರಿಸಾ ಮಾನುಸಿಂ ವಾಚಂ ನ ಭಾಸನ್ತಿ. ಕತಮೇ ದ್ವೇ? ಮಾ ಚ ಮುಸಾ ಭಣಿಮ್ಹಾ, ಮಾ ಚ ಪರಂ ಅಭೂತೇನ ಅಬ್ಭಾಚಿಕ್ಖಿಮ್ಹಾತಿ. ಇಮೇ ಖೋ, ಭಿಕ್ಖವೇ, ದ್ವೇ ಅತ್ಥವಸೇ ಸಮ್ಪಸ್ಸಮಾನಾ ಕಿಂಪುರಿಸಾ ಮಾನುಸಿಂ ವಾಚಂ ನ ಭಾಸನ್ತೀ’’ತಿ.

೬೨. ‘‘ದ್ವಿನ್ನಂ ಧಮ್ಮಾನಂ, ಭಿಕ್ಖವೇ, ಅತಿತ್ತೋ ಅಪ್ಪಟಿವಾನೋ ಮಾತುಗಾಮೋ ಕಾಲಂ ಕರೋತಿ. ಕತಮೇಸಂ ದ್ವಿನ್ನಂ? ಮೇಥುನಸಮಾಪತ್ತಿಯಾ ಚ ವಿಜಾಯನಸ್ಸ ಚ. ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಧಮ್ಮಾನಂ ಅತಿತ್ತೋ ಅಪ್ಪಟಿವಾನೋ ಮಾತುಗಾಮೋ ಕಾಲಂ ಕರೋತೀ’’ತಿ.

೬೩. ‘‘ಅಸನ್ತಸನ್ನಿವಾಸಞ್ಚ ವೋ, ಭಿಕ್ಖವೇ, ದೇಸೇಸ್ಸಾಮಿ ಸನ್ತಸನ್ನಿವಾಸಞ್ಚ. ತಂ ಸುಣಾಥ, ಸಾಧುಕಂ ಮನಸಿ ಕರೋಥ; ಭಾಸಿಸ್ಸಾಮೀ’’ತಿ. ‘‘ಏವಂ, ಭನ್ತೇ’’ತಿ ಖೋ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ. ಭಗವಾ ಏತದವೋಚ –

‘‘ಕಥಞ್ಚ, ಭಿಕ್ಖವೇ, ಅಸನ್ತಸನ್ನಿವಾಸೋ ಹೋತಿ, ಕಥಞ್ಚ ಅಸನ್ತೋ ಸನ್ನಿವಸನ್ತಿ? ಇಧ, ಭಿಕ್ಖವೇ, ಥೇರಸ್ಸ ಭಿಕ್ಖುನೋ ಏವಂ ಹೋತಿ – ‘ಥೇರೋಪಿ ಮಂ ನ ವದೇಯ್ಯ, ಮಜ್ಝಿಮೋಪಿ ಮಂ ನ ವದೇಯ್ಯ, ನವೋಪಿ ಮಂ ನ ವದೇಯ್ಯ; ಥೇರಮ್ಪಾಹಂ ನ ವದೇಯ್ಯಂ, ಮಜ್ಝಿಮಮ್ಪಾಹಂ ನ ವದೇಯ್ಯಂ, ನವಮ್ಪಾಹಂ ನ ವದೇಯ್ಯಂ. ಥೇರೋ ಚೇಪಿ ಮಂ ವದೇಯ್ಯ ಅಹಿತಾನುಕಮ್ಪೀ ಮಂ ವದೇಯ್ಯ ನೋ ಹಿತಾನುಕಮ್ಪೀ, ನೋತಿ ನಂ ವದೇಯ್ಯಂ ವಿಹೇಠೇಯ್ಯಂ [ವಿಹೇಸೇಯ್ಯಂ (ಸೀ. ಸ್ಯಾ. ಕಂ. ಪೀ.)] ಪಸ್ಸಮ್ಪಿಸ್ಸ ನಪ್ಪಟಿಕರೇಯ್ಯಂ. ಮಜ್ಝಿಮೋ ಚೇಪಿ ಮಂ ವದೇಯ್ಯ…ಪೇ… ನವೋ ಚೇಪಿ ಮಂ ವದೇಯ್ಯ ಅಹಿತಾನುಕಮ್ಪೀ ಮಂ ವದೇಯ್ಯ ನೋ ಹಿತಾನುಕಮ್ಪೀ, ನೋತಿ ನಂ ವದೇಯ್ಯಂ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ನಪ್ಪಟಿಕರೇಯ್ಯಂ’. ಮಜ್ಝಿಮಸ್ಸಪಿ ಭಿಕ್ಖುನೋ ಏವಂ ಹೋತಿ…ಪೇ… ನವಸ್ಸಪಿ ಭಿಕ್ಖುನೋ ಏವಂ ಹೋತಿ – ‘ಥೇರೋಪಿ ಮಂ ನ ವದೇಯ್ಯ, ಮಜ್ಝಿಮೋಪಿ ಮಂ ನ ವದೇಯ್ಯ, ನವೋಪಿ ಮಂ ನ ವದೇಯ್ಯ; ಥೇರಮ್ಪಾಹಂ ನ ವದೇಯ್ಯಂ, ಮಜ್ಝಿಮಮ್ಪಾಹಂ ನ ವದೇಯ್ಯಂ, ನವಮ್ಪಾಹಂ ನ ವದೇಯ್ಯಂ. ಥೇರೋ ಚೇಪಿ ಮಂ ವದೇಯ್ಯ ಅಹಿತಾನುಕಮ್ಪೀ ಮಂ ವದೇಯ್ಯ ನೋ ಹಿತಾನುಕಮ್ಪೀ ನೋತಿ ನಂ ವದೇಯ್ಯಂ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ನಪ್ಪಟಿಕರೇಯ್ಯಂ. ಮಜ್ಝಿಮೋ ಚೇಪಿ ಮಂ ವದೇಯ್ಯ…ಪೇ… ನವೋ ಚೇಪಿ ಮಂ ವದೇಯ್ಯ ಅಹಿತಾನುಕಮ್ಪೀ ಮಂ ವದೇಯ್ಯ ನೋ ಹಿತಾನುಕಮ್ಪೀ, ನೋತಿ ನಂ ವದೇಯ್ಯಂ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ನಪ್ಪಟಿಕರೇಯ್ಯಂ’. ಏವಂ ಖೋ, ಭಿಕ್ಖವೇ, ಅಸನ್ತಸನ್ನಿವಾಸೋ ಹೋತಿ, ಏವಞ್ಚ ಅಸನ್ತೋ ಸನ್ನಿವಸನ್ತಿ.

