៥៥. អនុបជ្ឈាយកាទិវត្ថូនិ

១១៧. តេន ខោ បន សមយេន ភិក្ខូ អនុបជ្ឈាយកំ ឧបសម្បាទេន្តិ. ភគវតោ ឯតមត្ថំ អារោចេសុំ. ន, ភិក្ខវេ, អនុបជ្ឈាយកោ ឧបសម្បាទេតព្ពោ. យោ ឧបសម្បាទេយ្យ, អាបត្តិ ទុក្កដស្សាតិ.

តេន ខោ បន សមយេន ភិក្ខូ សង្ឃេន ឧបជ្ឈាយេន ឧបសម្បាទេន្តិ. ភគវតោ ឯតមត្ថំ អារោចេសុំ. ន, ភិក្ខវេ, សង្ឃេន ឧបជ្ឈាយេន ឧបសម្បាទេតព្ពោ. យោ ឧបសម្បាទេយ្យ, អាបត្តិ ទុក្កដស្សាតិ.

តេន ខោ បន សមយេន ភិក្ខូ គណេន ឧបជ្ឈាយេន ឧបសម្បាទេន្តិ. ភគវតោ ឯតមត្ថំ អារោចេសុំ. ន, ភិក្ខវេ, គណេន ឧបជ្ឈាយេន ឧបសម្បាទេតព្ពោ. យោ ឧបសម្បាទេយ្យ, អាបត្តិ ទុក្កដស្សាតិ.

តេន ខោ បន សមយេន ភិក្ខូ បណ្ឌកុបជ្ឈាយេន ឧបសម្បាទេន្តិ…បេ… ថេយ្យសំវាសកុបជ្ឈាយេន ឧបសម្បាទេន្តិ…បេ… តិត្ថិយបក្កន្តកុបជ្ឈាយេន ឧបសម្បាទេន្តិ …បេ… តិរច្ឆានគតុបជ្ឈាយេន ឧបសម្បាទេន្តិ…បេ… មាតុឃាតកុបជ្ឈាយេន ឧបសម្បាទេន្តិ…បេ… បិតុឃាតកុបជ្ឈាយេន ឧបសម្បាទេន្តិ…បេ… អរហន្តឃាតកុបជ្ឈាយេន ឧបសម្បាទេន្តិ…បេ… ភិក្ខុនិទូសកុបជ្ឈាយេន ឧបសម្បាទេន្តិ…បេ… សង្ឃភេទកុបជ្ឈាយេន ឧបសម្បាទេន្តិ…បេ… លោហិតុប្បាទកុបជ្ឈាយេន ឧបសម្បាទេន្តិ…បេ… ឧភតោព្យញ្ជនកុបជ្ឈាយេន ឧបសម្បាទេន្តិ ភគវតោ ឯតមត្ថំ អារោចេសុំ. ន, ភិក្ខវេ, បណ្ឌកុបជ្ឈាយេន ឧបសម្បាទេតព្ពោ…បេ… ន, ភិក្ខវេ, ថេយ្យសំវាសកុបជ្ឈាយេន ឧបសម្បាទេតព្ពោ…បេ… ន, ភិក្ខវេ, តិត្ថិយបក្កន្តកុបជ្ឈាយេន ឧបសម្បាទេតព្ពោ…បេ… ន, ភិក្ខវេ, តិរច្ឆានគតុបជ្ឈាយេន ឧបសម្បាទេតព្ពោ…បេ… ន, ភិក្ខវេ, មាតុឃាតកុបជ្ឈាយេន ឧបសម្បាទេតព្ពោ …បេ… ន, ភិក្ខវេ, បិតុឃាតកុបជ្ឈាយេន ឧបសម្បាទេតព្ពោ…បេ… ន, ភិក្ខវេ, អរហន្តឃាតកុបជ្ឈាយេន ឧបសម្បាទេតព្ពោ…បេ… ន, ភិក្ខវេ, ភិក្ខុនិទូសកុបជ្ឈាយេន ឧបសម្បាទេតព្ពោ …បេ… ន, ភិក្ខវេ, សង្ឃភេទកុបជ្ឈាយេន ឧបសម្បាទេតព្ពោ…បេ… ន, ភិក្ខវេ, លោហិតុប្បាទកុបជ្ឈាយេន ឧបសម្បាទេតព្ពោ…បេ… ន, ភិក្ខវេ, ឧភតោព្យញ្ជនកុបជ្ឈាយេន ឧបសម្បាទេតព្ពោ. យោ ឧបសម្បាទេយ្យ, អាបត្តិ ទុក្កដស្សាតិ.