១២១. បវារណាភេទា

២១២. អថ ខោ ភិក្ខូនំ ឯតទហោសិ – ‘‘កតិ នុ ខោ បវារណា’’តិ? ភគវតោ ឯតមត្ថំ អារោចេសុំ. ទ្វេមា, ភិក្ខវេ, បវារណា – ចាតុទ្ទសិកា ច បន្នរសិកា ច. ឥមា ខោ, ភិក្ខវេ, ទ្វេ បវារណាតិ.

អថ ខោ ភិក្ខូនំ ឯតទហោសិ – ‘‘កតិ នុ ខោ បវារណកម្មានី’’តិ? [បវារណាកម្មានីតិ (ស្យា.)] ភគវតោ ឯតមត្ថំ អារោចេសុំ. ចត្តារិមានិ, ភិក្ខវេ, បវារណកម្មានិ – អធម្មេន វគ្គំ បវារណកម្មំ, អធម្មេន សមគ្គំ បវារណកម្មំ, ធម្មេន វគ្គំ បវារណកម្មំ, ធម្មេន សមគ្គំ បវារណកម្មំ. តត្រ, ភិក្ខវេ, យទិទំ អធម្មេន វគ្គំ បវារណកម្មំ, ន, ភិក្ខវេ, ឯវរូបំ បវារណកម្មំ កាតព្ពំ; ន ច មយា ឯវរូបំ បវារណកម្មំ អនុញ្ញាតំ. តត្រ, ភិក្ខវេ, យទិទំ អធម្មេន សមគ្គំ បវារណកម្មំ, ន, ភិក្ខវេ, ឯវរូបំ បវារណកម្មំ កាតព្ពំ; ន ច មយា ឯវរូបំ បវារណកម្មំ អនុញ្ញាតំ. តត្រ, ភិក្ខវេ, យទិទំ ធម្មេន វគ្គំ បវារណកម្មំ, ន, ភិក្ខវេ, ឯវរូបំ បវារណកម្មំ កាតព្ពំ; ន ច មយា ឯវរូបំ បវារណកម្មំ អនុញ្ញាតំ. តត្រ, ភិក្ខវេ, យទិទំ ធម្មេន សមគ្គំ បវារណកម្មំ, ឯវរូបំ, ភិក្ខវេ, បវារណកម្មំ កាតព្ពំ; ឯវរូបញ្ច មយា បវារណកម្មំ អនុញ្ញាតំ. តស្មាតិហ, ភិក្ខវេ, ឯវរូបំ បវារណកម្មំ ករិស្សាម យទិទំ ធម្មេន សមគ្គន្តិ, ឯវញ្ហិ វោ, ភិក្ខវេ, សិក្ខិតព្ពន្តិ.

បវារណាភេទា និដ្ឋិតា.