១៤៥. បវារណាសង្គហោ

២៤១. តេន ខោ បន សមយេន សម្ពហុលា សន្ទិដ្ឋា សម្ភត្តា ភិក្ខូ កោសលេសុ ជនបទេ អញ្ញតរស្មិំ អាវាសេ វស្សំ ឧបគច្ឆិំសុ. តេសំ សមគ្គានំ សម្មោទមានានំ អវិវទមានានំ វិហរតំ អញ្ញតរោ ផាសុវិហារោ អធិគតោ ហោតិ. អថ ខោ តេសំ ភិក្ខូនំ ឯតទហោសិ – ‘‘អម្ហាកំ ខោ សមគ្គានំ សម្មោទមានានំ អវិវទមានានំ វិហរតំ អញ្ញតរោ ផាសុវិហារោ អធិគតោ. សចេ មយំ ឥទានិ បវារេស្សាម, សិយាបិ ភិក្ខូ បវារេត្វា ចារិកំ បក្កមេយ្យុំ. ឯវំ មយំ ឥមម្ហា ផាសុវិហារា បរិពាហិរា ភវិស្សាម. កថំ នុ ខោ អម្ហេហិ បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ.

ឥធ បន, ភិក្ខវេ, សម្ពហុលា សន្ទិដ្ឋា សម្ភត្តា ភិក្ខូ អញ្ញតរស្មិំ អាវាសេ វស្សំ ឧបគច្ឆន្តិ. តេសំ សមគ្គានំ សម្មោទមានានំ អវិវទមានានំ វិហរតំ អញ្ញតរោ ផាសុវិហារោ អធិគតោ ហោតិ. តត្រ ចេ ភិក្ខូនំ ឯវំ ហោតិ – ‘‘អម្ហាកំ ខោ សមគ្គានំ សម្មោទមានានំ អវិវទមានានំ វិហរតំ អញ្ញតរោ ផាសុវិហារោ អធិគតោ. សចេ មយំ ឥទានិ បវារេស្សាម, សិយាបិ ភិក្ខូ បវារេត្វា ចារិកំ បក្កមេយ្យុំ. ឯវំ មយំ ឥមម្ហា ផាសុវិហារា បរិពាហិរា ភវិស្សាមា’’តិ, អនុជានាមិ, ភិក្ខវេ, តេហិ ភិក្ខូហិ បវារណាសង្គហំ កាតុំ. ឯវញ្ច បន, ភិក្ខវេ, កាតព្ពោ. សព្ពេហេវ ឯកជ្ឈំ សន្និបតិតព្ពំ – សន្និបតិត្វា ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ. អម្ហាកំ សមគ្គានំ សម្មោទមានានំ អវិវទមានានំ វិហរតំ អញ្ញតរោ ផាសុវិហារោ អធិគតោ. សចេ មយំ ឥទានិ បវារេស្សាម, សិយាបិ ភិក្ខូ បវារេត្វា ចារិកំ បក្កមេយ្យុំ. ឯវំ មយំ ឥមម្ហា ផាសុវិហារា បរិពាហិរា ភវិស្សាម. យទិ សង្ឃស្ស បត្តកល្លំ, សង្ឃោ បវារណាសង្គហំ ករេយ្យ, ឥទានិ ឧបោសថំ ករេយ្យ, បាតិមោក្ខំ ឧទ្ទិសេយ្យ, អាគមេ ជុណ្ហេ កោមុទិយា ចាតុមាសិនិយា បវារេយ្យ. ឯសា ញត្តិ.

