២. ទុតិយបារាជិកំ

៦៦៤. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន សុន្ទរីនន្ទា ភិក្ខុនី សាឡ្ហេន មិគារនត្តុនា គព្ភិនី ហោតិ. យាវ គព្ភោ តរុណោ អហោសិ តាវ ឆាទេសិ. បរិបក្កេ គព្ភេ វិព្ភមិត្វា វិជាយិ. ភិក្ខុនិយោ ថុល្លនន្ទំ ភិក្ខុនិំ ឯតទវោចុំ – ‘‘សុន្ទរីនន្ទា ខោ, អយ្យេ, អចិរវិព្ភន្តា វិជាតា. កច្ចិ នោ សា ភិក្ខុនីយេវ សមានា គព្ភិនី’’តិ? ‘‘ឯវំ, អយ្យេ’’តិ. ‘‘កិស្ស បន ត្វំ, អយ្យេ, ជានំ បារាជិកំ ធម្មំ អជ្ឈាបន្នំ ភិក្ខុនិំ នេវត្តនា បដិចោទេសិ ន គណស្ស អារោចេសី’’តិ? ‘‘យោ ឯតិស្សា អវណ្ណោ មយ្ហេសោ អវណ្ណោ, យា ឯតិស្សា អកិត្តិ មយ្ហេសា អកិត្តិ, យោ ឯតិស្សា អយសោ មយ្ហេសោ អយសោ, យោ ឯតិស្សា អលាភោ មយ្ហេសោ អលាភោ. ក្យាហំ, អយ្យេ, អត្តនោ អវណ្ណំ អត្តនោ អកិត្តិំ អត្តនោ អយសំ អត្តនោ អលាភំ បរេសំ អារោចេស្សាមី’’តិ? យា តា ភិក្ខុនិយោ អប្បិច្ឆា…បេ… តា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អយ្យា ថុល្លនន្ទា ជានំ បារាជិកំ ធម្មំ អជ្ឈាបន្នំ ភិក្ខុនិំ នេវត្តនា បដិចោទេស្សតិ ន គណស្ស អារោចេស្សតី’’តិ! អថ ខោ តា ភិក្ខុនិយោ ភិក្ខូនំ ឯតមត្ថំ អារោចេសុំ. ភិក្ខូ [យេ តេ ភិក្ខូ…បេ… (?)] ភគវតោ ឯតមត្ថំ អារោចេសុំ. អថ ខោ ភគវា ឯតស្មិំ និទានេ ឯតស្មិំ បករណេ ភិក្ខុសង្ឃំ សន្និបាតាបេត្វា ភិក្ខូ បដិបុច្ឆិ – ‘‘សច្ចំ កិរ, ភិក្ខវេ, ថុល្លនន្ទា ភិក្ខុនី ជានំ បារាជិកំ ធម្មំ អជ្ឈាបន្នំ ភិក្ខុនិំ នេវត្តនា បដិចោទេតិ [បដិចោទេសិ… អារោចេសីតិ (ក.)] ន គណស្ស អារោចេតី’’តិ [បដិចោទេសិ… អារោចេសីតិ (ក.)]? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម, ភិក្ខវេ, ថុល្លនន្ទា ភិក្ខុនី ជានំ បារាជិកំ ធម្មំ អជ្ឈាបន្នំ ភិក្ខុនិំ នេវត្តនា បដិចោទេស្សតិ ន គណស្ស អារោចេស្សតិ! នេតំ, ភិក្ខវេ, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ភិក្ខុនិយោ ឥមំ សិក្ខាបទំ ឧទ្ទិសន្តុ –

៦៦៥. ‘‘យា បន ភិក្ខុនី ជានំ បារាជិកំ ធម្មំ អជ្ឈាបន្នំ ភិក្ខុនិំ នេវត្តនា បដិចោទេយ្យ ន គណស្ស អារោចេយ្យ, យទា ច សា ឋិតា វា អស្ស ចុតា វា នាសិតា វា អវស្សដា វា, សា បច្ឆា ឯវំ វទេយ្យ – ‘បុព្ពេវាហំ, អយ្យេ, អញ្ញាសិំ ឯតំ ភិក្ខុនិំ ឯវរូបា ច ឯវរូបា ច សា ភគិនីតិ, នោ ច ខោ អត្តនា បដិចោទេស្សំ ន គណស្ស អារោចេស្ស’ន្តិ, អយម្បិ បារាជិកា ហោតិ អសំវាសា វជ្ជប្បដិច្ឆាទិកា’’តិ.