‘‘ಕಥಞ್ಚ, ಭಿಕ್ಖವೇ, ಸನ್ತಸನ್ನಿವಾಸೋ ಹೋತಿ, ಕಥಞ್ಚ ಸನ್ತೋ ಸನ್ನಿವಸನ್ತಿ? ಇಧ, ಭಿಕ್ಖವೇ, ಥೇರಸ್ಸ ಭಿಕ್ಖುನೋ ಏವಂ ಹೋತಿ – ‘ಥೇರೋಪಿ ಮಂ ವದೇಯ್ಯ, ಮಜ್ಝಿಮೋಪಿ ಮಂ ವದೇಯ್ಯ, ನವೋಪಿ ಮಂ ವದೇಯ್ಯ; ಥೇರಮ್ಪಾಹಂ ವದೇಯ್ಯಂ, ಮಜ್ಝಿಮಮ್ಪಾಹಂ ವದೇಯ್ಯಂ, ನವಮ್ಪಾಹಂ ವದೇಯ್ಯಂ. ಥೇರೋ ಚೇಪಿ ಮಂ ವದೇಯ್ಯ ಹಿತಾನುಕಮ್ಪೀ ಮಂ ವದೇಯ್ಯ ನೋ ಅಹಿತಾನುಕಮ್ಪೀ, ಸಾಧೂತಿ ನಂ ವದೇಯ್ಯಂ ನ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ಪಟಿಕರೇಯ್ಯಂ. ಮಜ್ಝಿಮೋ ಚೇಪಿ ಮಂ ವದೇಯ್ಯ…ಪೇ… ನವೋ ಚೇಪಿ ಮಂ ವದೇಯ್ಯ ಹಿತಾನುಕಮ್ಪೀ ಮಂ ವದೇಯ್ಯ ನೋ ಅಹಿತಾನುಕಮ್ಪೀ, ಸಾಧೂತಿ ನಂ ವದೇಯ್ಯಂ ನ ನಂ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ಪಟಿಕರೇಯ್ಯಂ’. ಮಜ್ಝಿಮಸ್ಸಪಿ ಭಿಕ್ಖುನೋ ಏವಂ ಹೋತಿ…ಪೇ… ನವಸ್ಸಪಿ ಭಿಕ್ಖುನೋ ಏವಂ ಹೋತಿ – ‘ಥೇರೋಪಿ ಮಂ ವದೇಯ್ಯ, ಮಜ್ಝಿಮೋಪಿ ಮಂ ವದೇಯ್ಯ, ನವೋಪಿ ಮಂ ವದೇಯ್ಯ; ಥೇರಮ್ಪಾಹಂ ವದೇಯ್ಯಂ, ಮಜ್ಝಿಮಮ್ಪಾಹಂ ವದೇಯ್ಯಂ, ನವಮ್ಪಾಹಂ ವದೇಯ್ಯಂ. ಥೇರೋ ಚೇಪಿ ಮಂ ವದೇಯ್ಯ ಹಿತಾನುಕಮ್ಪೀ ಮಂ ವದೇಯ್ಯ ನೋ ಅಹಿತಾನುಕಮ್ಪೀ, ಸಾಧೂತಿ ನಂ ವದೇಯ್ಯಂ ನ ನಂ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ಪಟಿಕರೇಯ್ಯಂ. ಮಜ್ಝಿಮೋ ಚೇಪಿ ಮಂ ವದೇಯ್ಯ…ಪೇ… ನವೋ ಚೇಪಿ ಮಂ ವದೇಯ್ಯ ಹಿತಾನುಕಮ್ಪೀ ಮಂ ವದೇಯ್ಯ ನೋ ಅಹಿತಾನುಕಮ್ಪೀ, ಸಾಧೂತಿ ನಂ ವದೇಯ್ಯಂ ನ ನಂ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ಪಟಿಕರೇಯ್ಯಂ’. ಏವಂ ಖೋ, ಭಿಕ್ಖವೇ, ಸನ್ತಸನ್ನಿವಾಸೋ ಹೋತಿ, ಏವಞ್ಚ ಸನ್ತೋ ಸನ್ನಿವಸನ್ತೀ’’ತಿ.

