៤៤. អនាបុច្ឆាវរណវត្ថុ

១០៨. តេន ខោ បន សមយេន ឆព្ពគ្គិយា ភិក្ខូ ឧបជ្ឈាយេ អនាបុច្ឆា សាមណេរានំ អាវរណំ ករោន្តិ. ឧបជ្ឈាយា គវេសន្តិ – កថំ [កហំ (ក.)] នុ ខោ អម្ហាកំ សាមណេរា ន ទិស្សន្តីតិ. ភិក្ខូ ឯវមាហំសុ – ‘‘ឆព្ពគ្គិយេហិ, អាវុសោ, ភិក្ខូហិ អាវរណំ កត’’ន្តិ. ឧបជ្ឈាយា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខូ អម្ហេ អនាបុច្ឆា អម្ហាកំ សាមណេរានំ អាវរណំ ករិស្សន្តី’’តិ. ភគវតោ ឯតមត្ថំ អារោចេសុំ. ន, ភិក្ខវេ, ឧបជ្ឈាយេ អនាបុច្ឆា អាវរណំ កាតព្ពំ. យោ ករេយ្យ, អាបត្តិ ទុក្កដស្សាតិ.

អនាបុច្ឆាវរណវត្ថុ និដ្ឋិតំ.