៥០. មាតុឃាតកវត្ថុ

១១២. តេន ខោ បន សមយេន អញ្ញតរោ មាណវកោ មាតរំ ជីវិតា វោរោបេសិ. សោ តេន បាបកេន កម្មេន អដ្ដីយតិ ហរាយតិ ជិគុច្ឆតិ. អថ ខោ តស្ស មាណវកស្ស ឯតទហោសិ – ‘‘កេន នុ ខោ អហំ ឧបាយេន ឥមស្ស បាបកស្ស កម្មស្ស និក្ខន្តិំ ករេយ្យ’’ន្តិ? អថ ខោ តស្ស មាណវកស្ស ឯតទហោសិ – ‘‘ឥមេ ខោ សមណា សក្យបុត្តិយា ធម្មចារិនោ សមចារិនោ ព្រហ្មចារិនោ សច្ចវាទិនោ សីលវន្តោ កល្យាណធម្មា. សចេ ខោ អហំ សមណេសុ សក្យបុត្តិយេសុ បព្ពជេយ្យំ, ឯវាហំ ឥមស្ស បាបកស្ស កម្មស្ស និក្ខន្តិំ ករេយ្យ’’ន្តិ. អថ ខោ សោ មាណវកោ ភិក្ខូ ឧបសង្កមិត្វា បព្ពជ្ជំ យាចិ. ភិក្ខូ អាយស្មន្តំ ឧបាលិំ ឯតទវោចុំ – ‘‘បុព្ពេបិ ខោ, អាវុសោ ឧបាលិ, នាគោ មាណវកវណ្ណេន ភិក្ខូសុ បព្ពជិតោ. ឥង្ឃាវុសោ ឧបាលិ, ឥមំ មាណវកំ អនុយុញ្ជាហី’’តិ. អថ ខោ សោ មាណវកោ អាយស្មតា ឧបាលិនា អនុយុញ្ជីយមានោ ឯតមត្ថំ អារោចេសិ. អាយស្មា ឧបាលិ ភិក្ខូនំ ឯតមត្ថំ អារោចេសិ. ភិក្ខូ ភគវតោ ឯតមត្ថំ អារោចេសុំ…បេ… មាតុឃាតកោ, ភិក្ខវេ, អនុបសម្បន្នោ ន ឧបសម្បាទេតព្ពោ, ឧបសម្បន្នោ នាសេតព្ពោតិ.