២. ទុតិយបារាជិកសមុដ្ឋានំ

២៥៩. អទិន្នំ វិគ្គហុត្តរិ, ទុដ្ឋុល្លា អត្តកាមិនំ;

អមូលា អញ្ញភាគិយា, អនិយតា ទុតិយិកា.

អច្ឆិន្ទេ បរិណាមនេ, មុសា ឱមសបេសុណា;

ទុដ្ឋុល្លា បថវីខណេ, ភូតំ អញ្ញាយ ឧជ្ឈាបេ.

និក្កឌ្ឍនំ សិញ្ចនញ្ច, អាមិសហេតុ ភុត្តាវី;

ឯហិ អនាទរិ ភិំសា, អបនិធេ ច ជីវិតំ.

ជានំ សប្បាណកំ កម្មំ, ឩនសំវាសនាសនា;

សហធម្មិកវិលេខា, មោហោ អមូលកេន ច.

កុក្កុច្ចំ ធម្មិកំ ចីវរំ, ទត្វា [កុក្កុច្ចំ ធម្មិកំ ចីវរំ (សី.), កុក្កុច្ចំ ធម្មិកំ ទត្វា (ស្យា.)] បរិណាមេយ្យ បុគ្គលេ;

កិំ តេ អកាលំ អច្ឆិន្ទេ, ទុគ្គហី និរយេន ច.

គណំ វិភង្គំ ទុព្ពលំ, កថិនាផាសុបស្សយំ;

អក្កោសចណ្ឌី មច្ឆរី, គព្ភិនី ច បាយន្តិយា.

ទ្វេវស្សំ សិក្ខា សង្ឃេន, តយោ ចេវ គិហីគតា;

កុមារិភូតា តិស្សោ ច, ឩនទ្វាទសសម្មតា.

អលំ តាវ សោកាវាសំ, ឆន្ទា អនុវស្សា ច ទ្វេ;

សិក្ខាបទា សត្តតិមេ, សមុដ្ឋានា តិកា កតា.

កាយចិត្តេន ន វាចា, វាចាចិត្តំ ន កាយិកំ;

តីហិ ទ្វារេហិ ជាយន្តិ, បារាជិកំ ទុតិយំ យថា.

ទុតិយបារាជិកសមុដ្ឋានំ និដ្ឋិតំ.