៥៨. អលជ្ជីនិស្សយវត្ថូនិ

១២០. តេន ខោ បន សមយេន ឆព្ពគ្គិយា ភិក្ខូ អលជ្ជីនំ និស្សយំ ទេន្តិ. ភគវតោ ឯតមត្ថំ អារោចេសុំ. ន, ភិក្ខវេ, អលជ្ជីនំ និស្សយោ ទាតព្ពោ. យោ ទទេយ្យ, អាបត្តិ ទុក្កដស្សាតិ.

តេន ខោ បន សមយេន ភិក្ខូ អលជ្ជីនំ និស្សាយ វសន្តិ. តេបិ នចិរស្សេវ អលជ្ជិនោ ហោន្តិ បាបកាភិក្ខូ. ភគវតោ ឯតមត្ថំ អារោចេសុំ. ន, ភិក្ខវេ, អលជ្ជីនំ និស្សាយ វត្ថព្ពំ. យោ វសេយ្យ, អាបត្តិ ទុក្កដស្សាតិ.

អថ ខោ ភិក្ខូនំ ឯតទហោសិ – ‘‘ភគវតា បញ្ញត្តំ ‘ន អលជ្ជីនំ និស្សយោ ទាតព្ពោ, ន អលជ្ជីនំ និស្សាយ វត្ថព្ព’ន្តិ. កថំ នុ ខោ មយំ ជានេយ្យាម លជ្ជិំ វា អលជ្ជិំ វា’’តិ? ភគវតោ ឯតមត្ថំ អារោចេសុំ. អនុជានាមិ, ភិក្ខវេ, ចតូហបញ្ចាហំ អាគមេតុំ យាវ ភិក្ខុសភាគតំ ជានាមីតិ.