៣០. លិខិតកចោរវត្ថុ

៩៣. តេន ខោ បន សមយេន អញ្ញតរោ បុរិសោ ចោរិកំ កត្វា បលាយិត្វា ភិក្ខូសុ បព្ពជិតោ ហោតិ. សោ ច រញ្ញោ អន្តេបុរេ លិខិតោ ហោតិ – យត្ថ បស្សតិ, តត្ថ ហន្តព្ពោតិ. មនុស្សា បស្សិត្វា ឯវមាហំសុ – ‘‘អយំ សោ លិខិតកោ ចោរោ. ហន្ទ, នំ ហនាមា’’តិ. ឯកច្ចេ ឯវមាហំសុ – ‘‘មាយ្យោ, ឯវំ អវចុត្ថ. អនុញ្ញាតំ រញ្ញា មាគធេន សេនិយេន ពិម្ពិសារេន ‘‘យេ សមណេសុ សក្យបុត្តិយេសុ បព្ពជន្តិ, ន តេ លព្ភា កិញ្ចិ កាតុំ, ស្វាក្ខាតោ ធម្មោ, ចរន្តុ ព្រហ្មចរិយំ សម្មា ទុក្ខស្ស អន្តកិរិយាយា’’តិ. មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘អភយូវរា ឥមេ សមណា សក្យបុត្តិយា, នយិមេ លព្ភា កិញ្ចិ កាតុំ. កថញ្ហិ នាម សមណា សក្យបុត្តិយា លិខិតកំ ចោរំ បព្ពាជេស្សន្តី’’តិ. ភគវតោ ឯតមត្ថំ អារោចេសុំ. ន, ភិក្ខវេ, លិខិតកោ ចោរោ បព្ពាជេតព្ពោ. យោ បព្ពាជេយ្យ, អាបត្តិ ទុក្កដស្សាតិ.

លិខិតកចោរវត្ថុ និដ្ឋិតំ.