២០០. បលិពោធាបលិពោធកថា

៣២៥. ទ្វេមេ, ភិក្ខវេ, កថិនស្ស បលិពោធា, ទ្វេ អបលិពោធា. កតមេ ច, ភិក្ខវេ, ទ្វេ កថិនស្ស បលិពោធា? អាវាសបលិពោធោ ច ចីវរបលិពោធោ ច. កថញ្ច, ភិក្ខវេ, អាវាសបលិពោធោ ហោតិ? ឥធ, ភិក្ខវេ, ភិក្ខុ វសតិ វា តស្មិំ អាវាសេ, សាបេក្ខោ វា បក្កមតិ ‘‘បច្ចេស្ស’’ន្តិ. ឯវំ ខោ, ភិក្ខវេ, អាវាសបលិពោធោ ហោតិ. កថញ្ច, ភិក្ខវេ, ចីវរបលិពោធោ ហោតិ? ឥធ, ភិក្ខវេ, ភិក្ខុនោ ចីវរំ អកតំ វា ហោតិ វិប្បកតំ វា, ចីវរាសា វា អនុបច្ឆិន្នា. ឯវំ ខោ, ភិក្ខវេ, ចីវរបលិពោធោ ហោតិ. ឥមេ ខោ, ភិក្ខវេ, ទ្វេ កថិនស្ស បលិពោធា.

កតមេ ច, ភិក្ខវេ, ទ្វេ កថិនស្ស អបលិពោធា? អាវាសអបលិពោធោ ច ចីវរអបលិពោធោ ច. កថញ្ច, ភិក្ខវេ, អាវាសអបលិពោធោ ហោតិ? ឥធ, ភិក្ខវេ, ភិក្ខុ បក្កមតិ តម្ហា អាវាសា ចត្តេន វន្តេន មុត្តេន អនបេក្ខោ [អនបេក្ខេន (ក.)] ‘‘ន បច្ចេស្ស’’ន្តិ. ឯវំ ខោ, ភិក្ខវេ, អាវាសអបលិពោធោ ហោតិ. កថញ្ច, ភិក្ខវេ, ចីវរអបលិពោធោ ហោតិ? ឥធ, ភិក្ខវេ, ភិក្ខុនោ ចីវរំ កតំ វា ហោតិ, នដ្ឋំ វា វិនដ្ឋំ វា ទឌ្ឍំ វា, ចីវរាសា វា ឧបច្ឆិន្នា. ឯវំ ខោ, ភិក្ខវេ, ចីវរអបលិពោធោ ហោតិ. ឥមេ ខោ, ភិក្ខវេ, ទ្វេ កថិនស្ស អបលិពោធាតិ.

បលិពោធាបលិពោធកថា និដ្ឋិតា.

កថិនក្ខន្ធកោ និដ្ឋិតោ សត្តមោ.