១. មុសាវាទវគ្គោ

១៦៥. សម្បជានមុសាវាទំ ភាសន្តោ កតិ អាបត្តិយោ អាបជ្ជតិ? សម្បជានមុសាវាទំ ភាសន្តោ បញ្ច អាបត្តិយោ អាបជ្ជតិ. បាបិច្ឆោ ឥច្ឆាបកតោ អសន្តំ អភូតំ ឧត្តរិមនុស្សធម្មំ ឧល្លបតិ, អាបត្តិ បារាជិកស្ស; ភិក្ខុំ អមូលកេន បារាជិកេន ធម្មេន អនុទ្ធំសេតិ, អាបត្តិ សង្ឃាទិសេសស្ស; ‘‘យោ តេ វិហារេ វសតិ, សោ ភិក្ខុ អរហា’’តិ ភណតិ, បដិវិជានន្តស្ស អាបត្តិ ថុល្លច្ចយស្ស; ន បដិវិជានន្តស្ស អាបត្តិ ទុក្កដស្ស; សម្បជានមុសាវាទេ បាចិត្តិយំ – សម្បជានមុសាវាទំ ភាសន្តោ ឥមា បញ្ច អាបត្តិយោ អាបជ្ជតិ.

ឱមសន្តោ ទ្វេ អាបត្តិយោ អាបជ្ជតិ. ឧបសម្បន្នំ ឱមសតិ, អាបត្តិ បាចិត្តិយស្ស; អនុបសម្បន្នំ ឱមសតិ, អាបត្តិ ទុក្កដស្ស.

បេសុញ្ញំ ឧបសំហរន្តោ ទ្វេ អាបត្តិយោ អាបជ្ជតិ. ឧបសម្បន្នស្ស បេសុញ្ញំ ឧបសំហរតិ, អាបត្តិ បាចិត្តិយស្ស; អនុបសម្បន្នស្ស បេសុញ្ញំ ឧបសំហរតិ, អាបត្តិ ទុក្កដស្ស.

អនុបសម្បន្នំ បទសោ ធម្មំ វាចេន្តោ ទ្វេ អាបត្តិយោ អាបជ្ជតិ. វាចេតិ, បយោគេ ទុក្កដំ; បទេ បទេ អាបត្តិ បាចិត្តិយស្ស.

អនុបសម្បន្នេន ឧត្តរិទិរត្តតិរត្តំ សហសេយ្យំ កប្បេន្តោ ទ្វេ អាបត្តិយោ អាបជ្ជតិ. និបជ្ជតិ, បយោគេ ទុក្កដំ; និបន្នេ អាបត្តិ បាចិត្តិយស្ស.

មាតុគាមេន សហសេយ្យំ កប្បេន្តោ ទ្វេ អាបត្តិយោ អាបជ្ជតិ. និបជ្ជតិ, បយោគេ ទុក្កដំ; និបន្នេ អាបត្តិ បាចិត្តិយស្ស.

មាតុគាមស្ស ឧត្តរិឆប្បញ្ចវាចាហិ ធម្មំ ទេសេន្តោ ទ្វេ អាបត្តិយោ អាបជ្ជតិ. ទេសេតិ, បយោគេ ទុក្កដំ; បទេ បទេ អាបត្តិ បាចិត្តិយស្ស.

អនុបសម្បន្នស្ស ឧត្តរិមនុស្សធម្មំ ភូតំ អារោចេន្តោ ទ្វេ អាបត្តិយោ អាបជ្ជតិ. អារោចេតិ, បយោគេ ទុក្កដំ; អារោចិតេ អាបត្តិ បាចិត្តិយស្ស.

ភិក្ខុស្ស ទុដ្ឋុល្លំ អាបត្តិំ អនុបសម្បន្នស្ស អារោចេន្តោ ទ្វេ អាបត្តិយោ អាបជ្ជតិ. អារោចេតិ, បយោគេ ទុក្កដំ; អារោចិតេ អាបត្តិ បាចិត្តិយស្ស.

បថវិំ ខណន្តោ ទ្វេ អាបត្តិយោ អាបជ្ជតិ. ខណតិ, បយោគេ ទុក្កដំ; បហារេ បហារេ អាបត្តិ បាចិត្តិយស្ស.

មុសាវាទវគ្គោ បឋមោ.