១២៥. អាបត្តិបដិកម្មវិធិ

២១៩. តេន ខោ បន សមយេន អញ្ញតរោ ភិក្ខុ តទហុ បវារណាយ អាបត្តិំ អាបន្នោ ហោតិ. អថ ខោ តស្ស ភិក្ខុនោ ឯតទហោសិ – ‘‘ភគវតា បញ្ញត្តំ ‘ន សាបត្តិកេន បវារេតព្ព’ន្តិ. អហញ្ចម្ហិ អាបត្តិំ អាបន្នោ. កថំ នុ ខោ មយា បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ [អារោចេសិ (ក.)].

ឥធ បន, ភិក្ខវេ, ភិក្ខុ តទហុ បវារណាយ អាបត្តិំ អាបន្នោ ហោតិ. តេន, ភិក្ខវេ, ភិក្ខុនា ឯកំ ភិក្ខុំ ឧបសង្កមិត្វា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា ឯវមស្ស វចនីយោ – ‘‘អហំ, អាវុសោ, ឥត្ថន្នាមំ អាបត្តិំ អាបន្នោ, តំ បដិទេសេមី’’តិ. តេន វត្តព្ពោ – ‘‘បស្សសី’’តិ. អាម បស្សាមីតិ. អាយតិំ សំវរេយ្យាសីតិ.

ឥធ បន, ភិក្ខវេ, ភិក្ខុ តទហុ បវារណាយ អាបត្តិយា វេមតិកោ ហោតិ. តេន, ភិក្ខវេ, ភិក្ខុនា ឯកំ ភិក្ខុំ ឧបសង្កមិត្វា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា ឯវមស្ស វចនីយោ – ‘‘អហំ, អាវុសោ, ឥត្ថន្នាមាយ អាបត្តិយា វេមតិកោ; យទា និព្ពេមតិកោ ភវិស្សាមិ តទា តំ អាបត្តិំ បដិករិស្សាមី’’តិ វត្វា បវារេតព្ពំ; ន ត្វេវ តប្បច្ចយា បវារណាយ អន្តរាយោ កាតព្ពោតិ.

អាបត្តិបដិកម្មវិធិ និដ្ឋិតា.