២៥២. បដិសារណីយកម្មបដិប្បស្សទ្ធិកថា

៤២៥. ឥធ បន, ភិក្ខវេ, ភិក្ខុ សង្ឃេន បដិសារណីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, បដិសារណីយស្ស កម្មស្ស បដិប្បស្សទ្ធិំ យាចតិ. តត្រ ចេ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ សង្ឃេន បដិសារណីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, បដិសារណីយស្ស កម្មស្ស បដិប្បស្សទ្ធិំ យាចតិ. ហន្ទស្ស មយំ បដិសារណីយកម្មំ បដិប្បស្សម្ភេមា’’តិ. តេ តស្ស បដិសារណីយកម្មំ បដិប្បស្សម្ភេន្តិ – អធម្មេន វគ្គា. សោ តម្ហា អាវាសា អញ្ញំ អាវាសំ គច្ឆតិ. តត្ថបិ ភិក្ខូនំ ឯវំ ហោតិ – ‘‘ឥមស្ស ខោ, អាវុសោ, ភិក្ខុនោ សង្ឃេន បដិសារណីយកម្មំ បដិប្បស្សទ្ធំ អធម្មេន វគ្គេហិ. ហន្ទស្ស មយំ បដិសារណីយកម្មំ បដិប្បស្សម្ភេមា’’តិ. តេ តស្ស បដិសារណីយកម្មំ បដិប្បស្សម្ភេន្តិ – អធម្មេន សមគ្គា…បេ… ធម្មេន វគ្គា… ធម្មបតិរូបកេន វគ្គា… ធម្មបតិរូបកេន សមគ្គា…បេ….

ចក្កំ កាតព្ពំ.

បដិសារណីយកម្មបដិប្បស្សទ្ធិកថា និដ្ឋិតា.