៤. ចតុត្ថបារាជិកំ

៦៧៤. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខុនិយោ អវស្សុតា អវស្សុតស្ស បុរិសបុគ្គលស្ស ហត្ថគ្គហណម្បិ សាទិយន្តិ, សង្ឃាដិកណ្ណគ្គហណម្បិ សាទិយន្តិ, សន្តិដ្ឋន្តិបិ, សល្លបន្តិបិ, សង្កេតម្បិ គច្ឆន្តិ, បុរិសស្សបិ អព្ភាគមនំ សាទិយន្តិ, ឆន្នម្បិ អនុបវិសន្តិ, កាយម្បិ តទត្ថាយ ឧបសំហរន្តិ ឯតស្ស អសទ្ធម្មស្ស បដិសេវនត្ថាយ. យា តា ភិក្ខុនិយោ អប្បិច្ឆា…បេ… តា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខុនិយោ អវស្សុតា អវស្សុតស្ស បុរិសបុគ្គលស្ស ហត្ថគ្គហណម្បិ សាទិយិស្សន្តិ, សង្ឃាដិកណ្ណគ្គហណម្បិ សាទិយិស្សន្តិ, សន្តិដ្ឋិស្សន្តិបិ, សល្លបិស្សន្តិបិ, សង្កេតម្បិ គច្ឆិស្សន្តិ, បុរិសស្សបិ អព្ភាគមនំ សាទិយិស្សន្តិ, ឆន្នម្បិ អនុបវិសិស្សន្តិ, កាយម្បិ តទត្ថាយ ឧបសំហរិស្សន្តិ ឯតស្ស អសទ្ធម្មស្ស បដិសេវនត្ថាយា’’តិ…បេ… សច្ចំ កិរ, ភិក្ខវេ, ឆព្ពគ្គិយា ភិក្ខុនិយោ អវស្សុតា អវស្សុតស្ស បុរិសបុគ្គលស្ស ហត្ថគ្គហណម្បិ សាទិយន្តិ, សង្ឃាដិកណ្ណគ្គហណម្បិ សាទិយន្តិ, សន្តិដ្ឋន្តិបិ, សល្លបន្តិបិ, សង្កេតម្បិ គច្ឆន្តិ, បុរិសស្សបិ អព្ភាគមនំ សាទិយន្តិ, ឆន្នម្បិ អនុបវិសន្តិ, កាយម្បិ តទត្ថាយ ឧបសំហរន្តិ ឯតស្ស អសទ្ធម្មស្ស បដិសេវនត្ថាយាតិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម, ភិក្ខវេ, ឆព្ពគ្គិយា ភិក្ខុនិយោ អវស្សុតា អវស្សុតស្ស បុរិសបុគ្គលស្ស ហត្ថគ្គហណម្បិ សាទិយិស្សន្តិ, សង្ឃាដិកណ្ណគ្គហណម្បិ សាទិយិស្សន្តិ, សន្តិដ្ឋិស្សន្តិបិ, សល្លបិស្សន្តិបិ, សង្កេតម្បិ គច្ឆិស្សន្តិ, បុរិសស្សបិ អព្ភាគមនំ សាទិយិស្សន្តិ, ឆន្នម្បិ អនុបវិសិស្សន្តិ, កាយម្បិ តទត្ថាយ ឧបសំហរិស្សន្តិ ឯតស្ស អសទ្ធម្មស្ស បដិសេវនត្ថាយ! នេតំ, ភិក្ខវេ, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ភិក្ខុនិយោ ឥមំ សិក្ខាបទំ ឧទ្ទិសន្តុ –

៦៧៥. ‘‘យា បន ភិក្ខុនី អវស្សុតា អវស្សុតស្ស បុរិសបុគ្គលស្ស ហត្ថគ្គហណំ វា សាទិយេយ្យ, សង្ឃាដិកណ្ណគ្គហណំ វា សាទិយេយ្យ, សន្តិដ្ឋេយ្យ វា, សល្លបេយ្យ វា, សង្កេតំ វា គច្ឆេយ្យ, បុរិសស្ស វា អព្ភាគមនំ សាទិយេយ្យ, ឆន្នំ វា អនុបវិសេយ្យ, កាយំ វា តទត្ថាយ ឧបសំហរេយ្យ ឯតស្ស អសទ្ធម្មស្ស បដិសេវនត្ថាយ, អយម្បិ បារាជិកា ហោតិ អសំវាសា អដ្ឋវត្ថុកា’’តិ.

៦៧៦. យា បនាតិ យា យាទិសា…បេ… ភិក្ខុនីតិ…បេ… អយំ ឥមស្មិំ អត្ថេ អធិប្បេតា ភិក្ខុនីតិ.

អវស្សុតា នាម សារត្តា អបេក្ខវតី បដិពទ្ធចិត្តា.

អវស្សុតោ នាម សារត្តោ អបេក្ខវា បដិពទ្ធចិត្តោ.

បុរិសបុគ្គលោ នាម មនុស្សបុរិសោ, ន យក្ខោ ន បេតោ ន តិរច្ឆានគតោ វិញ្ញូ បដិពលោ កាយសំសគ្គំ សមាបជ្ជិតុំ.

