៣. ឆេទនកាទិ

៣៣៧. កតិ ឆេទនកានិ? កតិ ភេទនកានិ? កតិ ឧទ្ទាលនកានិ? កតិ អនញ្ញបាចិត្តិយានិ? កតិ ភិក្ខុសម្មុតិយោ? កតិ សាមីចិយោ? កតិ បរមានិ?

កតិ ជានន្តិ បញ្ញត្តា, ពុទ្ធេនាទិច្ចពន្ធុនា.

ឆ ឆេទនកានិ. ឯកំ ភេទនកំ. ឯកំ ឧទ្ទាលនកំ. ចត្តារិ អនញ្ញបាចិត្តិយានិ. ចតស្សោ ភិក្ខុសម្មុតិយោ. សត្ត សាមីចិយោ. ចុទ្ទស បរមានិ.

សោទស [សោឡស (សី. ស្យា.) អដ្ឋកថា ឱលោកេតព្ពា] ជានន្តិ បញ្ញត្តា, ពុទ្ធេនាទិច្ចពន្ធុនា.