១៦៤. អន្តោវុដ្ឋាទិបដិក្ខេបកថា

២៧៤. អថ ខោ ភគវា អនុបុព្ពេន ចារិកំ ចរមានោ យេន រាជគហំ តទវសរិ. តត្រ សុទំ ភគវា រាជគហេ វិហរតិ វេឡុវនេ កលន្ទកនិវាបេ. តេន ខោ បន សមយេន ភគវតោ ឧទរវាតាពាធោ ហោតិ. អថ ខោ អាយស្មា អានន្ទោ – ‘បុព្ពេបិ ភគវតោ ឧទរវាតាពាធោ តេកដុលយាគុយា ផាសុ ហោតី’តិ – សាមំ តិលម្បិ, តណ្ឌុលម្បិ, មុគ្គម្បិ វិញ្ញាបេត្វា, អន្តោ វាសេត្វា, អន្តោ សាមំ បចិត្វា ភគវតោ ឧបនាមេសិ – ‘‘បិវតុ ភគវា តេកដុលយាគុ’’ន្តិ. ជានន្តាបិ តថាគតា បុច្ឆន្តិ, ជានន្តាបិ ន បុច្ឆន្តិ; កាលំ វិទិត្វា បុច្ឆន្តិ, កាលំ វិទិត្វា ន បុច្ឆន្តិ; អត្ថសំហិតំ តថាគតា បុច្ឆន្តិ, នោ អនត្ថសំហិតំ. អនត្ថសំហិតេ សេតុឃាតោ តថាគតានំ. ទ្វីហិ អាការេហិ ពុទ្ធា ភគវន្តោ ភិក្ខូ បដិបុច្ឆន្តិ – ធម្មំ វា ទេសេស្សាម, សាវកានំ វា សិក្ខាបទំ បញ្ញបេស្សាមាតិ. អថ ខោ ភគវា អាយស្មន្តំ អានន្ទំ អាមន្តេសិ – ‘‘កុតាយំ, អានន្ទ, យាគូ’’តិ? អថ ខោ អាយស្មា អានន្ទោ ភគវតោ ឯតមត្ថំ អារោចេសិ. វិគរហិ ពុទ្ធោ ភគវា – ‘អននុច្ឆវិកំ, អានន្ទ, អននុលោមិកំ, អប្បតិរូបំ, អស្សាមណកំ, អកប្បិយំ, អករណីយំ. កថញ្ហិ នាម ត្វំ, អានន្ទ, ឯវរូបាយ ពាហុល្លាយ ចេតេស្សសិ. យទបិ, អានន្ទ, អន្តោ វុដ្ឋំ [វុត្ថំ (សី. ស្យា. ក.)] តទបិ អកប្បិយំ; យទបិ អន្តោ បក្កំ តទបិ អកប្បិយំ; យទបិ សាមំ បក្កំ, តទបិ អកប្បិយំ. នេតំ, អានន្ទ, អប្បសន្នានំ វា បសាទាយ…បេ… វិគរហិត្វា ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, អន្តោ វុដ្ឋំ, អន្តោ បក្កំ, សាមំ បក្កំ បរិភុញ្ជិតព្ពំ. យោ បរិភុញ្ជេយ, អាបត្តិ ទុក្កដស្ស. អន្តោ ចេ, ភិក្ខវេ, វុដ្ឋំ, អន្តោ បក្កំ, សាមំ បក្កំ តញ្ចេ បរិភុញ្ជេយ្យ, អាបត្តិ តិណ្ណំ ទុក្កដានំ. អន្តោ ចេ, ភិក្ខវេ, វុដ្ឋំ, អន្តោ បក្កំ, អញ្ញេហិ បក្កំ, តញ្ចេ បរិភុញ្ជេយ្យ, អាបត្តិ ទ្វិន្នំ ទុក្កដានំ. អន្តោ ចេ, ភិក្ខវេ, វុដ្ឋំ, ពហិ បក្កំ, សាមំ បក្កំ, តញ្ចេ បរិភុញ្ជេយ្យ, អាបត្តិ ទ្វិន្នំ ទុក្កដានំ. ពហិ ចេ, ភិក្ខវេ, វុដ្ឋំ, អន្តោ បក្កំ, សាមំ បក្កំ, តញ្ចេ បរិភុញ្ជេយ្យ, អាបត្តិ ទ្វិន្នំ ទុក្កដានំ. អន្តោ ចេ, ភិក្ខវេ, វុដ្ឋំ, ពហិ បក្កំ, អញ្ញេហិ បក្កំ, តញ្ចេ បរិភុញ្ជេយ្យ, អាបត្តិ ទុក្កដស្ស. ពហិ ចេ, ភិក្ខវេ, វុដ្ឋំ, អន្តោ បក្កំ, អញ្ញេហិ បក្កំ, តញ្ចេ បរិភុញ្ជេយ្យ, អាបត្តិ ទុក្កដស្ស. ពហិ ចេ, ភិក្ខវេ, វុដ្ឋំ, ពហិ បក្កំ, សាមំ បក្កំ, តញ្ចេ បរិភុញ្ជេយ្យ, អាបត្តិ ទុក្កដស្ស. ពហិ ចេ, ភិក្ខវេ, វុដ្ឋំ, ពហិ បក្កំ, អញ្ញេហិ បក្កំ, តញ្ចេ បរិភុញ្ជេយ្យ, អនាបត្តី’’’តិ.

តេន ខោ បន សមយេន ភិក្ខូ ‘‘ភគវតា សាមំបាកោ បដិក្ខិត្តោ’’តិ បុន បាកេ កុក្កុច្ចាយន្តិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, បុន បាកំ បចិតុន្តិ.

តេន ខោ បន សមយេន រាជគហំ ទុព្ភិក្ខំ ហោតិ. មនុស្សា លោណម្បិ, តេលម្បិ, តណ្ឌុលម្បិ, ខាទនីយម្បិ អារាមំ អាហរន្តិ. តានិ ភិក្ខូ ពហិ វាសេន្តិ; ឧក្កបិណ្ឌកាបិ ខាទន្តិ, ចោរាបិ ហរន្តិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, អន្តោ វាសេតុន្តិ. អន្តោ វាសេត្វា ពហិ បាចេន្តិ. ទមកា បរិវារេន្តិ. ភិក្ខូ អវិស្សដ្ឋា បរិភុញ្ជន្តិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, អន្តោ បចិតុន្តិ. ទុព្ភិក្ខេ កប្បិយការកា ពហុតរំ ហរន្តិ, អប្បតរំ ភិក្ខូនំ ទេន្តិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, សាមំ បចិតុំ. អនុជានាមិ, ភិក្ខវេ, អន្តោ វុដ្ឋំ, អន្តោ បក្កំ, សាមំ បក្កន្តិ.

អន្តោវុដ្ឋាទិបដិក្ខេបកថា និដ្ឋិតា.