៥៣. ភិក្ខុនីទូសកវត្ថុ

១១៥. តេន ខោ បន សមយេន សម្ពហុលា ភិក្ខុនិយោ សាកេតា សាវត្ថិំ អទ្ធានមគ្គប្បដិបន្នា ហោន្តិ. អន្តរាមគ្គេ ចោរា និក្ខមិត្វា ឯកច្ចា ភិក្ខុនិយោ អច្ឆិន្ទិំសុ, ឯកច្ចា ភិក្ខុនិយោ ទូសេសុំ. សាវត្ថិយា រាជភដា និក្ខមិត្វា ឯកច្ចេ ចោរេ អគ្គហេសុំ, ឯកច្ចេ ចោរា បលាយិំសុ. យេ តេ បលាយិំសុ, តេ ភិក្ខូសុ បព្ពជិំសុ. យេ តេ គហិតា, តេ វធាយ ឱនិយ្យន្តិ. អទ្ទសំសុ ខោ តេ បលាយិត្វា បព្ពជិតា តេ ចោរេ វធាយ ឱនិយ្យមានេ, ទិស្វាន ឯវមាហំសុ ‘‘សាធុ ខោ មយំ បលាយិម្ហា, សចា ច មយំ គយ្ហេយ្យាម, មយម្បិ ឯវមេវ ហញ្ញេយ្យាមា’’តិ. ភិក្ខូ ឯវមាហំសុ ‘‘កិំ បន តុម្ហេ, អាវុសោ, អកត្ថា’’តិ. អថ ខោ តេ បព្ពជិតា ភិក្ខូនំ ឯតមត្ថំ អារោចេសុំ. ភិក្ខូ ភគវតោ ឯតមត្ថំ អារោចេសុំ. ភិក្ខុនិទូសកោ, ភិក្ខវេ, អនុបសម្បន្នោ ន ឧបសម្បាទេតព្ពោ, ឧបសម្បន្នោ នាសេតព្ពោតិ. សង្ឃភេទកោ, ភិក្ខវេ, អនុបសម្បន្នោ ន ឧបសម្បាទេតព្ពោ, ឧបសម្បន្នោ នាសេតព្ពោតិ. លោហិតុប្បាទកោ, ភិក្ខវេ, អនុបសម្បន្នោ ន ឧបសម្បាទេតព្ពោ, ឧបសម្បន្នោ នាសេតព្ពោតិ.