೬. ಸಕ್ಕಸುತ್ತಂ

೪೬. ಏಕಂ ಸಮಯಂ ಭಗವಾ ಸಕ್ಕೇಸು ವಿಹರತಿ ಕಪಿಲವತ್ಥುಸ್ಮಿಂ ನಿಗ್ರೋಧಾರಾಮೇ. ಅಥ ಖೋ ಸಮ್ಬಹುಲಾ ಸಕ್ಕಾ ಉಪಾಸಕಾ ತದಹುಪೋಸಥೇ ಯೇನ ಭಗವಾ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿಂಸು. ಏಕಮನ್ತಂ ನಿಸಿನ್ನೇ ಖೋ ಸಕ್ಕೇ ಉಪಾಸಕೇ ಭಗವಾ ಏತದವೋಚ – ‘‘ಅಪಿ ನು ತುಮ್ಹೇ, ಸಕ್ಕಾ, ಅಟ್ಠಙ್ಗಸಮನ್ನಾಗತಂ ಉಪೋಸಥಂ ಉಪವಸಥಾ’’ತಿ? ‘‘ಅಪ್ಪೇಕದಾ ಮಯಂ, ಭನ್ತೇ, ಅಟ್ಠಙ್ಗಸಮನ್ನಾಗತಂ ಉಪೋಸಥಂ ಉಪವಸಾಮ, ಅಪ್ಪೇಕದಾ ನ ಉಪವಸಾಮಾ’’ತಿ. ‘‘ತೇಸಂ ವೋ, ಸಕ್ಕಾ, ಅಲಾಭಾ ತೇಸಂ ದುಲ್ಲದ್ಧಂ, ಯೇ ತುಮ್ಹೇ ಏವಂ ಸೋಕಸಭಯೇ ಜೀವಿತೇ ಮರಣಸಭಯೇ ಜೀವಿತೇ ಅಪ್ಪೇಕದಾ ಅಟ್ಠಙ್ಗಸಮನ್ನಾಗತಂ ಉಪೋಸಥಂ ಉಪವಸಥ, ಅಪ್ಪೇಕದಾ ನ ಉಪವಸಥ.

‘‘ತಂ ಕಿಂ ಮಞ್ಞಥ, ಸಕ್ಕಾ, ಇಧ ಪುರಿಸೋ ಯೇನ ಕೇನಚಿ ಕಮ್ಮಟ್ಠಾನೇನ ಅನಾಪಜ್ಜ ಅಕುಸಲಂ ದಿವಸಂ ಅಡ್ಢಕಹಾಪಣಂ ನಿಬ್ಬಿಸೇಯ್ಯ. ದಕ್ಖೋ ಪುರಿಸೋ ಉಟ್ಠಾನಸಮ್ಪನ್ನೋತಿ ಅಲಂ ವಚನಾಯಾ’’ತಿ? ‘‘ಏವಂ, ಭನ್ತೇ’’.

‘‘ತಂ ಕಿಂ ಮಞ್ಞಥ, ಸಕ್ಕಾ, ಇಧ ಪುರಿಸೋ ಯೇನ ಕೇನಚಿ ಕಮ್ಮಟ್ಠಾನೇನ ಅನಾಪಜ್ಜ ಅಕುಸಲಂ ದಿವಸಂ ಕಹಾಪಣಂ ನಿಬ್ಬಿಸೇಯ್ಯ. ದಕ್ಖೋ ಪುರಿಸೋ ಉಟ್ಠಾನಸಮ್ಪನ್ನೋತಿ ಅಲಂ ವಚನಾಯಾ’’ತಿ? ‘‘ಏವಂ, ಭನ್ತೇ’’.

