៧. វិស្សជ្ជនាវារោ

៣៥០. យស្មិំ សមយេ សម្មុខាវិនយេន ច សតិវិនយេន ច អធិករណំ វូបសម្មតិ – យត្ថ សតិវិនយោ តត្ថ សម្មុខាវិនយោ, យត្ថ សម្មុខាវិនយោ តត្ថ សតិវិនយោ, ន តត្ថ អមូឡ្ហវិនយោ, ន តត្ថ បដិញ្ញាតករណំ, ន តត្ថ យេភុយ្យសិកា, ន តត្ថ តស្សបាបិយសិកា, ន តត្ថ តិណវត្ថារកោ. យស្មិំ សមយេ សម្មុខាវិនយេន ច អមូឡ្ហវិនយេន ច…បេ… សម្មុខាវិនយេន ច បដិញ្ញាតករណេន ច…បេ… សម្មុខាវិនយេន ច យេភុយ្យសិកាយ ច…បេ… សម្មុខាវិនយេន ច តស្សបាបិយសិកាយ ច…បេ… សម្មុខាវិនយេន ច តិណវត្ថារកេន ច អធិករណំ វូបសម្មតិ – យត្ថ តិណវត្ថារកោ តត្ថ សម្មុខាវិនយោ, យត្ថ សម្មុខាវិនយោ តត្ថ តិណវត្ថារកោ, ន តត្ថ សតិវិនយោ, ន តត្ថ អមូឡ្ហវិនយោ, ន តត្ថ បដិញ្ញាតករណំ, ន តត្ថ យេភុយ្យសិកា, ន តត្ថ តស្សបាបិយសិកា.