១៥៣. យានាទិបដិក្ខេបោ

២៥៣. តេន ខោ បន សមយេន ឆព្ពគ្គិយា ភិក្ខូ យានេន យាយន្តិ, ឥត្ថិយុត្តេនបិ បុរិសន្តរេន, បុរិសយុត្តេនបិ ឥត្ថន្តរេន. មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘សេយ្យថាបិ គង្គាមហិយាយា’’តិ. ភគវតោ ឯតមត្ថំ អារោចេសុំ. ន, ភិក្ខវេ, យានេន យាយិតព្ពំ. យោ យាយេយ្យ, អាបត្តិ ទុក្កដស្សាតិ. តេន ខោ បន សមយេន អញ្ញតរោ ភិក្ខុ កោសលេសុ ជនបទេ សាវត្ថិំ គច្ឆន្តោ ភគវន្តំ ទស្សនាយ អន្តរាមគ្គេ គិលានោ ហោតិ. អថ ខោ សោ ភិក្ខុ មគ្គា ឱក្កម្ម អញ្ញតរស្មិំ រុក្ខមូលេ និសីទិ. មនុស្សា តំ ភិក្ខុំ ទិស្វា ឯតទវោចុំ – ‘‘កហំ, ភន្តេ, អយ្យោ គមិស្សតី’’តិ? ‘‘សាវត្ថិំ ខោ អហំ, អាវុសោ, គមិស្សាមិ ភគវន្តំ ទស្សនាយា’’តិ. ‘‘ឯហិ, ភន្តេ, គមិស្សាមា’’តិ. ‘‘នាហំ, អាវុសោ, សក្កោមិ, គិលានោម្ហី’’តិ. ‘‘ឯហិ, ភន្តេ, យានំ អភិរុហា’’តិ. ‘‘អលំ, អាវុសោ, បដិក្ខិត្តំ ភគវតា យាន’’ន្តិ កុក្កុច្ចាយន្តោ យានំ នាភិរុហិ. អថ ខោ សោ ភិក្ខុ សាវត្ថិំ គន្ត្វា ភិក្ខូនំ ឯតមត្ថំ អារោចេសិ. ភិក្ខូ ភគវតោ ឯតមត្ថំ អារោចេសុំ. អនុជានាមិ, ភិក្ខវេ, គិលានស្ស យានន្តិ. អថ ខោ ភិក្ខូនំ ឯតទហោសិ – ‘‘ឥត្ថិយុត្តំ នុ ខោ បុរិសយុត្តំ នុ ខោ’’តិ? ភគវតោ ឯតមត្ថំ អារោចេសុំ. អនុជានាមិ, ភិក្ខវេ, បុរិសយុត្តំ ហត្ថវដ្ដកន្តិ.

តេន ខោ បន សមយេន អញ្ញតរស្ស ភិក្ខុនោ យានុគ្ឃាតេន ពាឡ្ហតរំ អផាសុ អហោសិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, សិវិកំ បាដង្កិន្តិ.

យានាទិបដិក្ខេបោ និដ្ឋិតោ.