೬೪. ‘‘ಯಸ್ಮಿಂ, ಭಿಕ್ಖವೇ, ಅಧಿಕರಣೇ ಉಭತೋ ವಚೀಸಂಸಾರೋ ದಿಟ್ಠಿಪಳಾಸೋ ಚೇತಸೋ ಆಘಾತೋ ಅಪ್ಪಚ್ಚಯೋ ಅನಭಿರದ್ಧಿ ಅಜ್ಝತ್ತಂ ಅವೂಪಸನ್ತಂ ಹೋತಿ, ತಸ್ಮೇತಂ, ಭಿಕ್ಖವೇ, ಅಧಿಕರಣೇ ಪಾಟಿಕಙ್ಖಂ – ‘ದೀಘತ್ತಾಯ ಖರತ್ತಾಯ ವಾಳತ್ತಾಯ ಸಂವತ್ತಿಸ್ಸತಿ, ಭಿಕ್ಖೂ ಚ ನ ಫಾಸುಂ [ಫಾಸು (ಕ.)] ವಿಹರಿಸ್ಸನ್ತಿ’. ಯಸ್ಮಿಞ್ಚ ಖೋ, ಭಿಕ್ಖವೇ, ಅಧಿಕರಣೇ ಉಭತೋ ವಚೀಸಂಸಾರೋ ದಿಟ್ಠಿಪಳಾಸೋ ಚೇತಸೋ ಆಘಾತೋ ಅಪ್ಪಚ್ಚಯೋ ಅನಭಿರದ್ಧಿ ಅಜ್ಝತ್ತಂ ಸುವೂಪಸನ್ತಂ ಹೋತಿ, ತಸ್ಮೇತಂ, ಭಿಕ್ಖವೇ, ಅಧಿಕರಣೇ ಪಾಟಿಕಙ್ಖಂ – ‘ನ ದೀಘತ್ತಾಯ ಖರತ್ತಾಯ ವಾಳತ್ತಾಯ ಸಂವತ್ತಿಸ್ಸತಿ, ಭಿಕ್ಖೂ ಚ ಫಾಸುಂ ವಿಹರಿಸ್ಸನ್ತೀ’’’ತಿ.

ಪುಗ್ಗಲವಗ್ಗೋ ಪಠಮೋ.

(೭) ೨. ಸುಖವಗ್ಗೋ

೬೫. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ಗಿಹಿಸುಖಞ್ಚ ಪಬ್ಬಜಿತಸುಖಞ್ಚ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ಪಬ್ಬಜಿತಸುಖ’’ನ್ತಿ.

೬೬. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ಕಾಮಸುಖಞ್ಚ ನೇಕ್ಖಮ್ಮಸುಖಞ್ಚ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ನೇಕ್ಖಮ್ಮಸುಖ’’ನ್ತಿ.

೬೭. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ಉಪಧಿಸುಖಞ್ಚ ನಿರುಪಧಿಸುಖಞ್ಚ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ನಿರುಪಧಿಸುಖ’’ನ್ತಿ.

೬೮. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ಸಾಸವಸುಖಞ್ಚ ಅನಾಸವಸುಖಞ್ಚ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ಅನಾಸವಸುಖ’’ನ್ತಿ.

೬೯. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ಸಾಮಿಸಞ್ಚ ಸುಖಂ ನಿರಾಮಿಸಞ್ಚ ಸುಖಂ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ನಿರಾಮಿಸಂ ಸುಖ’’ನ್ತಿ.

೭೦. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ಅರಿಯಸುಖಞ್ಚ ಅನರಿಯಸುಖಞ್ಚ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ಅರಿಯಸುಖ’’ನ್ತಿ.

೭೧. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ಕಾಯಿಕಞ್ಚ ಸುಖಂ ಚೇತಸಿಕಞ್ಚ ಸುಖಂ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ಚೇತಸಿಕಂ ಸುಖ’’ನ್ತಿ.

೭೨. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ಸಪ್ಪೀತಿಕಞ್ಚ ಸುಖಂ ನಿಪ್ಪೀತಿಕಞ್ಚ ಸುಖಂ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ನಿಪ್ಪೀತಿಕಂ ಸುಖ’’ನ್ತಿ.

೭೩. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ಸಾತಸುಖಞ್ಚ ಉಪೇಕ್ಖಾಸುಖಞ್ಚ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ಉಪೇಕ್ಖಾಸುಖ’’ನ್ತಿ.

೭೪. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ಸಮಾಧಿಸುಖಞ್ಚ ಅಸಮಾಧಿಸುಖಞ್ಚ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ಸಮಾಧಿಸುಖ’’ನ್ತಿ.