៦៦៦. យា បនាតិ យា យាទិសា…បេ… ភិក្ខុនីតិ…បេ… អយំ ឥមស្មិំ អត្ថេ អធិប្បេតា ភិក្ខុនីតិ.

ជានាតិ នាម សាមំ វា ជានាតិ, អញ្ញេ វា តស្សា អារោចេន្តិ, សា វា អារោចេតិ.

បារាជិកំ ធម្មំ អជ្ឈាបន្នន្តិ អដ្ឋន្នំ បារាជិកានំ អញ្ញតរំ បារាជិកំ អជ្ឈាបន្នំ.

នេវត្តនា បដិចោទេយ្យាតិ ន សយំ ចោទេយ្យ.

ន គណស្ស អារោចេយ្យាតិ ន អញ្ញាសំ ភិក្ខុនីនំ អារោចេយ្យ.

យទា ច សា ឋិតា វា អស្ស ចុតា វាតិ ឋិតា នាម សលិង្គេ ឋិតា វុច្ចតិ. ចុតា នាម កាលង្កតា វុច្ចតិ. នាសិតា នាម សយំ វា វិព្ភន្តា ហោតិ អញ្ញេហិ វា នាសិតា. អវស្សដា នាម តិត្ថាយតនំ សង្កន្តា វុច្ចតិ. សា បច្ឆា ឯវំ វទេយ្យ – ‘‘បុព្ពេវាហំ, អយ្យេ, អញ្ញាសិំ ឯតំ ភិក្ខុនិំ ឯវរូបា ច ឯវរូបា ច សា ភគិនី’’តិ.

នោ ច ខោ អត្តនា បដិចោទេស្សន្តិ សយំ វា ន ចោទេស្សំ.

ន គណស្ស អារោចេស្សន្តិ ន អញ្ញាសំ ភិក្ខុនីនំ អារោចេស្សំ.

អយម្បីតិ បុរិមាយោ ឧបាទាយ វុច្ចតិ.

បារាជិកា ហោតីតិ សេយ្យថាបិ នាម បណ្ឌុបលាសោ ពន្ធនា បមុត្តោ អភព្ពោ ហរិតត្ថាយ, ឯវមេវ ភិក្ខុនី ជានំ បារាជិកំ ធម្មំ អជ្ឈាបន្នំ ភិក្ខុនិំ នេវត្តនា បដិចោទេស្សាមិ ន គណស្ស អារោចេស្សាមីតិ ធុរំ និក្ខិត្តមត្តេ អស្សមណី ហោតិ អសក្យធីតា. តេន វុច្ចតិ បារាជិកា ហោតីតិ.

អសំវាសាតិ សំវាសោ នាម ឯកកម្មំ ឯកុទ្ទេសោ សមសិក្ខតា. ឯសោ សំវាសោ នាម. សោ តាយ សទ្ធិំ នត្ថិ. តេន វុច្ចតិ អសំវាសាតិ.

៦៦៧. អនាបត្តិ ‘‘សង្ឃស្ស ភណ្ឌនំ វា កលហោ វា វិគ្គហោ វា វិវាទោ វា ភវិស្សតី’’តិ នារោចេតិ, ‘‘សង្ឃភេទោ វា សង្ឃរាជិ វា ភវិស្សតី’’តិ នារោចេតិ, ‘‘អយំ កក្ខឡា ផរុសា ជីវិតន្តរាយំ វា ព្រហ្មចរិយន្តរាយំ វា ករិស្សតី’’តិ នារោចេតិ, អញ្ញា បតិរូបា ភិក្ខុនិយោ អបស្សន្តី នារោចេតិ, នច្ឆាទេតុកាមា នារោចេតិ, បញ្ញាយិស្សតិ សកេន កម្មេនាតិ នារោចេតិ, ឧម្មត្តិកាយ…បេ… អាទិកម្មិកាយាតិ.

ទុតិយបារាជិកំ សមត្តំ.