១. ឧក្កោដនភេទាទិ

៣៤០. [ចូឡវ. ២១៥; បរិ. ២៧៥] ចត្តារិ អធិករណានិ. វិវាទាធិករណំ, អនុវាទាធិករណំ, អាបត្តាធិករណំ, កិច្ចាធិករណំ – ឥមានិ ចត្តារិ អធិករណានិ.

ឥមេសំ ចតុន្នំ អធិករណានំ កតិ ឧក្កោដា? ឥមេសំ ចតុន្នំ អធិករណានំ ទស ឧក្កោដា. វិវាទាធិករណស្ស ទ្វេ ឧក្កោដា, អនុវាទាធិករណស្ស ចត្តារោ ឧក្កោដា, អាបត្តាធិករណស្ស តយោ ឧក្កោដា, កិច្ចាធិករណស្ស ឯកោ ឧក្កោដោ – ឥមេសំ ចតុន្នំ អធិករណានំ ឥមេ ទស ឧក្កោដា.

វិវាទាធិករណំ ឧក្កោដេន្តោ កតិ សមថេ ឧក្កោដេតិ? អនុវាទាធិករណំ ឧក្កោដេន្តោ កតិ សមថេ ឧក្កោដេតិ? អាបត្តាធិករណំ ឧក្កោដេន្តោ កតិ សមថេ ឧក្កោដេតិ? កិច្ចាធិករណំ ឧក្កោដេន្តោ កតិ សមថេ ឧក្កោដេតិ?

វិវាទាធិករណំ ឧក្កោដេន្តោ ទ្វេ សមថេ ឧក្កោដេតិ. អនុវាទាធិករណំ ឧក្កោដេន្តោ ចត្តារោ សមថេ ឧក្កោដេតិ. អាបត្តាធិករណំ ឧក្កោដេន្តោ តយោ សមថេ ឧក្កោដេតិ. កិច្ចាធិករណំ ឧក្កោដេន្តោ ឯកំ សមថំ ឧក្កោដេតិ.

៣៤១. កតិ ឧក្កោដា? កតិហាការេហិ ឧក្កោដនំ បសវតិ? កតិហង្គេហិ សមន្នាគតោ បុគ្គលោ អធិករណំ ឧក្កោដេតិ? កតិ បុគ្គលា អធិករណំ ឧក្កោដេន្តា អាបត្តិំ អាបជ្ជន្តិ?

ទ្វាទស ឧក្កោដា. ទសហាការេហិ ឧក្កោដនំ បសវតិ. ចតូហង្គេហិ សមន្នាគតោ បុគ្គលោ អធិករណំ ឧក្កោដេតិ. ចត្តារោ បុគ្គលា អធិករណំ ឧក្កោដេន្តា អាបត្តិំ អាបជ្ជន្តិ?

កតមេ ទ្វាទស ឧក្កោដា? អកតំ កម្មំ, ទុក្កដំ កម្មំ, បុន កាតព្ពំ កម្មំ, អនិហតំ, ទុន្និហតំ, បុន និហនិតព្ពំ, អវិនិច្ឆិតំ, ទុវិនិច្ឆិតំ, បុន វិនិច្ឆិតព្ពំ, អវូបសន្តំ, ទុវូបសន្តំ, បុន វូបសមេតព្ពន្តិ – ឥមេ ទ្វាទស ឧក្កោដា.

កតមេហិ ទសហាការេហិ ឧក្កោដនំ បសវតិ? តត្ថ ជាតកំ អធិករណំ ឧក្កោដេតិ, តត្ថ ជាតកំ វូបសន្តំ អធិករណំ ឧក្កោដេតិ, អន្តរាមគ្គេ អធិករណំ ឧក្កោដេតិ, អន្តរាមគ្គេ វូបសន្តំ អធិករណំ ឧក្កោដេតិ, តត្ថ គតំ អធិករណំ ឧក្កោដេតិ, តត្ថ គតំ វូបសន្តំ អធិករណំ ឧក្កោដេតិ, សតិវិនយំ ឧក្កោដេតិ, អមូឡ្ហវិនយំ ឧក្កោដេតិ, តស្សបាបិយសិកំ ឧក្កោដេតិ, តិណវត្ថារកំ ឧក្កោដេតិ – ឥមេហិ ទសហាការេហិ ឧក្កោដនំ បសវតិ.

កតមេហិ ចតូហង្គេហិ សមន្នាគតោ បុគ្គលោ អធិករណំ ឧក្កោដេតិ? ឆន្ទាគតិំ គច្ឆន្តោ អធិករណំ ឧក្កោដេតិ, ទោសាគតិំ គច្ឆន្តោ អធិករណំ ឧក្កោដេតិ, មោហាគតិំ គច្ឆន្តោ អធិករណំ ឧក្កោដេតិ, ភយាគតិំ គច្ឆន្តោ អធិករណំ ឧក្កោដេតិ – ឥមេហិ ចតូហង្គេហិ សមន្នាគតោ បុគ្គលោ អធិករណំ ឧក្កោដេតិ.

កតមេ ចត្តារោ បុគ្គលា អធិករណំ ឧក្កោដេន្តា អាបត្តិំ អាបជ្ជន្តិ? តទហុបសម្បន្នោ ឧក្កោដេតិ ឧក្កោដនកំ បាចិត្តិយំ, អាគន្តុកោ ឧក្កោដេតិ ឧក្កោដនកំ បាចិត្តិយំ, ការកោ ឧក្កោដេតិ ឧក្កោដនកំ បាចិត្តិយំ, ឆន្ទទាយកោ ឧក្កោដេតិ ឧក្កោដនកំ បាចិត្តិយំ – ឥមេ ចត្តារោ បុគ្គលា អធិករណំ ឧក្កោដេន្តា អាបត្តិំ អាបជ្ជន្តិ.