១២៧. សភាគាបត្តិបដិកម្មវិធិ

២២១. តេន ខោ បន សមយេន អញ្ញតរស្មិំ អាវាសេ តទហុ បវារណាយ សព្ពោ សង្ឃោ សភាគំ អាបត្តិំ អាបន្នោ ហោតិ. អថ ខោ តេសំ ភិក្ខូនំ ឯតទហោសិ – ‘‘ភគវតា បញ្ញត្តំ ‘ន សភាគា អាបត្តិ ទេសេតព្ពា, ន សភាគា អាបត្តិ បដិគ្គហេតព្ពា’តិ. អយញ្ច សព្ពោ សង្ឃោ សភាគំ អាបត្តិំ អាបន្នោ. កថំ នុ ខោ អម្ហេហិ បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ.

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សព្ពោ សង្ឃោ សភាគំ អាបត្តិំ អាបន្នោ ហោតិ. តេហិ, ភិក្ខវេ, ភិក្ខូហិ ឯកោ ភិក្ខុ សាមន្តា អាវាសា សជ្ជុកំ បាហេតព្ពោ – គច្ឆាវុសោ, តំ អាបត្តិំ បដិករិត្វា អាគច្ឆ, មយំ តេ សន្តិកេ តំ អាបត្តិំ បដិករិស្សាមាតិ. ឯវញ្ចេតំ លភេថ, ឥច្ចេតំ កុសលំ. នោ ចេ លភេថ, ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ. អយំ សព្ពោ សង្ឃោ សភាគំ អាបត្តិំ អាបន្នោ. យទា អញ្ញំ ភិក្ខុំ សុទ្ធំ អនាបត្តិកំ បស្សិស្សតិ តទា តស្ស សន្តិកេ តំ អាបត្តិំ បដិករិស្សតី’’តិ វត្វា បវារេតព្ពំ; ន ត្វេវ តប្បច្ចយា បវារណាយ អន្តរាយោ កាតព្ពោ.

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សព្ពោ សង្ឃោ សភាគាយ អាបត្តិយា វេមតិកោ ហោតិ. ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ. អយំ សព្ពោ សង្ឃោ សភាគាយ អាបត្តិយា វេមតិកោ. យទា និព្ពេមតិកោ ភវិស្សតិ តទា តំ អាបត្តិំ បដិករិស្សតី’’តិ វត្វា, បវារេតព្ពំ, ន ត្វេវ តប្បច្ចយា បវារណាយ អន្តរាយោ កាតព្ពោតិ.

សភាគាបត្តិបដិកម្មវិធិ និដ្ឋិតា.

បឋមភាណវារោ និដ្ឋិតោ.