១៨៩. សមាទាយសត្តកំ

៣១២. ភិក្ខុ អត្ថតកថិនោ កតចីវរំ សមាទាយ បក្កមតិ ‘‘ន បច្ចេស្ស’’ន្តិ. តស្ស ភិក្ខុនោ បក្កមនន្តិកោ កថិនុទ្ធារោ.

ភិក្ខុ អត្ថតកថិនោ ចីវរំ សមាទាយ បក្កមតិ. តស្ស ពហិសីមគតស្ស ឯវំ ហោតិ – ‘‘ឥធេវិមំ ចីវរំ ការេស្សំ, ន បច្ចេស្ស’’ន្តិ. សោ តំ ចីវរំ ការេតិ. តស្ស ភិក្ខុនោ និដ្ឋានន្តិកោ កថិនុទ្ធារោ.

ភិក្ខុ អត្ថតកថិនោ ចីវរំ សមាទាយ បក្កមតិ. តស្ស ពហិសីមគតស្ស ឯវំ ហោតិ – ‘‘ឥធេវិមំ ចីវរំ ការេស្សំ, ន បច្ចេស្ស’’ន្តិ. តស្ស ភិក្ខុនោ សន្និដ្ឋានន្តិកោ កថិនុទ្ធារោ.

ភិក្ខុ អត្ថតកថិនោ ចីវរំ សមាទាយ បក្កមតិ. តស្ស ពហិសីមគតស្ស ឯវំ ហោតិ – ‘‘ឥធេវិមំ ចីវរំ ការេស្សំ, ន បច្ចេស្ស’’ន្តិ. សោ តំ ចីវរំ ការេតិ. តស្ស តំ ចីវរំ កយិរមានំ នស្សតិ. តស្ស ភិក្ខុនោ នាសនន្តិកោ កថិនុទ្ធារោ.

ភិក្ខុ អត្ថតកថិនោ ចីវរំ សមាទាយ បក្កមតិ – ‘‘បច្ចេស្ស’’ន្តិ. សោ ពហិសីមគតោ តំ ចីវរំ ការេតិ. សោ កតចីវរោ សុណាតិ – ‘‘ឧព្ភតំ កិរ តស្មិំ អាវាសេ កថិន’’ន្តិ. តស្ស ភិក្ខុនោ សវនន្តិកោ កថិនុទ្ធារោ.

ភិក្ខុ អត្ថតកថិនោ ចីវរំ សមាទាយ បក្កមតិ – ‘‘បច្ចេស្ស’’ន្តិ. សោ ពហិសីមគតោ តំ ចីវរំ ការេតិ. សោ កតចីវរោ – ‘‘បច្ចេស្សំ បច្ចេស្ស’’ន្តិ – ពហិទ្ធា កថិនុទ្ធារំ វីតិនាមេតិ. តស្ស ភិក្ខុនោ សីមាតិក្កន្តិកោ កថិនុទ្ធារោ.

ភិក្ខុ អត្ថតកថិនោ ចីវរំ សមាទាយ បក្កមតិ – ‘‘បច្ចេស្ស’’ន្តិ. សោ ពហិសីមគតោ តំ ចីវរំ ការេតិ. សោ កតចីវរោ – ‘‘បច្ចេស្សំ បច្ចេស្ស’’ន្តិ – សម្ភុណាតិ កថិនុទ្ធារំ. តស្ស ភិក្ខុនោ សហ ភិក្ខូហិ កថិនុទ្ធារោ.

សមាទាយសត្តកំ និដ្ឋិតំ.