೭೫. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ಸಪ್ಪೀತಿಕಾರಮ್ಮಣಞ್ಚ ಸುಖಂ ನಿಪ್ಪೀತಿಕಾರಮ್ಮಣಞ್ಚ ಸುಖಂ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ನಿಪ್ಪೀತಿಕಾರಮ್ಮಣಂ ಸುಖ’’ನ್ತಿ.

೭೬. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ಸಾತಾರಮ್ಮಣಞ್ಚ ಸುಖಂ ಉಪೇಕ್ಖಾರಮ್ಮಣಞ್ಚ ಸುಖಂ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ಉಪೇಕ್ಖಾರಮ್ಮಣಂ ಸುಖ’’ನ್ತಿ.

೭೭. ‘‘ದ್ವೇಮಾನಿ, ಭಿಕ್ಖವೇ, ಸುಖಾನಿ. ಕತಮಾನಿ ದ್ವೇ? ರೂಪಾರಮ್ಮಣಞ್ಚ ಸುಖಂ ಅರೂಪಾರಮ್ಮಣಞ್ಚ ಸುಖಂ. ಇಮಾನಿ ಖೋ, ಭಿಕ್ಖವೇ, ದ್ವೇ ಸುಖಾನಿ. ಏತದಗ್ಗಂ, ಭಿಕ್ಖವೇ, ಇಮೇಸಂ ದ್ವಿನ್ನಂ ಸುಖಾನಂ ಯದಿದಂ ಅರೂಪಾರಮ್ಮಣಂ ಸುಖ’’ನ್ತಿ.

ಸುಖವಗ್ಗೋ ದುತಿಯೋ.

(೮) ೩. ಸನಿಮಿತ್ತವಗ್ಗೋ

೭೮. ‘‘ಸನಿಮಿತ್ತಾ, ಭಿಕ್ಖವೇ, ಉಪ್ಪಜ್ಜನ್ತಿ ಪಾಪಕಾ ಅಕುಸಲಾ ಧಮ್ಮಾ, ನೋ ಅನಿಮಿತ್ತಾ. ತಸ್ಸೇವ ನಿಮಿತ್ತಸ್ಸ ಪಹಾನಾ ಏವಂ ತೇ ಪಾಪಕಾ ಅಕುಸಲಾ ಧಮ್ಮಾ ನ ಹೋನ್ತೀ’’ತಿ.

೭೯. ‘‘ಸನಿದಾನಾ, ಭಿಕ್ಖವೇ, ಉಪ್ಪಜ್ಜನ್ತಿ ಪಾಪಕಾ ಅಕುಸಲಾ ಧಮ್ಮಾ, ನೋ ಅನಿದಾನಾ. ತಸ್ಸೇವ ನಿದಾನಸ್ಸ ಪಹಾನಾ ಏವಂ ತೇ ಪಾಪಕಾ ಅಕುಸಲಾ ಧಮ್ಮಾ ನ ಹೋನ್ತೀ’’ತಿ.

೮೦. ‘‘ಸಹೇತುಕಾ, ಭಿಕ್ಖವೇ, ಉಪ್ಪಜ್ಜನ್ತಿ ಪಾಪಕಾ ಅಕುಸಲಾ ಧಮ್ಮಾ, ನೋ ಅಹೇತುಕಾ. ತಸ್ಸೇವ ಹೇತುಸ್ಸ ಪಹಾನಾ ಏವಂ ತೇ ಪಾಪಕಾ ಅಕುಸಲಾ ಧಮ್ಮಾ ನ ಹೋನ್ತೀ’’ತಿ.

೮೧. ‘‘ಸಸಙ್ಖಾರಾ, ಭಿಕ್ಖವೇ, ಉಪ್ಪಜ್ಜನ್ತಿ ಪಾಪಕಾ ಅಕುಸಲಾ ಧಮ್ಮಾ, ನೋ ಅಸಙ್ಖಾರಾ. ತೇಸಂಯೇವ ಸಙ್ಖಾರಾನಂ ಪಹಾನಾ ಏವಂ ತೇ ಪಾಪಕಾ ಅಕುಸಲಾ ಧಮ್ಮಾ ನ ಹೋನ್ತೀ’’ತಿ.

೮೨. ‘‘ಸಪ್ಪಚ್ಚಯಾ, ಭಿಕ್ಖವೇ, ಉಪ್ಪಜ್ಜನ್ತಿ ಪಾಪಕಾ ಅಕುಸಲಾ ಧಮ್ಮಾ, ನೋ ಅಪ್ಪಚ್ಚಯಾ. ತಸ್ಸೇವ ಪಚ್ಚಯಸ್ಸ ಪಹಾನಾ ಏವಂ ತೇ ಪಾಪಕಾ ಅಕುಸಲಾ ಧಮ್ಮಾ ನ ಹೋನ್ತೀ’’ತಿ.

೮೩. ‘‘ಸರೂಪಾ, ಭಿಕ್ಖವೇ, ಉಪ್ಪಜ್ಜನ್ತಿ ಪಾಪಕಾ ಅಕುಸಲಾ ಧಮ್ಮಾ, ನೋ ಅರೂಪಾ. ತಸ್ಸೇವ ರೂಪಸ್ಸ ಪಹಾನಾ ಏವಂ ತೇ ಪಾಪಕಾ ಅಕುಸಲಾ ಧಮ್ಮಾ ನ ಹೋನ್ತೀ’’ತಿ.

