១៣៦. នានាសំវាសកាទីហិ បវារណា

២៣០. ឥធ បន, ភិក្ខវេ, អាគន្តុកា ភិក្ខូ បស្សន្តិ អាវាសិកេ ភិក្ខូ នានាសំវាសកេ. តេ សមានសំវាសកទិដ្ឋិំ បដិលភន្តិ, សមានសំវាសកទិដ្ឋិំ បដិលភិត្វា ន បុច្ឆន្តិ, អបុច្ឆិត្វា ឯកតោ បវារេន្តិ. អនាបត្តិ. តេ បុច្ឆន្តិ, បុច្ឆិត្វា នាភិវិតរន្តិ, អនភិវិតរិត្វា ឯកតោ បវារេន្តិ. អាបត្តិ ទុក្កដស្ស. តេ បុច្ឆន្តិ, បុច្ឆិត្វា នាភិវិតរន្តិ, អនភិវិតរិត្វា បាដេក្កំ បវារេន្តិ. អនាបត្តិ.

ឥធ បន, ភិក្ខវេ, អាគន្តុកា ភិក្ខូ បស្សន្តិ អាវាសិកេ ភិក្ខូ សមានសំវាសកេ. តេ នានាសំវាសកទិដ្ឋិំ បដិលភន្តិ, នានាសំវាសកទិដ្ឋិំ បដិលភិត្វា ន បុច្ឆន្តិ, អបុច្ឆិត្វា ឯកតោ បវារេន្តិ. អាបត្តិ ទុក្កដស្ស. តេ បុច្ឆន្តិ, បុច្ឆិត្វា អភិវិតរន្តិ, អភិវិតរិត្វា បាដេក្កំ បវារេន្តិ. អាបត្តិ ទុក្កដស្ស. តេ បុច្ឆន្តិ, បុច្ឆិត្វា អភិវិតរន្តិ, អភិវិតរិត្វា ឯកតោ បវារេន្តិ. អនាបត្តិ.

ឥធ បន, ភិក្ខវេ, អាវាសិកា ភិក្ខូ បស្សន្តិ អាគន្តុកេ ភិក្ខូ នានាសំវាសកេ. តេ សមានសំវាសកទិដ្ឋិំ បដិលភន្តិ, សមានសំវាសកទិដ្ឋិំ បដិលភិត្វា ន បុច្ឆន្តិ, អបុច្ឆិត្វា ឯកតោ បវារេន្តិ. អនាបត្តិ. តេ បុច្ឆន្តិ, បុច្ឆិត្វា នាភិវិតរន្តិ, អនភិវិតរិត្វា ឯកតោ បវារេន្តិ. អាបត្តិ ទុក្កដស្ស. តេ បុច្ឆន្តិ, បុច្ឆិត្វា នាភិវិតរន្តិ, អនភិវិតរិត្វា បាដេក្កំ បវារេន្តិ. អនាបត្តិ.

ឥធ បន, ភិក្ខវេ, អាវាសិកា ភិក្ខូ បស្សន្តិ អាគន្តុកេ ភិក្ខូ សមានសំវាសកេ. តេ នានាសំវាសកទិដ្ឋិំ បដិលភន្តិ, នានាសំវាសកទិដ្ឋិំ បដិលភិត្វា ន បុច្ឆន្តិ, អបុច្ឆិត្វា ឯកតោ បវារេន្តិ. អាបត្តិ ទុក្កដស្ស. តេ បុច្ឆន្តិ, បុច្ឆិត្វា អភិវិតរន្តិ, អភិវិតរិត្វា បាដេក្កំ បវារេន្តិ. អាបត្តិ ទុក្កដស្ស. តេ បុច្ឆន្តិ, បុច្ឆិត្វា អភិវិតរន្តិ, អភិវិតរិត្វា ឯកតោ បវារេន្តិ. អនាបត្តិ.

នានាសំវាសកាទីហិ បវារណា និដ្ឋិតា.