១០. សត្តសមថនានត្ថាទិ

៣៥៤. សម្មុខាវិនយោតិ វា សតិវិនយោតិ វា – ឥមេ ធម្មា នានត្ថា នានាព្យញ្ជនា ឧទាហុ ឯកត្ថា ព្យញ្ជនមេវ នានំ? សម្មុខាវិនយោតិ វា អមូឡ្ហវិនយោតិ វា…បេ… សម្មុខាវិនយោតិ វា បដិញ្ញាតករណន្តិ វា… សម្មុខាវិនយោតិ វា យេភុយ្យសិកាតិ វា… សម្មុខាវិនយោតិ វា តស្សបាបិយសិកាតិ វា… សម្មុខាវិនយោតិ វា តិណវត្ថារកោតិ វា – ឥមេ ធម្មា នានត្ថា នានាព្យញ្ជនា ឧទាហុ ឯកត្ថា ព្យញ្ជនមេវ នានំ? សម្មុខាវិនយោតិ វា សតិវិនយោតិ វា – ឥមេ ធម្មា នានត្ថា ចេវ នានាព្យញ្ជនា ច. សម្មុខាវិនយោតិ វា អមូឡ្ហវិនយោតិ វា…បេ… សម្មុខាវិនយោតិ វា បដិញ្ញាតករណន្តិ វា… សម្មុខាវិនយោតិ វា យេភុយ្យសិកាតិ វា… សម្មុខាវិនយោតិ វា តស្សបាបិយសិកាតិ វា… សម្មុខាវិនយោតិ វា តិណវត្ថារកោតិ វា – ឥមេ ធម្មា នានត្ថា ចេវ នានា ព្យញ្ជនា ច.

៣៥៥. [ចូឡវ. ២២៤] វិវាទោ វិវាទាធិករណំ, វិវាទោ នោ អធិករណំ, អធិករណំ នោ វិវាទោ, អធិករណញ្ចេវ វិវាទោ ច? សិយា វិវាទោ វិវាទាធិករណំ, សិយា វិវាទោ នោ អធិករណំ, សិយា អធិករណំ នោ វិវាទោ, សិយា អធិករណញ្ចេវ វិវាទោ ច.

តត្ថ កតមោ វិវាទោ វិវាទាធិករណំ? ឥធ ភិក្ខូ វិវទន្តិ ធម្មោតិ វា អធម្មោតិ វា…បេ… ទុដ្ឋុល្លា អាបត្តីតិ វា អទុដ្ឋុល្លា អាបត្តីតិ វា. យំ តត្ថ ភណ្ឌនំ, កលហោ, វិគ្គហោ, វិវាទោ, នានាវាទោ, អញ្ញថាវាទោ, វិបច្ចតាយ វោហារោ, មេធកំ – អយំ វិវាទោ វិវាទាធិករណំ.

តត្ថ កតមោ វិវាទោ នោ អធិករណំ? មាតាបិ បុត្តេន វិវទតិ, បុត្តោបិ មាតរា វិវទតិ, បិតាបិ បុត្តេន វិវទតិ, បុត្តោបិ បិតរា វិវទតិ, ភាតាបិ ភាតរា វិវទតិ, ភាតាបិ ភគិនិយា វិវទតិ, ភគិនីបិ ភាតរា វិវទតិ, សហាយោបិ សហាយេន វិវទតិ – អយំ វិវាទោ នោ អធិករណំ.

តត្ថ កតមំ អធិករណំ នោ វិវាទោ? អនុវាទាធិករណំ, អាបត្តាធិករណំ, កិច្ចាធិករណំ – ឥទំ អធិករណំ នោ វិវាទោ.

តត្ថ កតមំ អធិករណញ្ចេវ វិវាទោ ច? វិវាទាធិករណំ អធិករណញ្ចេវ វិវាទោ ច.

៣៥៦. [ចូឡវ. ២២៤ អាទយោ] អនុវាទោ អនុវាទាធិករណំ, អនុវាទោ នោ អធិករណំ, អធិករណំ នោ អនុវាទោ, អធិករណញ្ចេវ អនុវាទោ ច? សិយា អនុវាទោ អនុវាទាធិករណំ, សិយា អនុវាទោ នោ អធិករណំ, សិយា អធិករណំ នោ អនុវាទោ, សិយា អធិករណញ្ចេវ អនុវាទោ ច.

