೫. ನಿಸ್ಸಯಸುತ್ತಂ

೩೫. ‘‘ಕತಿಹಿ ನು ಖೋ, ಭನ್ತೇ, ಧಮ್ಮೇಹಿ ಸಮನ್ನಾಗತೇನ ಭಿಕ್ಖುನಾ ನಿಸ್ಸಯೋ ದಾತಬ್ಬೋ’’ತಿ? ‘‘ದಸಹಿ ಖೋ, ಉಪಾಲಿ, ಧಮ್ಮೇಹಿ ಸಮನ್ನಾಗತೇನ ಭಿಕ್ಖುನಾ ನಿಸ್ಸಯೋ ದಾತಬ್ಬೋ. ಕತಮೇಹಿ ದಸಹಿ? ಇಧುಪಾಲಿ, ಭಿಕ್ಖು ಸೀಲವಾ ಹೋತಿ…ಪೇ… ಸಮಾದಾಯ ಸಿಕ್ಖತಿ ಸಿಕ್ಖಾಪದೇಸು; ಬಹುಸ್ಸುತೋ ಹೋತಿ…ಪೇ… ದಿಟ್ಠಿಯಾ ಸುಪ್ಪಟಿವಿದ್ಧಾ; ಪಾತಿಮೋಕ್ಖಂ ಖೋ ಪನಸ್ಸ ವಿತ್ಥಾರೇನ ಸ್ವಾಗತಂ ಹೋತಿ ಸುವಿಭತ್ತಂ ಸುಪ್ಪವತ್ತಂ ಸುವಿನಿಚ್ಛಿತಂ ಸುತ್ತಸೋ ಅನುಬ್ಯಞ್ಜನಸೋ; ಪಟಿಬಲೋ ಹೋತಿ ಗಿಲಾನಂ ಉಪಟ್ಠಾತುಂ ವಾ ಉಪಟ್ಠಾಪೇತುಂ ವಾ; ಪಟಿಬಲೋ ಹೋತಿ ಅನಭಿರತಿಂ ವೂಪಕಾಸೇತುಂ ವಾ ವೂಪಕಾಸಾಪೇತುಂ ವಾ; ಪಟಿಬಲೋ ಹೋತಿ ಉಪ್ಪನ್ನಂ ಕುಕ್ಕುಚ್ಚಂ ಧಮ್ಮತೋ ವಿನೋದೇತುಂ; ಪಟಿಬಲೋ ಹೋತಿ ಉಪ್ಪನ್ನಂ ದಿಟ್ಠಿಗತಂ ಧಮ್ಮತೋ ವಿವೇಚೇತುಂ; ಪಟಿಬಲೋ ಹೋತಿ ಅಧಿಸೀಲೇ…ಪೇ… ಅಧಿಚಿತ್ತೇ… ಅಧಿಪಞ್ಞಾಯ ಸಮಾದಪೇತುಂ. ಇಮೇಹಿ ಖೋ, ಉಪಾಲಿ, ದಸಹಿ ಧಮ್ಮೇಹಿ ಸಮನ್ನಾಗತೇನ ಭಿಕ್ಖುನಾ ನಿಸ್ಸಯೋ ದಾತಬ್ಬೋ’’ತಿ. ಪಞ್ಚಮಂ.