៦. ឯឡកលោមសមុដ្ឋានំ

២៦៣. ឯឡកលោមា ទ្វេ សេយ្យា, អាហច្ច បិណ្ឌភោជនំ;

គណវិកាលសន្និធិ, ទន្តបោនេន ចេលកា.

ឧយ្យុត្តំ សេនំ [ឧយ្យុត្តំ វសេ (ស្យា.)] ឧយ្យោធិ, សុរា ឱរេន ន្ហាយនា;

ទុព្ពណ្ណេ ទ្វេ ទេសនិកា, លសុណុបតិដ្ឋេ នច្ចនា.

ន្ហានមត្ថរណំ សេយ្យា, អន្តោរដ្ឋេ តថា ពហិ;

អន្តោវស្សំ ចិត្តាគារំ, អាសន្ទិ សុត្តកន្តនា.

វេយ្យាវច្ចំ សហត្ថា ច, អភិក្ខុកាវាសេន ច;

ឆត្តំ យានញ្ច សង្ឃាណិំ, អលង្ការំ គន្ធវាសិតំ.

ភិក្ខុនី សិក្ខមានា ច, សាមណេរី គិហិនិយា;

អសំកច្ចិកា អាបត្តិ, ចត្តារីសា ចតុត្តរិ.

កាយេន ន វាចាចិត្តេន, កាយចិត្តេន ន វាចតោ;

ទ្វិសមុដ្ឋានិកា សព្ពេ, សមា ឯឡកលោមិកាតិ.

ឯឡកលោមសមុដ្ឋានំ និដ្ឋិតំ.