តត្ថ កតមោ អនុវាទោ អនុវាទាធិករណំ? ឥធ ភិក្ខូ ភិក្ខុំ អនុវទន្តិ សីលវិបត្តិយា វា អាចារវិបត្តិយា វា ទិដ្ឋិវិបត្តិយា វា អាជីវវិបត្តិយា វា. យោ តត្ថ អនុវាទោ, អនុវទនា អនុល្លបនា អនុភណនា អនុសម្បវង្កតា អព្ភុស្សហនតា អនុពលប្បទានំ – អយំ អនុវាទោ អនុវាទាធិករណំ.

តត្ថ កតមោ អនុវាទោ នោ អធិករណំ? មាតាបិ បុត្តំ អនុវទតិ, បុត្តោបិ មាតរំ អនុវទតិ, បិតាបិ បុត្តំ អនុវទតិ, បុត្តោបិ បិតរំ អនុវទតិ, ភាតាបិ ភាតរំ អនុវទតិ, ភាតាបិ ភគិនិំ អនុវទតិ, ភគិនីបិ ភាតរំ អនុវទតិ, សហាយោបិ សហាយំ អនុវទតិ – អយំ អនុវាទោ នោ អធិករណំ.

តត្ថ កតមំ អធិករណំ នោ អនុវាទោ? អាបត្តាធិករណំ កិច្ចាធិករណំ វិវាទាធិករណំ – ឥទំ អធិករណំ នោ អនុវាទោ.

តត្ថ កតមំ អធិករណញ្ចេវ អនុវាទោ ច? អនុវាទាធិករណំ អធិករណញ្ចេវ អនុវាទោ ច.

៣៥៧. អាបត្តិ អាបត្តាធិករណំ, អាបត្តិ នោ អធិករណំ, អធិករណំ នោ អាបត្តិ, អធិករណញ្ចេវ អាបត្តិ ច? សិយា អាបត្តិ អាបត្តាធិករណំ, សិយា អាបត្តិ នោ អធិករណំ, សិយា អធិករណំ នោ អាបត្តិ, សិយា អធិករណញ្ចេវ អាបត្តិ ច.

តត្ថ កតមា អាបត្តិ អាបត្តាធិករណំ? បញ្ចបិ អាបត្តិក្ខន្ធា អាបត្តាធិករណំ. សត្តបិ អាបត្តិក្ខន្ធា អាបត្តាធិករណំ. អយំ អាបត្តិ អាបត្តាធិករណំ.

តត្ថ កតមា អាបត្តិ នោ អធិករណំ? សោតាបត្តិ សមាបត្តិ – អយំ អាបត្តិ នោ អធិករណំ.

តត្ថ កតមំ អធិករណំ នោ អាបត្តិ? កិច្ចាធិករណំ វិវាទាធិករណំ អនុវាទាធិករណំ – ឥទំ អធិករណំ នោ អាបត្តិ.

តត្ថ កតមំ អធិករណញ្ចេវ អាបត្តិ ច? អាបត្តាធិករណំ អធិករណញ្ចេវ អាបត្តិ ច.

៣៥៨. [ចូឡវ. ២២៣] កិច្ចំ កិច្ចាធិករណំ, កិច្ចំ នោ អធិករណំ, អធិករណំ នោ កិច្ចំ, អធិករណញ្ចេវ កិច្ចញ្ច? សិយា កិច្ចំ កិច្ចាធិករណំ, សិយា កិច្ចំ នោ អធិករណំ, សិយា អធិករណំ នោ កិច្ចំ, សិយា អធិករណញ្ចេវ កិច្ចញ្ច.

តត្ថ កតមំ កិច្ចំ កិច្ចាធិករណំ? យា សង្ឃស្ស កិច្ចយតា ករណីយតា អបលោកនកម្មំ ញត្តិកម្មំ ញត្តិទុតិយកម្មំ ញត្តិចតុត្ថកម្មំ – ឥទំ កិច្ចំ កិច្ចាធិករណំ.

តត្ថ កតមំ កិច្ចំ នោ អធិករណំ? អាចរិយកិច្ចំ ឧបជ្ឈាយកិច្ចំ [ឧបជ្ឈាយកិច្ចំ សកិច្ចំ (ក.)] សមានុបជ្ឈាយកិច្ចំ សមានាចរិយកិច្ចំ – ឥទំ កិច្ចំ នោ អធិករណំ.

តត្ថ កតមំ អធិករណំ នោ កិច្ចំ? វិវាទាធិករណំ អនុវាទាធិករណំ អាបត្តាធិករណំ – ឥទំ អធិករណំ នោ កិច្ចំ.

តត្ថ កតមំ អធិករណញ្ចេវ កិច្ចញ្ច? កិច្ចាធិករណំ អធិករណញ្ចេវ កិច្ចំ ចាតិ.

អធិករណភេទោ និដ្ឋិតោ.