៣៩. អាហុន្ទរិកវត្ថុ

១០២. តេន ខោ បន សមយេន ភគវា តត្ថេវ រាជគហេ វស្សំ វសិ, តត្ថ ហេមន្តំ, តត្ថ គិម្ហំ. មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘អាហុន្ទរិកា សមណានំ សក្យបុត្តិយានំ ទិសា អន្ធការា, ន ឥមេសំ ទិសា បក្ខាយន្តី’’តិ. អស្សោសុំ ខោ ភិក្ខូ តេសំ មនុស្សានំ ឧជ្ឈាយន្តានំ ខិយ្យន្តានំ វិបាចេន្តានំ. អថ ខោ តេ ភិក្ខូ ភគវតោ ឯតមត្ថំ អារោចេសុំ. អថ ខោ ភគវា អាយស្មន្តំ អានន្ទំ អាមន្តេសិ – ‘‘គច្ឆានន្ទ, អវាបុរណំ [អបាបុរណំ (ក.)] អាទាយ អនុបរិវេណិយំ ភិក្ខូនំ អារោចេហិ – ‘‘ឥច្ឆតាវុសោ ភគវា ទក្ខិណាគិរិំ ចារិកំ បក្កមិតុំ. យស្សាយស្មតោ អត្ថោ, សោ អាគច្ឆតូ’’តិ. ឯវំ, ភន្តេ, តិ ខោ អាយស្មា អានន្ទោ ភគវតោ បដិស្សុណិត្វា អវាបុរណំ អាទាយ អនុបរិវេណិយំ ភិក្ខូនំ អារោចេសិ – ‘ឥច្ឆតាវុសោ ភគវា ទក្ខិណាគិរិំ ចារិកំ បក្កមិតុំ. យស្សាយស្មតោ អត្ថោ, សោ អាគច្ឆតូ’’’តិ. ភិក្ខូ ឯវមាហំសុ – ‘‘ភគវតា, អាវុសោ អានន្ទ, បញ្ញត្តំ ទសវស្សានិ និស្សាយ វត្ថុំ, ទសវស្សេន និស្សយំ ទាតុំ. តត្ថ ច នោ គន្តព្ពំ ភវិស្សតិ, និស្សយោ ច គហេតព្ពោ ភវិស្សតិ, ឥត្តរោ ច វាសោ ភវិស្សតិ, បុន ច បច្ចាគន្តព្ពំ ភវិស្សតិ, បុន ច និស្សយោ គហេតព្ពោ ភវិស្សតិ. សចេ អម្ហាកំ អាចរិយុបជ្ឈាយា គមិស្សន្តិ, មយម្បិ គមិស្សាម; នោ ចេ អម្ហាកំ អាចរិយុបជ្ឈាយា គមិស្សន្តិ, មយម្បិ ន គមិស្សាម. លហុចិត្តកតា នោ, អាវុសោ អានន្ទ, បញ្ញាយិស្សតី’’តិ. អថ ខោ ភគវា ឱគណេន ភិក្ខុសង្ឃេន ទក្ខិណាគិរិំ ចារិកំ បក្កាមិ.

អាហុន្ទរិកវត្ថុ និដ្ឋិតំ.