ហត្ថគ្គហណំ វា សាទិយេយ្យាតិ ហត្ថោ នាម កប្បរំ ឧបាទាយ យាវ អគ្គនខា. ឯតស្ស អសទ្ធម្មស្ស បដិសេវនត្ថាយ ឧព្ភក្ខកំ អធោជាណុមណ្ឌលំ គហណំ សាទិយតិ, អាបត្តិ ថុល្លច្ចយស្ស.

សង្ឃាដិកណ្ណគ្គហណំ វា សាទិយេយ្យាតិ ឯតស្ស អសទ្ធម្មស្ស បដិសេវនត្ថាយ និវត្ថំ វា បារុតំ វា គហណំ សាទិយតិ, អាបត្តិ ថុល្លច្ចយស្ស.

សន្តិដ្ឋេយ្យ វាតិ ឯតស្ស អសទ្ធម្មស្ស បដិសេវនត្ថាយ បុរិសស្ស ហត្ថបាសេ តិដ្ឋតិ, អាបត្តិ ថុល្លច្ចយស្ស.

សល្លបេយ្យ វាតិ ឯតស្ស អសទ្ធម្មស្ស បដិសេវនត្ថាយ បុរិសស្ស ហត្ថបាសេ ឋិតា សល្លបតិ, អាបត្តិ ថុល្លច្ចយស្ស.

សង្កេតំ វា គច្ឆេយ្យាតិ ឯតស្ស អសទ្ធម្មស្ស បដិសេវនត្ថាយ បុរិសេន – ‘‘ឥត្ថន្នាមំ ឱកាសំ [ឥទំ បទំ អដ្ឋកថាយំ ន ទិស្សតិ] អាគច្ឆា’’តិ – វុត្តា គច្ឆតិ. បទេ បទេ អាបត្តិ ទុក្កដស្ស. បុរិសស្ស ហត្ថបាសំ ឱក្កន្តមត្តេ អាបត្តិ ថុល្លច្ចយស្ស.

បុរិសស្ស វា អព្ភាគមនំ សាទិយេយ្យាតិ ឯតស្ស អសទ្ធម្មស្ស បដិសេវនត្ថាយ បុរិសស្ស អព្ភាគមនំ សាទិយតិ, អាបត្តិ ទុក្កដស្ស. ហត្ថបាសំ ឱក្កន្តមត្តេ អាបត្តិ ថុល្លច្ចយស្ស.

ឆន្នំ វា អនុបវិសេយ្យាតិ ឯតស្ស អសទ្ធម្មស្ស បដិសេវនត្ថាយ យេន កេនចិ បដិច្ឆន្នំ ឱកាសំ បវិដ្ឋមត្តេ អាបត្តិ ថុល្លច្ចយស្ស.

កាយំ វា តទត្ថាយ ឧបសំហរេយ្យាតិ ឯតស្ស អសទ្ធម្មស្ស បដិសេវនត្ថាយ បុរិសស្ស ហត្ថបាសេ ឋិតា កាយំ ឧបសំហរតិ, អាបត្តិ ថុល្លច្ចយស្ស.

អយម្បីតិ បុរិមាយោ ឧបាទាយ វុច្ចតិ.

បារាជិកា ហោតីតិ សេយ្យថាបិ នាម តាលោ មត្ថកច្ឆិន្នោ អភព្ពោ បុន វិរុឡ្ហិយា ឯវមេវ ភិក្ខុនី អដ្ឋមំ វត្ថុំ បរិបូរេន្តី អស្សមណី ហោតិ អសក្យធីតា. តេន វុច្ចតិ បារាជិកា ហោតីតិ.

អសំវាសាតិ សំវាសោ នាម ឯកកម្មំ ឯកុទ្ទេសោ សមសិក្ខតា. ឯសោ សំវាសោ នាម. សោ តាយ សទ្ធិំ នត្ថិ. តេន វុច្ចតិ អសំវាសាតិ.

៦៧៧. អនាបត្តិ អសញ្ចិច្ច, អស្សតិយា, អជានន្តិយា, អសាទិយន្តិយា, ឧម្មត្តិកាយ, ខិត្តចិត្តាយ, វេទនាដ្ដាយ, អាទិកម្មិកាយាតិ.

ចតុត្ថបារាជិកំ សមត្តំ.

ឧទ្ទិដ្ឋា ខោ, អយ្យាយោ, អដ្ឋ បារាជិកា ធម្មា. យេសំ ភិក្ខុនី អញ្ញតរំ វា អញ្ញតរំ វា អាបជ្ជិត្វា ន លភតិ ភិក្ខុនីហិ សទ្ធិំ សំវាសំ, យថា បុរេ តថា បច្ឆា, បារាជិកា ហោតិ អសំវាសា. តត្ថាយ្យាយោ បុច្ឆាមិ – ‘‘កច្ចិត្ថ បរិសុទ្ធា’’? ទុតិយម្បិ បុច្ឆាមិ – ‘‘កច្ចិត្ថ បរិសុទ្ធា’’? តតិយម្បិ បុច្ឆាមិ – ‘‘កច្ចិត្ថ បរិសុទ្ធា’’? បរិសុទ្ធេត្ថាយ្យាយោ, តស្មា តុណ្ហី, ឯវមេតំ ធារយាមីតិ.

ភិក្ខុនិវិភង្គេ បារាជិកកណ្ឌំ និដ្ឋិតំ.