೮೪. ‘‘ಸವೇದನಾ, ಭಿಕ್ಖವೇ, ಉಪ್ಪಜ್ಜನ್ತಿ ಪಾಪಕಾ ಅಕುಸಲಾ ಧಮ್ಮಾ, ನೋ ಅವೇದನಾ. ತಸ್ಸಾಯೇವ ವೇದನಾಯ ಪಹಾನಾ ಏವಂ ತೇ ಪಾಪಕಾ ಅಕುಸಲಾ ಧಮ್ಮಾ ನ ಹೋನ್ತೀ’’ತಿ.

೮೫. ‘‘ಸಸಞ್ಞಾ, ಭಿಕ್ಖವೇ, ಉಪ್ಪಜ್ಜನ್ತಿ ಪಾಪಕಾ ಅಕುಸಲಾ ಧಮ್ಮಾ, ನೋ ಅಸಞ್ಞಾ. ತಸ್ಸಾಯೇವ ಸಞ್ಞಾಯ ಪಹಾನಾ ಏವಂ ತೇ ಪಾಪಕಾ ಅಕುಸಲಾ ಧಮ್ಮಾ ನ ಹೋನ್ತೀ’’ತಿ.

೮೬. ‘‘ಸವಿಞ್ಞಾಣಾ, ಭಿಕ್ಖವೇ, ಉಪ್ಪಜ್ಜನ್ತಿ ಪಾಪಕಾ ಅಕುಸಲಾ ಧಮ್ಮಾ, ನೋ ಅವಿಞ್ಞಾಣಾ. ತಸ್ಸೇವ ವಿಞ್ಞಾಣಸ್ಸ ಪಹಾನಾ ಏವಂ ತೇ ಪಾಪಕಾ ಅಕುಸಲಾ ಧಮ್ಮಾ ನ ಹೋನ್ತೀ’’ತಿ.

೮೭. ‘‘ಸಙ್ಖತಾರಮ್ಮಣಾ, ಭಿಕ್ಖವೇ, ಉಪ್ಪಜ್ಜನ್ತಿ ಪಾಪಕಾ ಅಕುಸಲಾ ಧಮ್ಮಾ, ನೋ ಅಸಙ್ಖತಾರಮ್ಮಣಾ. ತಸ್ಸೇವ ಸಙ್ಖತಸ್ಸ ಪಹಾನಾ ಏವಂ ತೇ ಪಾಪಕಾ ಅಕುಸಲಾ ಧಮ್ಮಾ ನ ಹೋನ್ತೀ’’ತಿ.

ಸನಿಮಿತ್ತವಗ್ಗೋ ತತಿಯೋ.

(೯) ೪. ಧಮ್ಮವಗ್ಗೋ

೮೮. ‘‘ದ್ವೇಮೇ, ಭಿಕ್ಖವೇ, ಧಮ್ಮಾ. ಕತಮೇ ದ್ವೇ? ಚೇತೋವಿಮುತ್ತಿ ಚ ಪಞ್ಞಾವಿಮುತ್ತಿ ಚ. ಇಮೇ ಖೋ, ಭಿಕ್ಖವೇ, ದ್ವೇ ಧಮ್ಮಾ’’ತಿ.

೮೯. ‘‘ದ್ವೇಮೇ, ಭಿಕ್ಖವೇ, ಧಮ್ಮಾ. ಕತಮೇ ದ್ವೇ? ಪಗ್ಗಾಹೋ ಚ ಅವಿಕ್ಖೇಪೋ ಚ. ಇಮೇ ಖೋ, ಭಿಕ್ಖವೇ, ದ್ವೇ ಧಮ್ಮಾ’’ತಿ.

೯೦. ‘‘ದ್ವೇಮೇ, ಭಿಕ್ಖವೇ, ಧಮ್ಮಾ. ಕತಮೇ ದ್ವೇ? ನಾಮಞ್ಚ ರೂಪಞ್ಚ. ಇಮೇ ಖೋ, ಭಿಕ್ಖವೇ, ದ್ವೇ ಧಮ್ಮಾ’’ತಿ.

೯೧. ‘‘ದ್ವೇಮೇ, ಭಿಕ್ಖವೇ, ಧಮ್ಮಾ. ಕತಮೇ ದ್ವೇ? ವಿಜ್ಜಾ ಚ ವಿಮುತ್ತಿ ಚ. ಇಮೇ ಖೋ, ಭಿಕ್ಖವೇ, ದ್ವೇ ಧಮ್ಮಾ’’ತಿ.

೯೨. ‘‘ದ್ವೇಮೇ, ಭಿಕ್ಖವೇ, ಧಮ್ಮಾ. ಕತಮೇ ದ್ವೇ? ಭವದಿಟ್ಠಿ ಚ ವಿಭವದಿಟ್ಠಿ ಚ. ಇಮೇ ಖೋ, ಭಿಕ್ಖವೇ, ದ್ವೇ ಧಮ್ಮಾ’’ತಿ.