‘‘ತಂ ಕಿಂ, ಮಞ್ಞಥ, ಸಕ್ಕಾ, ಇಧ ಪುರಿಸೋ ಯೇನ ಕೇನಚಿ ಕಮ್ಮಟ್ಠಾನೇನ ಅನಾಪಜ್ಜ ಅಕುಸಲಂ ದಿವಸಂ ದ್ವೇ ಕಹಾಪಣೇ ನಿಬ್ಬಿಸೇಯ್ಯ … ತಯೋ ಕಹಾಪಣೇ ನಿಬ್ಬಿಸೇಯ್ಯ… ಚತ್ತಾರೋ ಕಹಾಪಣೇ ನಿಬ್ಬಿಸೇಯ್ಯ… ಪಞ್ಚ ಕಹಾಪಣೇ ನಿಬ್ಬಿಸೇಯ್ಯ… ಛ ಕಹಾಪಣೇ ನಿಬ್ಬಿಸೇಯ್ಯ… ಸತ್ತ ಕಹಾಪಣೇ ನಿಬ್ಬಿಸೇಯ್ಯ… ಅಟ್ಠ ಕಹಾಪಣೇ ನಿಬ್ಬಿಸೇಯ್ಯ… ನವ ಕಹಾಪಣೇ ನಿಬ್ಬಿಸೇಯ್ಯ… ದಸ ಕಹಾಪಣೇ ನಿಬ್ಬಿಸೇಯ್ಯ… ವೀಸ ಕಹಾಪಣೇ ನಿಬ್ಬಿಸೇಯ್ಯ… ತಿಂಸ ಕಹಾಪಣೇ ನಿಬ್ಬಿಸೇಯ್ಯ… ಚತ್ತಾರೀಸಂ ಕಹಾಪಣೇ ನಿಬ್ಬಿಸೇಯ್ಯ… ಪಞ್ಞಾಸಂ ಕಹಾಪಣೇ ನಿಬ್ಬಿಸೇಯ್ಯ… ಕಹಾಪಣಸತಂ ನಿಬ್ಬಿಸೇಯ್ಯ. ದಕ್ಖೋ ಪುರಿಸೋ ಉಟ್ಠಾನಸಮ್ಪನ್ನೋತಿ ಅಲಂ ವಚನಾಯಾ’’ತಿ? ‘‘ಏವಂ, ಭನ್ತೇ’’.

‘‘ತಂ ಕಿಂ ಮಞ್ಞಥ, ಸಕ್ಕಾ, ಅಪಿ ನು ಸೋ ಪುರಿಸೋ ದಿವಸೇ ದಿವಸೇ ಕಹಾಪಣಸತಂ ಕಹಾಪಣಸಹಸ್ಸಂ ನಿಬ್ಬಿಸಮಾನೋ ಲದ್ಧಂ ಲದ್ಧಂ ನಿಕ್ಖಿಪನ್ತೋ ವಸ್ಸಸತಾಯುಕೋ ವಸ್ಸಸತಜೀವೀ ಮಹನ್ತಂ ಭೋಗಕ್ಖನ್ಧಂ ಅಧಿಗಚ್ಛೇಯ್ಯಾ’’ತಿ? ‘‘ಏವಂ, ಭನ್ತೇ’’.

‘‘ತಂ ಕಿಂ ಮಞ್ಞಥ, ಸಕ್ಕಾ, ಅಪಿ ನು ಸೋ ಪುರಿಸೋ ಭೋಗಹೇತು ಭೋಗನಿದಾನಂ ಭೋಗಾಧಿಕರಣಂ ಏಕಂ ವಾ ರತ್ತಿಂ ಏಕಂ ವಾ ದಿವಸಂ ಉಪಡ್ಢಂ ವಾ ರತ್ತಿಂ ಉಪಡ್ಢಂ ವಾ ದಿವಸಂ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯಾ’’ತಿ? ‘‘ನೋ ಹೇತಂ, ಭನ್ತೇ’’. ‘‘ತಂ ಕಿಸ್ಸ ಹೇತು’’? ‘‘ಕಾಮಾ ಹಿ, ಭನ್ತೇ, ಅನಿಚ್ಚಾ ತುಚ್ಛಾ ಮುಸಾ ಮೋಸಧಮ್ಮಾ’’ತಿ.

