೯. ಪಠಮಆನನ್ದಸುತ್ತಂ

೩೯. ಅಥ ಖೋ ಆಯಸ್ಮಾ ಆನನ್ದೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಆಯಸ್ಮಾ ಆನನ್ದೋ ಭಗವನ್ತಂ ಏತದವೋಚ – ‘‘‘ಸಙ್ಘಭೇದೋ ಸಙ್ಘಭೇದೋ’ತಿ, ಭನ್ತೇ, ವುಚ್ಚತಿ. ಕಿತ್ತಾವತಾ ನು ಖೋ, ಭನ್ತೇ, ಸಙ್ಘೋ ಭಿನ್ನೋ ಹೋತೀ’’ತಿ? ‘‘ಇಧಾನನ್ದ, ಭಿಕ್ಖೂ ಅಧಮ್ಮಂ ಧಮ್ಮೋತಿ ದೀಪೇನ್ತಿ, ಧಮ್ಮಂ ಅಧಮ್ಮೋತಿ ದೀಪೇನ್ತಿ, ಅವಿನಯಂ ವಿನಯೋತಿ ದೀಪೇನ್ತಿ…ಪೇ… ಪಞ್ಞತ್ತಂ ತಥಾಗತೇನ ಅಪಞ್ಞತ್ತಂ ತಥಾಗತೇನಾತಿ ದೀಪೇನ್ತಿ. ತೇ ಇಮೇಹಿ ದಸಹಿ ವತ್ಥೂಹಿ ಅವಕಸ್ಸನ್ತಿ ಅಪಕಸ್ಸನ್ತಿ ಆವೇನಿ ಕಮ್ಮಾನಿ ಕರೋನ್ತಿ ಆವೇನಿ ಪಾತಿಮೋಕ್ಖಂ ಉದ್ದಿಸನ್ತಿ. ಏತ್ತಾವತಾ ಖೋ, ಆನನ್ದ, ಸಙ್ಘೋ ಭಿನ್ನೋ ಹೋತೀ’’ತಿ.

‘‘ಸಮಗ್ಗಂ ಪನ, ಭನ್ತೇ, ಸಙ್ಘಂ ಭಿನ್ದಿತ್ವಾ ಕಿಂ ಸೋ ಪಸವತೀ’’ತಿ? ‘‘ಕಪ್ಪಟ್ಠಿಕಂ, ಆನನ್ದ, ಕಿಬ್ಬಿಸಂ ಪಸವತೀ’’ತಿ. ‘‘ಕಿಂ ಪನ, ಭನ್ತೇ, ಕಪ್ಪಟ್ಠಿಕಂ ಕಿಬ್ಬಿಸ’’ನ್ತಿ? ‘‘ಕಪ್ಪಂ, ಆನನ್ದ, ನಿರಯಮ್ಹಿ ಪಚ್ಚತೀತಿ –

‘‘ಆಪಾಯಿಕೋ ನೇರಯಿಕೋ, ಕಪ್ಪಟ್ಠೋ ಸಙ್ಘಭೇದಕೋ;

ವಗ್ಗರತೋ ಅಧಮ್ಮಟ್ಠೋ, ಯೋಗಕ್ಖೇಮಾ ಪಧಂಸತಿ;

ಸಙ್ಘಂ ಸಮಗ್ಗಂ ಭಿನ್ದಿತ್ವಾ [ಭೇತ್ವಾನ (ಸೀ. ಸ್ಯಾ.), ಭಿತ್ವಾನ (ಕ.) ಚೂಳವ. ೩೫೪; ಇತಿವು. ೧೮; ಕಥಾವ. ೬೫೭] ಕಪ್ಪಂ ನಿರಯಮ್ಹಿ ಪಚ್ಚತೀ’’ತಿ. ನವಮಂ;