೯೩. ‘‘ದ್ವೇಮೇ, ಭಿಕ್ಖವೇ, ಧಮ್ಮಾ. ಕತಮೇ ದ್ವೇ? ಅಹಿರಿಕಞ್ಚ ಅನೋತ್ತಪ್ಪಞ್ಚ. ಇಮೇ ಖೋ, ಭಿಕ್ಖವೇ, ದ್ವೇ ಧಮ್ಮಾ’’ತಿ.

೯೪. ‘‘ದ್ವೇಮೇ, ಭಿಕ್ಖವೇ, ಧಮ್ಮಾ. ಕತಮೇ ದ್ವೇ? ಹಿರೀ ಚ ಓತ್ತಪ್ಪಞ್ಚ. ಇಮೇ ಖೋ, ಭಿಕ್ಖವೇ, ದ್ವೇ ಧಮ್ಮಾ’’ತಿ.

೯೫. ‘‘ದ್ವೇಮೇ, ಭಿಕ್ಖವೇ, ಧಮ್ಮಾ. ಕತಮೇ ದ್ವೇ? ದೋವಚಸ್ಸತಾ ಚ ಪಾಪಮಿತ್ತತಾ ಚ. ಇಮೇ ಖೋ, ಭಿಕ್ಖವೇ, ದ್ವೇ ಧಮ್ಮಾ’’ತಿ.

೯೬. ‘‘ದ್ವೇಮೇ, ಭಿಕ್ಖವೇ, ಧಮ್ಮಾ. ಕತಮೇ ದ್ವೇ? ಸೋವಚಸ್ಸತಾ ಚ ಕಲ್ಯಾಣಮಿತ್ತತಾ ಚ. ಇಮೇ ಖೋ, ಭಿಕ್ಖವೇ, ದ್ವೇ ಧಮ್ಮಾ’’ತಿ.

೯೭. ‘‘ದ್ವೇಮೇ, ಭಿಕ್ಖವೇ, ಧಮ್ಮಾ. ಕತಮೇ ದ್ವೇ? ಧಾತುಕುಸಲತಾ ಚ ಮನಸಿಕಾರಕುಸಲತಾ ಚ. ಇಮೇ ಖೋ, ಭಿಕ್ಖವೇ, ದ್ವೇ ಧಮ್ಮಾ’’ತಿ.

೯೮. ‘‘ದ್ವೇಮೇ, ಭಿಕ್ಖವೇ, ಧಮ್ಮಾ. ಕತಮೇ ದ್ವೇ? ಆಪತ್ತಿಕುಸಲತಾ ಚ ಆಪತ್ತಿವುಟ್ಠಾನಕುಸಲತಾ ಚ. ಇಮೇ ಖೋ, ಭಿಕ್ಖವೇ, ದ್ವೇ ಧಮ್ಮಾ’’ತಿ.

ಧಮ್ಮವಗ್ಗೋ ಚತುತ್ಥೋ.

(೧೦) ೫. ಬಾಲವಗ್ಗೋ

೯೯. ‘‘ದ್ವೇಮೇ, ಭಿಕ್ಖವೇ, ಬಾಲಾ. ಕತಮೇ ದ್ವೇ? ಯೋ ಚ ಅನಾಗತಂ ಭಾರಂ ವಹತಿ, ಯೋ ಚ ಆಗತಂ ಭಾರಂ ನ ವಹತಿ. ಇಮೇ ಖೋ, ಭಿಕ್ಖವೇ, ದ್ವೇ ಬಾಲಾ’’ತಿ.

೧೦೦. ‘‘ದ್ವೇಮೇ, ಭಿಕ್ಖವೇ, ಪಣ್ಡಿತಾ. ಕತಮೇ ದ್ವೇ? ಯೋ ಚ ಅನಾಗತಂ ಭಾರಂ ನ ವಹತಿ, ಯೋ ಚ ಆಗತಂ ಭಾರಂ ವಹತಿ. ಇಮೇ ಖೋ, ಭಿಕ್ಖವೇ, ದ್ವೇ ಪಣ್ಡಿತಾ’’ತಿ.

೧೦೧. ‘‘ದ್ವೇಮೇ, ಭಿಕ್ಖವೇ, ಬಾಲಾ. ಕತಮೇ ದ್ವೇ? ಯೋ ಚ ಅಕಪ್ಪಿಯೇ ಕಪ್ಪಿಯಸಞ್ಞೀ, ಯೋ ಚ ಕಪ್ಪಿಯೇ ಅಕಪ್ಪಿಯಸಞ್ಞೀ. ಇಮೇ ಖೋ, ಭಿಕ್ಖವೇ, ದ್ವೇ ಬಾಲಾ’’ತಿ.

೧೦೨. ‘‘ದ್ವೇಮೇ, ಭಿಕ್ಖವೇ, ಪಣ್ಡಿತಾ. ಕತಮೇ ದ್ವೇ? ಯೋ ಚ ಅಕಪ್ಪಿಯೇ ಅಕಪ್ಪಿಯಸಞ್ಞೀ, ಯೋ ಚ ಕಪ್ಪಿಯೇ ಕಪ್ಪಿಯಸಞ್ಞೀ. ಇಮೇ ಖೋ, ಭಿಕ್ಖವೇ, ದ್ವೇ ಪಣ್ಡಿತಾ’’ತಿ.