‘‘ಇಧ ಪನ ವೋ, ಸಕ್ಕಾ, ಮಮ ಸಾವಕೋ ದಸ ವಸ್ಸಾನಿ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಯಥಾ ಮಯಾನುಸಿಟ್ಠಂ ತಥಾ ಪಟಿಪಜ್ಜಮಾನೋ ಸತಮ್ಪಿ ವಸ್ಸಾನಿ ಸತಮ್ಪಿ ವಸ್ಸಸತಾನಿ ಸತಮ್ಪಿ ವಸ್ಸಸಹಸ್ಸಾನಿ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯ. ಸೋ ಚ ಖ್ವಸ್ಸ ಸಕದಾಗಾಮೀ ವಾ ಅನಾಗಾಮೀ ವಾ ಅಪಣ್ಣಕಂ ವಾ ಸೋತಾಪನ್ನೋ. ತಿಟ್ಠನ್ತು, ಸಕ್ಕಾ, ದಸ ವಸ್ಸಾನಿ.

ಇಧ ಮಮ ಸಾವಕೋ ನವ ವಸ್ಸಾನಿ… ಅಟ್ಠ ವಸ್ಸಾನಿ… ಸತ್ತ ವಸ್ಸಾನಿ… ಛ ವಸ್ಸಾನಿ… ಪಞ್ಚ ವಸ್ಸಾನಿ ಚತ್ತಾರಿ ವಸ್ಸಾನಿ… ತೀಣಿ ವಸ್ಸಾನಿ… ದ್ವೇ ವಸ್ಸಾನಿ… ಏಕಂ ವಸ್ಸಂ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಯಥಾ ಮಯಾನುಸಿಟ್ಠಂ ತಥಾ ಪಟಿಪಜ್ಜಮಾನೋ ಸತಮ್ಪಿ ವಸ್ಸಾನಿ ಸತಮ್ಪಿ ವಸ್ಸಸತಾನಿ ಸತಮ್ಪಿ ವಸ್ಸಸಹಸ್ಸಾನಿ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯ, ಸೋ ಚ ಖ್ವಸ್ಸ ಸಕದಾಗಾಮೀ ವಾ ಅನಾಗಾಮೀ ವಾ ಅಪಣ್ಣಕಂ ವಾ ಸೋತಾಪನ್ನೋ. ತಿಟ್ಠತು, ಸಕ್ಕಾ, ಏಕಂ ವಸ್ಸಂ.

ಇಧ ಮಮ ಸಾವಕೋ ದಸ ಮಾಸೇ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಯಥಾ ಮಯಾನುಸಿಟ್ಠಂ ತಥಾ ಪಟಿಪಜ್ಜಮಾನೋ ಸತಮ್ಪಿ ವಸ್ಸಾನಿ ಸತಮ್ಪಿ ವಸ್ಸಸತಾನಿ ಸತಮ್ಪಿ ವಸ್ಸಸಹಸ್ಸಾನಿ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯ, ಸೋ ಚ ಖ್ವಸ್ಸ ಸಕದಾಗಾಮೀ ವಾ ಅನಾಗಾಮೀ ವಾ ಅಪಣ್ಣಕಂ ವಾ ಸೋತಾಪನ್ನೋ. ತಿಟ್ಠನ್ತು, ಸಕ್ಕಾ, ದಸ ಮಾಸಾ.

ಇಧ ಮಮ ಸಾವಕೋ ನವ ಮಾಸೇ… ಅಟ್ಠ ಮಾಸೇ… ಸತ್ತ ಮಾಸೇ… ಛ ಮಾಸೇ… ಪಞ್ಚ ಮಾಸೇ… ಚತ್ತಾರೋ ಮಾಸೇ… ತಯೋ ಮಾಸೇ… ದ್ವೇ ಮಾಸೇ… ಏಕಂ ಮಾಸಂ… ಅಡ್ಢಮಾಸಂ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಯಥಾ ಮಯಾನುಸಿಟ್ಠಂ ತಥಾ ಪಟಿಪಜ್ಜಮಾನೋ ಸತಮ್ಪಿ ವಸ್ಸಾನಿ ಸತಮ್ಪಿ ವಸ್ಸಸತಾನಿ ಸತಮ್ಪಿ ವಸ್ಸಸಹಸ್ಸಾನಿ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯ, ಸೋ ಚ ಖ್ವಸ್ಸ ಸಕದಾಗಾಮೀ ವಾ ಅನಾಗಾಮೀ ವಾ ಅಪಣ್ಣಕಂ ವಾ ಸೋತಾಪನ್ನೋ. ತಿಟ್ಠತು, ಸಕ್ಕಾ, ಅಡ್ಢಮಾಸೋ.

