៧. អធិករណសមថា (ភិក្ខុនីវិភង្គោ)

ឥមេ ខោ បនាយ្យាយោ សត្ត អធិករណសមថា

ធម្មា ឧទ្ទេសំ អាគច្ឆន្តិ.

១២៤២. ឧប្បន្នុប្បន្នានំ អធិករណានំ សមថាយ វូបសមាយ សម្មុខាវិនយោ ទាតព្ពោ, សតិវិនយោ ទាតព្ពោ, អមូឡ្ហវិនយោ ទាតព្ពោ, បដិញ្ញាយ ការេតព្ពំ, យេភុយ្យសិកា, តស្សបាបិយសិកា, តិណវត្ថារកោតិ.

ឧទ្ទិដ្ឋា ខោ, អយ្យាយោ, សត្ត អធិករណសមថា ធម្មា. តត្ថាយ្យាយោ បុច្ឆាមិ – ‘‘កច្ចិត្ថ បរិសុទ្ធា’’? ទុតិយម្បិ បុច្ឆាមិ – ‘‘កច្ចិត្ថ បរិសុទ្ធា’’? តតិយម្បិ បុច្ឆាមិ – ‘‘កច្ចិត្ថ បរិសុទ្ធា’’? បរិសុទ្ធេត្ថាយ្យាយោ, តស្មា តុណ្ហី, ឯវមេតំ ធារយាមីតិ.

អធិករណសមថា និដ្ឋិតា.