೧೦೩. ‘‘ದ್ವೇಮೇ, ಭಿಕ್ಖವೇ, ಬಾಲಾ. ಕತಮೇ ದ್ವೇ? ಯೋ ಚ ಅನಾಪತ್ತಿಯಾ ಆಪತ್ತಿಸಞ್ಞೀ, ಯೋ ಚ ಆಪತ್ತಿಯಾ ಅನಾಪತ್ತಿಸಞ್ಞೀ. ಇಮೇ ಖೋ, ಭಿಕ್ಖವೇ, ದ್ವೇ ಬಾಲಾ’’ತಿ.

೧೦೪. ‘‘ದ್ವೇಮೇ, ಭಿಕ್ಖವೇ, ಪಣ್ಡಿತಾ. ಕತಮೇ ದ್ವೇ? ಯೋ ಚ ಅನಾಪತ್ತಿಯಾ ಅನಾಪತ್ತಿಸಞ್ಞೀ, ಯೋ ಚ ಆಪತ್ತಿಯಾ ಆಪತ್ತಿಸಞ್ಞೀ. ಇಮೇ ಖೋ, ಭಿಕ್ಖವೇ, ದ್ವೇ ಪಣ್ಡಿತಾ’’ತಿ.

೧೦೫. ‘‘ದ್ವೇಮೇ, ಭಿಕ್ಖವೇ, ಬಾಲಾ. ಕತಮೇ ದ್ವೇ? ಯೋ ಚ ಅಧಮ್ಮೇ ಧಮ್ಮಸಞ್ಞೀ, ಯೋ ಚ ಧಮ್ಮೇ ಅಧಮ್ಮಸಞ್ಞೀ. ಇಮೇ ಖೋ, ಭಿಕ್ಖವೇ, ದ್ವೇ ಬಾಲಾ’’ತಿ.

೧೦೬. ‘‘ದ್ವೇಮೇ, ಭಿಕ್ಖವೇ, ಪಣ್ಡಿತಾ. ಕತಮೇ ದ್ವೇ? ಯೋ ಚ ಧಮ್ಮೇ ಧಮ್ಮಸಞ್ಞೀ, ಯೋ ಚ ಅಧಮ್ಮೇ ಅಧಮ್ಮಸಞ್ಞೀ. ಇಮೇ ಖೋ, ಭಿಕ್ಖವೇ, ದ್ವೇ ಪಣ್ಡಿತಾ’’ತಿ.

೧೦೭. ‘‘ದ್ವೇಮೇ, ಭಿಕ್ಖವೇ, ಬಾಲಾ. ಕತಮೇ ದ್ವೇ? ಯೋ ಚ ಅವಿನಯೇ ವಿನಯಸಞ್ಞೀ, ಯೋ ಚ ವಿನಯೇ ಅವಿನಯಸಞ್ಞೀ. ಇಮೇ ಖೋ, ಭಿಕ್ಖವೇ, ದ್ವೇ ಬಾಲಾ’’ತಿ.

೧೦೮. ‘‘ದ್ವೇಮೇ, ಭಿಕ್ಖವೇ, ಪಣ್ಡಿತಾ. ಕತಮೇ ದ್ವೇ? ಯೋ ಚ ಅವಿನಯೇ ಅವಿನಯಸಞ್ಞೀ, ಯೋ ಚ ವಿನಯೇ ವಿನಯಸಞ್ಞೀ. ಇಮೇ ಖೋ, ಭಿಕ್ಖವೇ, ದ್ವೇ ಪಣ್ಡಿತಾ’’ತಿ.

೧೦೯. ‘‘ದ್ವಿನ್ನಂ, ಭಿಕ್ಖವೇ, ಆಸವಾ ವಡ್ಢನ್ತಿ. ಕತಮೇಸಂ ದ್ವಿನ್ನಂ? ಯೋ ಚ ನ ಕುಕ್ಕುಚ್ಚಾಯಿತಬ್ಬಂ ಕುಕ್ಕುಚ್ಚಾಯತಿ, ಯೋ ಚ ಕುಕ್ಕುಚ್ಚಾಯಿತಬ್ಬಂ ನ ಕುಕ್ಕುಚ್ಚಾಯತಿ. ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಆಸವಾ ವಡ್ಢನ್ತೀ’’ತಿ.

೧೧೦. ‘‘ದ್ವಿನ್ನಂ, ಭಿಕ್ಖವೇ, ಆಸವಾ ನ ವಡ್ಢನ್ತಿ. ಕತಮೇಸಂ ದ್ವಿನ್ನಂ? ಯೋ ಚ ನ ಕುಕ್ಕುಚ್ಚಾಯಿತಬ್ಬಂ ನ ಕುಕ್ಕುಚ್ಚಾಯತಿ, ಯೋ ಚ ಕುಕ್ಕುಚ್ಚಾಯಿತಬ್ಬಂ ಕುಕ್ಕುಚ್ಚಾಯತಿ. ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಆಸವಾ ನ ವಡ್ಢನ್ತೀ’’ತಿ.