ಇಧ ಮಮ ಸಾವಕೋ ದಸ ರತ್ತಿನ್ದಿವೇ [ರತ್ತಿದಿವೇ (ಕ.)] ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಯಥಾ ಮಯಾನುಸಿಟ್ಠಂ ತಥಾ ಪಟಿಪಜ್ಜಮಾನೋ ಸತಮ್ಪಿ ವಸ್ಸಾನಿ ಸತಮ್ಪಿ ವಸ್ಸಸತಾನಿ ಸತಮ್ಪಿ ವಸ್ಸಸಹಸ್ಸಾನಿ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯ, ಸೋ ಚ ಖ್ವಸ್ಸ ಸಕದಾಗಾಮೀ ವಾ ಅನಾಗಾಮೀ ವಾ ಅಪಣ್ಣಕಂ ವಾ ಸೋತಾಪನ್ನೋ. ತಿಟ್ಠನ್ತು, ಸಕ್ಕಾ, ದಸ ರತ್ತಿನ್ದಿವಾ.

ಇಧ ಮಮ ಸಾವಕೋ ನವ ರತ್ತಿನ್ದಿವೇ… ಅಟ್ಠ ರತ್ತಿನ್ದಿವೇ… ಸತ್ತ ರತ್ತಿನ್ದಿವೇ… ಛ ರತ್ತಿನ್ದಿವೇ… ಪಞ್ಚ ರತ್ತಿನ್ದಿವೇ… ಚತ್ತಾರೋ ರತ್ತಿನ್ದಿವೇ… ತಯೋ ರತ್ತಿನ್ದಿವೇ… ದ್ವೇ ರತ್ತಿನ್ದಿವೇ… ಏಕಂ ರತ್ತಿನ್ದಿವಂ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಯಥಾ ಮಯಾನುಸಿಟ್ಠಂ ತಥಾ ಪಟಿಪಜ್ಜಮಾನೋ ಸತಮ್ಪಿ ವಸ್ಸಾನಿ ಸತಮ್ಪಿ ವಸ್ಸಸತಾನಿ ಸತಮ್ಪಿ ವಸ್ಸಸಹಸ್ಸಾನಿ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯ, ಸೋ ಚ ಖ್ವಸ್ಸ ಸಕದಾಗಾಮೀ ವಾ ಅನಾಗಾಮೀ ವಾ ಅಪಣ್ಣಕಂ ವಾ ಸೋತಾಪನ್ನೋ. ತೇಸಂ ವೋ, ಸಕ್ಕಾ, ಅಲಾಭಾ ತೇಸಂ ದುಲ್ಲದ್ಧಂ, ಯೇ ತುಮ್ಹೇ ಏವಂ ಸೋಕಸಭಯೇ ಜೀವಿತೇ ಮರಣಸಭಯೇ ಜೀವಿತೇ ಅಪ್ಪೇಕದಾ ಅಟ್ಠಙ್ಗಸಮನ್ನಾಗತಂ ಉಪೋಸಥಂ ಉಪವಸಥ, ಅಪ್ಪೇಕದಾ ನ ಉಪವಸಥಾ’’ತಿ. ‘‘ಏತೇ ಮಯಂ, ಭನ್ತೇ, ಅಜ್ಜತಗ್ಗೇ ಅಟ್ಠಙ್ಗಸಮನ್ನಾಗತಂ ಉಪೋಸಥಂ ಉಪವಸಿಸ್ಸಾಮಾ’’ತಿ. ಛಟ್ಠಂ.