೨. ಪಾತಿಮೋಕ್ಖಟ್ಠಪನಾಸುತ್ತಂ

೩೨. ‘‘ಕತಿ ನು ಖೋ, ಭನ್ತೇ, ಪಾತಿಮೋಕ್ಖಟ್ಠಪನಾ’’ತಿ? ‘‘ದಸ ಖೋ, ಉಪಾಲಿ, ಪಾತಿಮೋಕ್ಖಟ್ಠಪನಾ. ಕತಮೇ ದಸ? ಪಾರಾಜಿಕೋ ತಸ್ಸಂ ಪರಿಸಾಯಂ ನಿಸಿನ್ನೋ ಹೋತಿ, ಪಾರಾಜಿಕಕಥಾ ವಿಪ್ಪಕತಾ ಹೋತಿ, ಅನುಪಸಮ್ಪನ್ನೋ ತಸ್ಸಂ ಪರಿಸಾಯಂ ನಿಸಿನ್ನೋ ಹೋತಿ, ಅನುಪಸಮ್ಪನ್ನಕಥಾ ವಿಪ್ಪಕತಾ ಹೋತಿ, ಸಿಕ್ಖಂ ಪಚ್ಚಕ್ಖಾತಕೋ ತಸ್ಸಂ ಪರಿಸಾಯಂ ನಿಸಿನ್ನೋ ಹೋತಿ, ಸಿಕ್ಖಂ ಪಚ್ಚಕ್ಖಾತಕಕಥಾ ವಿಪ್ಪಕತಾ ಹೋತಿ, ಪಣ್ಡಕೋ ತಸ್ಸಂ ಪರಿಸಾಯಂ ನಿಸಿನ್ನೋ ಹೋತಿ, ಪಣ್ಡಕಕಥಾ ವಿಪ್ಪಕತಾ ಹೋತಿ, ಭಿಕ್ಖುನಿದೂಸಕೋ ತಸ್ಸಂ ಪರಿಸಾಯಂ ನಿಸಿನ್ನೋ ಹೋತಿ, ಭಿಕ್ಖುನಿದೂಸಕಕಥಾ ವಿಪ್ಪಕತಾ ಹೋತಿ – ಇಮೇ ಖೋ, ಉಪಾಲಿ, ದಸ ಪಾತಿಮೋಕ್ಖಟ್ಠಪನಾ’’ತಿ. ದುತಿಯಂ.