‘‘សុណាតុ មេ, ភន្តេ, សង្ឃោ. អម្ហាកំ សមគ្គានំ សម្មោទមានានំ អវិវទមានានំ វិហរតំ អញ្ញតរោ ផាសុវិហារោ អធិគតោ. សចេ មយំ ឥទានិ បវារេស្សាម, សិយាបិ ភិក្ខូ បវារេត្វា ចារិកំ បក្កមេយ្យុំ. ឯវំ មយំ ឥមម្ហា ផាសុវិហារា បរិពាហិរា ភវិស្សាម. សង្ឃោ បវារណាសង្គហំ ករោតិ, ឥទានិ ឧបោសថំ ករិស្សតិ, បាតិមោក្ខំ ឧទ្ទិសិស្សតិ, អាគមេ ជុណ្ហេ កោមុទិយា ចាតុមាសិនិយា បវារេស្សតិ. យស្សាយស្មតោ ខមតិ បវារណាសង្គហស្ស ករណំ, ឥទានិ ឧបោសថំ ករិស្សតិ, បាតិមោក្ខំ ឧទ្ទិសិស្សតិ, អាគមេ ជុណ្ហេ កោមុទិយា ចាតុមាសិនិយា បវារេស្សតិ, សោ តុណ្ហស្ស; យស្ស នក្ខមតិ, សោ ភាសេយ្យ.

‘‘កតោ សង្ឃេន បវារណាសង្គហោ, ឥទានិ ឧបោសថំ ករិស្សតិ, បាតិមោក្ខំ ឧទ្ទិសិស្សតិ, អាគមេ ជុណ្ហេ កោមុទិយា ចាតុមាសិនិយា បវារេស្សតិ. ខមតិ សង្ឃស្ស, តស្មា តុណ្ហី, ឯវមេតំ ធារយាមី’’តិ.

តេហិ ចេ, ភិក្ខវេ, ភិក្ខូហិ កតេ បវារណាសង្គហេ អញ្ញតរោ ភិក្ខុ ឯវំ វទេយ្យ – ‘‘ឥច្ឆាមហំ, អាវុសោ, ជនបទចារិកំ បក្កមិតុំ; អត្ថិ មេ ជនបទេ ករណីយ’’ន្តិ, សោ ឯវមស្ស វចនីយោ – ‘‘សាធាវុសោ, បវារេត្វា គច្ឆាហី’’តិ. សោ ចេ, ភិក្ខវេ, ភិក្ខុ បវារយមានោ អញ្ញតរស្ស ភិក្ខុនោ បវារណំ ឋបេតិ, សោ ឯវមស្ស វចនីយោ – ‘‘អនិស្សរោ ខោ មេ ត្វំ, អាវុសោ, បវារណាយ, ន តាវាហំ បវារេស្សាមី’’តិ. តស្ស ចេ, ភិក្ខវេ, ភិក្ខុនោ បវារយមានស្ស អញ្ញតរោ ភិក្ខុ តស្ស ភិក្ខុនោ បវារណំ ឋបេតិ, ឧភោ សង្ឃេន សមនុយុញ្ជិត្វា សមនុគាហិត្វា យថាធម្មំ ការាបេតព្ពា. សោ ចេ, ភិក្ខវេ, ភិក្ខុ ជនបទេ តំ ករណីយំ តីរេត្វា បុនទេវ អន្តោ កោមុទិយា ចាតុមាសិនិយា តំ អាវាសំ អាគច្ឆតិ, តេហិ ចេ, ភិក្ខវេ, ភិក្ខូហិ បវារិយមានេ អញ្ញតរោ ភិក្ខុ តស្ស ភិក្ខុនោ បវារណំ ឋបេតិ, សោ ឯវមស្ស វចនីយោ – ‘‘អនិស្សរោ ខោ មេ ត្វំ, អាវុសោ, បវារណាយ; បវារិតោ អហ’’ន្តិ. តេហិ ចេ, ភិក្ខវេ, ភិក្ខូហិ បវារិយមានេ សោ ភិក្ខុ អញ្ញតរស្ស ភិក្ខុនោ បវារណំ ឋបេតិ, ឧភោ សង្ឃេន សមនុយុញ្ជិត្វា សមនុគាហិត្វា យថាធម្មំ ការាបេត្វា សង្ឃេន បវារេតព្ពន្តិ.

បវារណាសង្គហោ និដ្ឋិតោ.

បវារណាក្ខន្ធកោ ចតុត្ថោ.