೧೧೧. ‘‘ದ್ವಿನ್ನಂ, ಭಿಕ್ಖವೇ, ಆಸವಾ ವಡ್ಢನ್ತಿ. ಕತಮೇಸಂ ದ್ವಿನ್ನಂ? ಯೋ ಚ ಅಕಪ್ಪಿಯೇ ಕಪ್ಪಿಯಸಞ್ಞೀ, ಯೋ ಚ ಕಪ್ಪಿಯೇ ಅಕಪ್ಪಿಯಸಞ್ಞೀ. ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಆಸವಾ ವಡ್ಢನ್ತೀ’’ತಿ.

೧೧೨. ‘‘ದ್ವಿನ್ನಂ, ಭಿಕ್ಖವೇ, ಆಸವಾ ನ ವಡ್ಢನ್ತಿ. ಕತಮೇಸಂ ದ್ವಿನ್ನಂ? ಯೋ ಚ ಅಕಪ್ಪಿಯೇ ಅಕಪ್ಪಿಯಸಞ್ಞೀ, ಯೋ ಚ ಕಪ್ಪಿಯೇ ಕಪ್ಪಿಯಸಞ್ಞೀ. ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಆಸವಾ ನ ವಡ್ಢನ್ತೀ’’ತಿ.

೧೧೩. ‘‘ದ್ವಿನ್ನಂ, ಭಿಕ್ಖವೇ, ಆಸವಾ ವಡ್ಢನ್ತಿ. ಕತಮೇಸಂ ದ್ವಿನ್ನಂ? ಯೋ ಚ ಆಪತ್ತಿಯಾ ಅನಾಪತ್ತಿಸಞ್ಞೀ, ಯೋ ಚ ಅನಾಪತ್ತಿಯಾ ಆಪತ್ತಿಸಞ್ಞೀ. ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಆಸವಾ ವಡ್ಢನ್ತೀ’’ತಿ.

೧೧೪. ‘‘ದ್ವಿನ್ನಂ, ಭಿಕ್ಖವೇ, ಆಸವಾ ನ ವಡ್ಢನ್ತಿ. ಕತಮೇಸಂ ದ್ವಿನ್ನಂ? ಯೋ ಚ ಆಪತ್ತಿಯಾ ಆಪತ್ತಿಸಞ್ಞೀ, ಯೋ ಚ ಅನಾಪತ್ತಿಯಾ ಅನಾಪತ್ತಿಸಞ್ಞೀ. ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಆಸವಾ ನ ವಡ್ಢನ್ತೀ’’ತಿ.

೧೧೫. ‘‘ದ್ವಿನ್ನಂ, ಭಿಕ್ಖವೇ, ಆಸವಾ ವಡ್ಢನ್ತಿ. ಕತಮೇಸಂ ದ್ವಿನ್ನಂ? ಯೋ ಚ ಅಧಮ್ಮೇ ಧಮ್ಮಸಞ್ಞೀ, ಯೋ ಚ ಧಮ್ಮೇ ಅಧಮ್ಮಸಞ್ಞೀ. ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಆಸವಾ ವಡ್ಢನ್ತೀ’’ತಿ.

೧೧೬. ‘‘ದ್ವಿನ್ನಂ, ಭಿಕ್ಖವೇ, ಆಸವಾ ನ ವಡ್ಢನ್ತಿ. ಕತಮೇಸಂ ದ್ವಿನ್ನಂ? ಯೋ ಚ ಧಮ್ಮೇ ಧಮ್ಮಸಞ್ಞೀ, ಯೋ ಚ ಅಧಮ್ಮೇ ಅಧಮ್ಮಸಞ್ಞೀ. ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಆಸವಾ ನ ವಡ್ಢನ್ತೀ’’ತಿ.

೧೧೭. ‘‘ದ್ವಿನ್ನಂ, ಭಿಕ್ಖವೇ, ಆಸವಾ ವಡ್ಢನ್ತಿ. ಕತಮೇಸಂ ದ್ವಿನ್ನಂ? ಯೋ ಚ ಅವಿನಯೇ ವಿನಯಸಞ್ಞೀ, ಯೋ ಚ ವಿನಯೇ ಅವಿನಯಸಞ್ಞೀ. ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಆಸವಾ ವಡ್ಢನ್ತೀ’’ತಿ.

೧೧೮. ‘‘ದ್ವಿನ್ನಂ, ಭಿಕ್ಖವೇ, ಆಸವಾ ನ ವಡ್ಢನ್ತಿ. ಕತಮೇಸಂ ದ್ವಿನ್ನಂ? ಯೋ ಚ ಅವಿನಯೇ ಅವಿನಯಸಞ್ಞೀ, ಯೋ ಚ ವಿನಯೇ ವಿನಯಸಞ್ಞೀ. ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಆಸವಾ ನ ವಡ್ಢನ್ತೀ’’ತಿ.

ಬಾಲವಗ್ಗೋ ಪಞ್ಚಮೋ.

ದುತಿಯೋ ಪಣ್ಣಾಸಕೋ ಸಮತ್ತೋ.